千奇百趣 Interview  之  等緊 Interview 做乜好

去一個 Interview 要等，早已經見怪不怪。當然，有啲同行唔知做咩係都要人等成個鐘先有得見人，小編都覺得有少少過份，但等返 10 至 15 分鐘多數都走唔甩架啦。不過咁，等緊見人嘅時候，大家會做啲乜？小編見過喺 Waiting Room 或者會議室內嘅 Candidate 會有以下嘅行為。

1. 低頭族

唔，好似好平常咁，而大部分人都好似會撳下電話。當然，最好唔好狂撳啦，覆 Whatsapp，睇 Facebook 哩啲最好可免則免。你要明白呢，會議室你坐嘅位置多數都係小編諗過度過，先安排你坐嗰個位，多數都可以喺你唔發覺嘅情況 下，望到你做嘅一舉一動。

2. 講電話

可能會騷擾到人，或者俾其他人聽到。試過有一個 Candidate 仲喺到用 Face Time 直播俾佢朋友睇佢等 Interview 嘅情況。仲有一個仲勁， Interview 緊嘅時候有人打俾個 Candidate，佢又真係夠膽死拎出黎聽，仲大大聲聲話俾人聽佢依家 Interview 緊，然後仲要閒聊左半分鐘先肯斷佢線。

3. 睇報紙 / 雜誌

以前比較多，但自從手提電話可以上網之後就越黎越少。不過十年一次，有啲叔叔都可以喺唔知邊到抽到份報紙出黎睇。

4. 瞓覺

請注意下自己嘅「睡相」，又唔係話唔俾瞓，有時候 Interview 約朝早 10 點又真係早左啲，小編都十分之明白，所以你閉目養神都係人之常情，只要唔係瞓到流口水、打哂鼻鼾或者係小編嗌你都聽唔到，咁就得啦。

5. 補妝

注重儀容真係值得一讚，照下鏡，睇下有無菜痴住喺牙齒到都無咩大問題，但如果要做到拎個粉盒出黎狂印自己塊面，不如都係去返洗手間先補，話知你喺入面補牙都無人知。記住要注意，要用還原靚靚拳，因為好多時候都會畫蛇添足，本身明明都幾好，望落去幾舒服，點知不停係咁補妝，變得濃到不行。

6. 改功課

唔少雙職父母公私務繁忙，唯有爭取無一分每一秒。有 Candidate 隨身都帶住仔女嘅功課，喺等緊 Interview 期間都不忘幫仔女改下功課。當然，哩個同睇雜誌一樣，真係十年先會見到一次，如果你有幸見到，應該去買返張六合彩。

7. 伸展運動

姐係拉筋，唔係剩係放鬆下條頸，或者膊頭嗰隻，而係成隻腳放上枱咁拉嗰隻……小編一入到會議室，見到你竟然將隻奪命香雞腳，放上平時大家開會張枱上面，小編真係會想踢你落山！

8. 投訴

小編曾經遇過有個 Candidate 等左唔夠 5 分鐘就同 Reception 姐姐投訴話小編做乜仲未到，然後每隔 5 分鐘就叫 Reception 姐姐打上黎俾小編，話約左 9 點就一定要 9 點見到 HR，等一陣都唔得，於是搞到 Reception 係咁應酬佢。

9. 談情 / 傾計

以前都有講過見工帶埋男朋友、女朋友、普通朋友、爸爸或者媽媽等等，有部分人喺等緊見小編嘅時候都會忘我地聯絡下感情，小編喺門外都唔知入唔入黎好。

其實等 Interview 期間，某程度上都已經係 Interview 嘅一部分，你嘅行為會為自己留低唔同嘅印象。如果對份工作或者對間公司真係有興趣，應該嘗試留返一個好印象。如果坐喺 Interview Room 或者會議室等緊嘅朋友仔，其實可以望一望間房，到底有咩擺設，牆上會唔會有掛左咩喺到；如果有玻璃望到出去，都可以用一個溫柔嘅眼神去觀察下其他同事嘅表情，睇下攞唔攞到有用嘅資料。

如果真係間房咩都無，又睇唔到出面，咁都無辦法，悶下都唯有等，或者組織下你嘅三語自我介紹，諗下最尾有咩問題問好過做其他野啦。你要人尊重你，首先你要尊重人。

以上建議不適用於要你等成個鐘嘅公司或者 HR。