又黎英文名

首先補祝大家冬至快樂，當大家睇到哩篇嘅時候，我相信已經係平安夜了，所以再祝大家平安夜平平安安，祝舊年已經變左三人行嘅大家，再接再勵。

上年提到見過有應徵者叫啲得意嘅英文名，例如咩 Sweetie、Alien、Cupid、Emperor、Keepwin，近幾個禮拜又見到幾個新嘅英文名……

Waiting — 岩岩大左結局嘅 CCTBB 台慶劇《兄弟》入面有個 Sitting，而哩位女仔就叫 Waiting 啦，雖然唔知佢 Waiting 緊啲咩，不過斷估應該唔會係 Waiting 緊小編約佢平安夜出黎去街街啦。 : (

Monkey — 叫 Monkey 哩位人兄，其實都幾人如其名，因為由佢一入公司大門嗰一刻，佢已經周身郁，彈黎彈去，周圍睇黎睇去，堅係成隻 Monkey 咁，不過如果公司有哩一類人，Annual Dinner 搞氣氛應該相對容易好多。

Handsome — 那，又係哩一類英文名，叫哩一類英文名嘅人，多數就唔似 Monkey 嗰類人咁，哩類人往往同佢嘅樣貌不相符，叫得 Handsome 就一定唔 Handsome，叫得Beauty 就一定唔會 Beauty，又不過咁，凡事都有兩面，咁樣嘅人先有 Gimmick，容易打入圈子，所以往往哩類人都係鎂光燈下嘅焦點。

Apollo — 太陽神阿波羅呀，型到噴汁！不過再睇一睇個人……算了，話哂都就黎平安夜，免得太毒舌會俾人尋仇。

分享下哩啲英文名俾大家聽，純粹等大家增廣見聞，同埋幫大家為自己嘅小朋友改返個又型又靚又特別嘅名，完全無貶低成分。小編覺得每一個父母改嘅名都有佢背後嘅原因，千其唔好因為一啲無謂嘅原因而放棄，包括俾大家笑兩笑等等；至於如果個名係你自己改嘅，咁呢……就呢……入廁所照下塊鏡，改返個岩自己嘅名啦。