0o HR 扮工週記 o0

Annual Dinner 的高潮位 之前講過 Annual Dinner 有個肚餓既腦細，哩次講下同事。 每年總有同事奉行公司出酒佢出命，搏哂老命咁飲無限量供應既紅酒白酒。 Annual Dinner 既程序進行到一半都未夠，已經唔難睇到有幾位同事醉到胡言亂語或者不醒人士。 上一年 Annual Dinner 既 MC 係剛加入 HR 部門的嫩肉。正當我們準備進行抽獎環節時，早有前科係公眾場合醉酒既五十幾歲、身形龐大既女同事 F ，突然唔知從邊到跳出黎，極速跑到台上，熊抱住台上既嫩肉 MC 。 仲記得嫩肉面部痛苦扭曲的表情， Dead Air 左兩秒之後，隨即哄堂大笑。雖然有幾個好心既同事即刻走到台上幫忙解圍，但都阻止唔到 95% 的同事係到拍照同埋錄影。 毫無疑問哩個就係當晚既高潮位，而剩低既時間入面，那 95% 的同事亦無再出現過哩種程度的興奮。 真係好想同 F 講：「如果咁有表演慾，應該早 D 同我地講嘛，二話不說地留返一個表演環節俾你，等我地唔駛諗到咁頭痛。」 而其他同事亦都好貼心，將哩段片即刻 post 上 Facebook ，等所有同事無論何時何地都可以重溫…… 其實工作上既閒言閒語，相信大家都經歷唔少。雖然 Annual Dinner 都係希望各位同事玩得盡興，但畢竟都係公眾場合，而且通常同事對哩一類笑料的記憶力都十分好，分分鐘俾你腦細記得，仲會影響升職添。（當然，嫩肉臨危不亂的精神，話唔定反而令佢升職……）

帶老豆辭職 上次講到帶女友見工，哩次講下帶老豆辭工。 話說同事 E 係年輕既小伙子，入職唔夠半年，已經屢次聽聞佢對工作唔太滿意，覺得工作時間長、工作量多、又需要輪班欠彈性。 （其實 HR 既工作都係 =_= …） 某一個下晝，我們 HR 正與其他部門開會，聽到會議室外十分嘈吵。接待處姐姐面有難色咁敲門走入會議室，話有人要立即找 HR ，於是腦細批准我離開會議室，去接待處睇下發生咩事。 點知只見一個大叔在咆哮：「我依家幫個仔黎辭職，我地要即刻走！」 之後我見到大叔身後同事 E 既身影。為免引人注目，我唯有請同事 E 父子到另一邊細少少既會議室。 一行入會議室，大叔就話：「依家我賠一個月人工，可以走未？」說罷後就將一疊銀紙同硬幣擲到會議室的桌上，正想轉身拉著同事 E 離去。我立即走到門前阻止佢地，同時解釋我們要一點時間計算 Final Payment ，同事 E 可能有未放既假期，可以計返俾佢。全程同事 E 都躲在父親身後不發一言。感覺就是俗稱的「裙腳仔」。如是者，找埋條數之後就 Close File 左。 點知大約一年後，我們又收到一封求職電郵，望一望…… 「咦？哩個咪之前帶埋老豆黎辭職果個同事 E ？仲要申請公司另一個職位？」 佢係咪忘記左之前對公司既各種不滿……定係發覺原來轉工只係由一個地獄跳去另一個地獄…… 其實辭職係好普遍既事，合則來不合則去，不過記住要跟足程序，唔好用比較奇怪既方法離開公司。 有時候你唔知件事會傳到去邊個人耳邊，尤其係你唔肯定將來會唔會對同一間公司既職位有興趣……

面試  之  帶女朋友一齊見工 咁岩尋日係 11 月 11 日，雙 11 ，咁就講下情侶野…… 有日下晝收到接待處同事電話，通知我地面試既應徵者 D 已經到左，我由 HR Office 行去接待處，準備帶 D 去會議室面試。 點知去到接待處既時候，只係見到一對年輕情侶坐左係到，猶如在公園咁卿卿我我。（我望住都有少少唔好意思打擾佢地……） 問清楚邊位係 D 之後，就帶佢上會議室。當然，如果佢女朋友話要跟埋上黎既話，我會毫不留情地棒打鴛鴦。好彩都無癲到咁， D 既女朋友話會係接待處等佢。 啊！唔記得講，點解會特登拎出黎講，原因係 D 都係一個年輕女性。利申：公司（我自己都係）沒有性別或性取向歧視，而最後 D 亦順利入職。 老實講，有伴侶陪你去面試係幾 Sweet ，但仲係送到公司門口算了，然後自己去附近的 Café 等。一來每個人既接受能力唔同，你都唔想接待處姐姐由你未入職就笑到你百年歸老嗰日掛。 P.S. 11 月 11 日除左係光棍節之外（明明兩個 1 拍埋一齊象徵住一對情侶既結合，都唔知做咩變左做光棍節），其實哩一日仲係第一次世界大戰停戰紀念日，讓世界充滿多點愛吧！

隔離飯香 相信唔少上班一族都會自己帶飯，既健康又慳錢，而大部分人都會將個飯盒放係公司 Pantry 既雪櫃，等到食飯既時候用微波爐叮返熱佢。 差唔多到放飯時間，同事 C 氣沖沖咁走入黎我地 HR 間房話：「我要投訴！我肯定有人偷左我個飯盒！」 第一下我聽完之後呆左。 （喂大佬，你既然知有人偷左你飯盒，你咪自己搵佢出黎囉，你搵我都幫你唔到架。） 之不過咁，我地當然要保持一貫 HR 的專業態度，忍住好想笑既心情，向佢了解情況。 原來案發經過係同事 C 朝早放左個飯落雪櫃，但係差唔多到放飯既時間，去拎個飯黎叮，點知就發現雪櫃咩都無，而出奇地一個空空如也的飯盒出現在 Pantry 的洗手盤入面，所以佢就認為係其中一個同事偷食左佢個飯盒。 我問：「咁你知唔知係邊個同事偷食左你個飯盒呀？」（繼續忍笑） 同事 C ：「唔知呀，但係公司除左同事就無其他人，你地 HR 可唔可以幫我搵下係邊個同事？」 （喂呀，我又唔係金田一，更加唔係福爾摩斯，最重要既係我地公司 Pantry 無裝 CCTV ，報警應該唔會受理俾人偷左個飯盒掛？） 最後既解決方法係……由我地出電郵俾全部同事，「溫馨提示」大家唔好不問自取其他人既物品，同埋係自己既財物上寫返自己個名……當然，哩樣野係腦細要求。不過心諗，分分鐘寫左自己個名，反而佢日日都黎食我個飯盒。 其實當日我地有問同事 C 佢有咩餸，佢答我地「有白飯啦，尋晚食剩左既蒸肉餅，同埋幾條菜咁囉。」 嗯……其實到今日我都唔明佢個「自家製」隔夜飯盒有咩咁吸引…… 我識條鐵咩……