Onboarding 第一日注意事項 – 準時

唔知曾經大家有無睇過一個節目《90’s夢飛翔》入面嘅阿輝？！由於之前最高 click rate 嘅一直都係節錄左佢柒咕碌嘅前半段，但最近小編突然好奇後半部分到底係點，所以終於俾小編搵到成個節目。雖然睇睇下真係會有尷尬癌，但係當你睇哂 20 分鐘之後，就會發覺，其實阿輝真係好勇敢，同埋好勇於去追夢！90 後萬歲（誤）！！

不過咁，先唔好錯 Focus，雖然欣賞佢勇敢，但因年少輕狂，佢 Onboarding 嘅第一日簡直不堪入目，完全係低級錯誤，遲到！

首先我哋睇下第一段（由第 10 秒開始：https://youtu.be/JrK9zpOHe2Q?t=10）

主持人：點呀？第一日返工就遲到呀？

阿輝（笑住講）：唔識路呀……

主持人：下？唔識路就早啲出黎囉。第一日返工唔好遲到呀，知唔知呀？

第一日返工就遲到固然唔應該，但問題係個理由竟然係唔識路，正如主持人咁講，唔識路就早啲出黎，或者直頭之前一日試下去，咁咪識路囉。另一樣野就係你遲到都要施施然咁行過去，仲要笑住咁講，令人覺得你唔認真，所以哩種情況下，點都要交少少戲，就係扮慢跑，最好有少少汗，然後個樣好內疚咁講「對唔住呀，我遲到……」。

第二段（由第 7 分 59 秒開始：https://youtu.be/JrK9zpOHe2Q?t=479）

製作助理 Tim：喂阿輝，你點解仲未到嘅你？喂我咃講明 12 點鐘到到喎。

（到埗後）製作助理 Tim：今日約幾點？

阿輝：12 點。

製作助理 Tim：依家幾點呀？

阿輝：12 點 3 到。

製作助理 Tim：我隻錶 12 點 4 啦。

製作助理 Tim（向主持人講）：佢話佢會遲一至兩個字到

主持人：幾點打俾你嗰陣？

製作助理 Tim（向主持人講）：嗰陣時，11 點 10 到。

黎到第二段，大家需要學嘅係咩呢？就係如果你有事要遲到，絕對唔可以最後 1 至 2 個字先打俾僱主，因為好多時都係 Foresee 到你會遲，除非有突發事件啦。話時話，個製作助理自己講話係約 12 點到到，俾人嘅感覺係 Around 12 點啦，雖然話作為僱員早到好過遲到，不過如果約你嗰個都講得唔肯定，令人覺得有彈性，又真係敗筆。

第三段（由第 9 分 25 秒開始：https://youtu.be/JrK9zpOHe2Q?t=565）

阿輝：列車延遲左……

製作助理 Tim：延遲左呀？下次你都 Call 聲丫……

可能上次阿輝打俾製作助理，搞到俾佢扳左一野，今次索性直頭唔打俾佢，點知又衰左。同第二段一樣啦，雖然港鐵成日壞，之但係佢壞左 20 分鐘之後就「一定」會話你知佢壞左（突然又諗起工展會「個野壞左呀 ~」），嗰時你就最好打一打俾僱主啦，等對方都有啲預算你幾時會到。

不過同上個禮拜講嘅一樣啦，所以野都係同一個字有關係，「緣」……因為「緣」哩樣野真係好玄，有啲人請返黎嘅時候，你會覺得佢個印象好到加零一，無論佢做錯咩你都覺得可以原諒佢；之但係有啲人就相反，請完返黎之後，突然又覺得佢印象差到飛起，就連呼吸都係錯。

可以點？生生性性，盡量唔好出錯啦。