裸辭

話說裸辭有無問題？好多人經常都好掙扎就係到底好唔好裸辭。

無，其實真係無，小編完全唔覺得裸辭係有問題。都 2018 年啦，腦部都要開發下，返緊一份工真係好困身，好難去 Interview，除非你做開返 Shift 嘅工，如果唔係突然要你上晝或者下晝某幾粒鐘去 Interview，除左請假扮病或者係直接同老闆講你去見工之外，相信都幾難去到，變相可能要拉長搵工嘅時間。

另一樣野就係一份工做左一段時間，會令人身心疲累（做得幾個月嗰啲另計），係需要啲 Me Time 休息下，洗滌一下心靈，咁可以趁住未搵到新工之前休息下。但係伴隨而黎嘅可能係另一個煩惱嘅問題：如何解釋空白期。

首先唔駛太擔心，依家好多公司其實都唔係太在意哩個空白期，尤其只係幾個月嗰啲。大多數腦細同 HR 朋友都會諗你只係想休息下，甚至去下個旅行咁都個幾兩個月啦。不過咁，注意如果比較長嘅空白期的確會引起人類嘅好奇心，而長達一年或以上嘅空白期，又無合理解釋嘅話，更有機會降低受聘嘅機會。

雖然小編真係唔算太在意，但循例都要問下，睇係咪有咩特別原因，定純粹只係因為份工做得太短時間而唔寫落 CV。其實即使轉工頻密都唔係一個問題，因為最重要係背後有「合理」嘅原因支持到你哩一個決定，例如可以係份工伏到喊出黎、講嘅福利同實際收到嘅唔同、突然發掘到想做嘅野等等，其實只要老老豆豆咁講返你個「合理」原因就得。

哩個時候或者你會好無奈，但最緊要都係合理，因為黎得見工，總有少少做戲成份。可能你會覺得，要俾真實嘅一面腦細睇、又唔鍾意講大話、只要返到工就可以表現到實力等等。但係諗深一層，其實同識男、女朋友一樣，你唔先吸引對方，又點令對方想深入了解你？如果你連戲都不屑去做，人哋點會俾機會你去表現呢？所以好好睇睇咁做埋場戲佢，準備返一個得體少少嘅答案。下面有反面教材……

個案 1

黃小姐：「我上年 6 月結婚，要返大陸擺酒，好多野要搞，所以咪無做囉。」

欸？之後呢？結左婚到依家都就黎年半啦喎，擺酒都擺左好耐啦……除非你補返句話你分左好多次咁擺酒就講得通。

個案 2

陳先生：「我無做野四個月之後習慣左咁得閒，懶得去搵工，所以一直都無搵工啦。」

最後拖到十個月之後咪又係要搵，唔知陳生平日有咩野做呢？可能種下花花草草咁又一日，用哂啲錢終於要重新上路了。

個案 3

張先生：「其實我地打過工架，以前一直喺老豆間公司做，直到幾年前老豆話嗰行無得做，執左間公司，咁我咪順便提早退休囉。依家過左幾年悶悶地，咪試睇下搵唔搵份工做下。未試過搵工，原來都唔容易喎，哈哈哈……」

你就好啦，小編都想體驗下生活……

其實小編都只係想睇下大家對答上係咪得體，有無禮貌，個人會唔會無所事事到，連答都答唔出。老實講，對哩樣野小編亦都無咩美國時間去考究你係講堅定流，或者係查你家宅，只係想你表現到職場上嘅基本禮儀同對答，甚至你話你空白期嗰段時間去左坐監都無所謂。（當然，犯嘅事同份工無咩直接關係就得。）

除左常用嘅屋企有事發生，照顧屋企人之類嘅原因，亦都可以話自己喺哩段時間有以下嘅活動。

- 做兼職：特別係如果你從事嘅行業好容易搵到 Freelance 或者 Part Time，例如會計、Event Planner、網頁設計等等。Freelance 唔需要透露啲咩細節野，亦唔需要將啲客嘅野講俾人聽，不過留意返就係見工嗰間公司如果真係請左你，仲俾唔俾你繼續接 Job 做 Freelance，又或者係需唔需要上報朝廷。

- 持續學習：可以同工作有關或者無關都可以，因為每個人都有自己嘅興趣，亦都可能想學下新技能。哩一樣野本身都屬於正面，好應該鼓勵下，不過並唔包括喺半年內上左一個只係得一日嘅興趣班之類嘅例子……

到最後，如果各位自問解釋完過到自己嗰關，但係對方公司都好似唔係好接受，咁就由佢啦，因為證明你哋嘅價值觀唔同，就算請左你，都好可能合作得好辛苦，又好似男、女朋友咁，就算磨合到，都可能好辛苦。

講開哩個話題，其實小編都想問下各位腦細，想請個返緊工，但要你等一個月嘅 Candidate，你會話等人用，唔想等咁耐；而有 Immediately available 嘅 Candidate，你又好奇加在意甚至質疑人哋點解依家唔係返緊工，咁到底你想點？照道理可以即時返工應該係一個優勢，到底腦細你諗清楚想點未？