發表文章

目前顯示的是 11月, 2018的文章
圖片
叫腦細加多啲人工(二) 其實香港地嘅職場真係好犯賤,點解咁講?喺香港返工,就算你日日無遲到無早退,生生性性跟足上頭指示做野,你嘅升職機會都唔會變多。老實咁講,公司架構同人員編制無變,除非公司托展業務,如果唔係你都要等,等到上面班友自己走或者退休,先有位俾你升。至於人工,做新人嘅時候,老海鮮成日都會叫你諗下,自己 5 年後或者 10 年後,會去到咩位,依家不如你開始計下到底 10 年後你會賺幾錢人工?每年加得 4% 都唔知有無,當你依家 2 萬出頭,每年加 1 千蚊唔夠,仲未計你個職級有頂薪,諗諗你有幾耐先成位「中產」(利申:絕無「中產」抽水成分)? 經常有一句就係「魚唔過塘唔肥」,想升職加人工?得,扭下 Pat Pat 先啦,因為你唔扭,就會跌返入剛才講嘅循環。切記,扭都要扭得有學問。 第一,一定要陰啲陰啲咁話俾腦細知,依家你唔妥個價錢,或者係工作與薪金不相乎,俾佢知市場情況,俾佢知平時你有幾辛苦,俾佢知你隔離個蛋散唔做野但同你一樣人工。前題係一定要陰啲陰啲咁俾佢知,因為腦細請班人返黎幫佢做野,就係因為自己唔想做,如果掉返轉頭請左班人返黎,反而仲搞到佢做多左野,或者日日怨哩樣怨嗰樣,佢又點會幫你呢? 第二,就算唔妥份工都好,都要俾返少少衝勁同埋正面嘅思想黎睇下,少少得架啦,因為有邊個返工會返到咁正面?但最低限度俾人睇你係尊重自己、尊重份工。試諗下,如果你嘅手下日日都話份工差,想過檔轉行嘅話,第一樣野你諗嘅一定係「又話差?咁你又唔真係走?你走左,我仲慳返筆代通知金!」所以你成日都會聽到啲老海鮮經常同啲新人講份工幾難頂,個腦細幾有問題,但佢自己就留喺公司做左廿幾三十年,其實佢地都係扭緊 Pat Pat ,博新人走,然後提高流失率,證明哩個位置值得更高人工,與此同時證明自己嘅忠誠程度。 第三,間唔中扭下就得,因為如果你日日扭,變相腦細會覺得你其實都有心走,反正都留你唔到,由你走,即刻私底下搵相熟嘅獵頭請你個位返黎,到佢搵你傾計嘅時候,唔止無得升職加人工之外,其次你嘅情況就會被迫到入去二選一、去或留嘅境地。 最後,記住凡事一定要留有後著,如果決定要行扭 Pat Pat 哩一步,記住要睇定市場有咩岩心水嘅工,或者決定離職後嘅計劃,因為凡事都要向壞嗰方面諗,畢竟世事永遠未如理想。 講起扭 Pat Pat
圖片
叫腦細加多啲人工(一) 點樣先可以成功叫腦細加多啲人工,哩樣係歷久不衰嘅一個討論話題。但小編真係教唔到大家有咩必勝法則,有嘅話小編自己都唔駛咁辛苦啦。正路嘅提議都不外乎留意一下市場動向,相關行業消息,將自己嘅功勞整理好,再 Present 俾腦細聽。 耐不耐就會有同事作出哩個嘗試,去搵腦細傾人工,而當中有啲原因會令大家充滿歡樂,但係加人工唔成功。 1) 「我層樓未供完,又有幾個細路要養,仲有卡數要交……好大壓力!」 哩樣野一啲都唔好笑,係好殘酷嘅現實。不過咁,十個同事入面有十一個都係咁…… 2) 「如果我唔搵多啲錢,會無錢俾個仔買樓。」 小編都好羨慕有個廿四孝老豆…… 3) 「因為我靚仔過其他同事,令公司形象好啲。」 唔……見仁見智啦,同埋除非你係見緊美容廣告代言人哩份工…… 4) 「我好大力,可以一次過搬好多野,勁過其他同事!」 除非你係做緊一份需要體力勞動嘅工作,我相信會有一個幾大嘅優勢,不過如果係 Office 工的話…… 5) 「因為我老婆喺大公司做 Marketing Manager ,我唔想低人工過老婆!」 …… 其實要 R 腦細加人工,真係要熟悉腦細嘅脾性,同埋最緊要知道自己係咪真係講緊野,如果唔係加唔到人工事少,影響將來晉升事大呀…… 恭喜大家又到 Monday Blue ,咁又開始一個新嘅禮拜,距離大家退休又邁進一小步了!
圖片
CV 的問題 關於 CV 嘅問題,首先唔好問點解哩個年代都仲需要 CV ,有啲地方可能真係唔會睇,但有返啲規模嘅公司又或者見嘅係文職工作,申請嘅時候都需要提交 CV 。依家好多時候對 CV 嘅要求其實已經降到非常之低,但有啲情況依然令人覺得好無奇…… 1) 資料錯誤 收到個 CV ,想打俾個求職者約時間面試,點知嘟都未嘟,就已經彈一句「此電話號碼並無登記」。好彩 CV 上面有佢個電郵地址,有多過一個聯絡方法真係值得讚一讚哦 ~ 最後終於用電郵成功聯絡到個求職者,佢亦都證實咗 CV 上面個電話號碼打錯咗。雖然好似唔係咩大件事,而最後亦都順利搵到佢,但係好多人,包括你嘅未來腦細都有好大機會,對哩啲基本資料會出錯嘅人無咩好感。記住記住千其唔好衰喺打錯字上面! 2) 異常多的工作經驗 講緊嘅係畢咗業五年,做過二十間公司,每一份工作都唔超過六個月。如果哩啲工係屬於短期合約或兼職,麻煩大家幫下自己,喺 CV 上面註明返。但係細心啲再睇下份 CV ,求職者係一份接住一份嘅長期工作,但無一份可以返多過六個月!小編好同意每一個人總會遇到人生嘅低潮,甚或乎只係某啲公司你係連 3 個月都頂唔順(正所謂天下烏龜一樣黑,畢竟十間公司好大機會有九間都係咁難頂),但點都有一兩間比較上無咁難頂,可以令你堅持到一年掛?如果唔係,可能要諗下自己有無揀錯行業……雖然依家行行都缺人,搵唔到人嘅公司最後可能都迫於無奈會揀啲唔係咁理想嘅 Candidate ,但當市道唔好嘅時候就未必有哩枝歌仔唱啦。 3) CV 要 Update 哦 你可能覺得 Update CV 無咩意義,但返工絕對可能有更多無意義嘅野要你做。既然寫得 CV ,即係某程度上無可奈可之下要返工,咁不如行多一步。最誇張係試過收過一份 CV ,最後嘅工作係 1995 年!小編成個部門都唔肯定個 Candidate 係由 1996 年之後唔記得 Update 份 CV ,定抑或係 1996 年開始去咗流浪,無返過任何工。其實份 CV 有最 Update 嘅資料,係可以令大家嘅工作容易啲,等工作上可以有更多時間做啲更有意義嘅事,生命變得更美好。 4) CV 係咩黎架? 不解決……相信大家就算唔想寫,唔同意要寫都好,都唔會唔知係咩黎。就算你未聽過都可以問下
圖片
辛苦了同事 依家唔少公司都好著重企業社會責任,姐係所謂嘅 Corporate Social Responsibility ( CSR ),最大嘅原因都不外乎係建立品牌嘅正面形象,做到宣傳嘅目的。社會上亦越黎越多五花八門嘅獎項,用黎鼓勵各大企業去參與,或者籌備一啲同 CSR 有關嘅活動,好多時候都係啲捐款呀,做下義工咁,成件事聽落好正面,成個社會都有一齊做善事嘅心,啲企業賺左咁多錢,好應該回饋一下社會。之但係咁, CSR 一開始做,就只會一年比一年多,而要有足夠資格拎到某啲嘅獎,就要每年捐款一定嘅金額,同埋參與若干小時嘅義工服務。情況就好似洗濕左個頭咁,一但開始左就只有繼續落去,結果就好似踏上左一條不歸路咁。試諗下,如果一間大公司之前五年都積極參加社會服務活動,唯獨今年停左落黎,好大機會會引發社會上某啲人嘅好奇心…… 一搞親 CSR ,一間公司入面最關事嘅部門,都莫過於 Admin 、 Marketing 、 PR 同 HR ,如果公司唔算好大, HR 好多時候都要幫手做埋 Coordinator 嘅工作。對於哩啲活動,大部分同事都唔想參加,但腦細又話最少要有一隊人參加,見住同事推黎推去,就算成個 HR 部門咁多條友加哂落去都唔夠,真係睇見都心酸。 仲要 CSR 哩樣野唔剩只係做俾顧客睇,同事亦走唔甩。之前講過話公司中秋節搞過 CSR 派社企曲奇,第一野中招嘅就係同事;依家黎到秋冬天,又係旅行呀,行山嘅日子,每年差唔多哩個時候,中環都會有個幾大型嘅籌款活動,參加辦法就係每間企業捐一大筆錢,然後派出一隊同事,喺某一個星期日朝早嘅中環參加比賽。返工返左成個禮拜,星期日朝早你俾人瞓晏啲得唔得姐?!仲要一朝早同你返中環! 又有另一個活動,叫咩 Walk Up ABC Building ,參加辦法一樣,只係今次我哋玩行.樓.梯!由地面用接力方式,鬥快行上最高嗰層!好似話有成 50 層,仲有限制一隊不多於 5 人……然後因為哩個活動,所有參加嘅同事突然自稱體弱多病,由 18 至 60 歲嘅同事,咩哮喘、腰痛、膝頭痛、坐骨神經痛,乜都出哂黎。 玩完市區,再玩埋郊區。有唔少個名叫咩「 XX 環保行」嘅活動,公司捐錢,員工行山。如果同事真係有興趣參加,小編一定唔會反對,但係大部分隊伍都係迫出黎,大家黑口黑面咁行山,又