真假 MT Programme

話咁快 7 月都過左一半，想當年小編業都未畢就已經揸住兩個 Offer 唔知揀咩好了，其中一間係 NGO 黎，當日同 NGO 個理事長 Interview 完左之後，send 左封 Thank You Email 俾佢，跟手佢已經好快地覆，仲打左篇千字文俾小編，話俾小編知黎緊到底條路可以點行，佢仲話年中唔少人都 send Thank You Email 俾佢，但唔係個個都覆。雖然到最後小編都係選擇左入 Commercial World，但亦經過哩次獲益良多。

之所以點解用哩個故仔黎開頭，除左想話俾大家聽小編有幾勁之外（誤），就係想同大家講一樣野，每個人條路要點行，可以係千變萬化，不過如果有個明燈點一點條路，至少行少好多冤枉路。當然，就算行錯左冤枉路（小編都行過），咪當用時間買個教訓囉……

好啦，入正題，相信應屆畢業生有部分已經好似小編咁，揸住 N 個 Offer 唔知揀咩好，而其中最大嘅考慮之一就係各大企業嘅 MT Programme。不過記住一點，雖然捉到老鼠就係好貓，但係做到 MT 未必係好事，因為坊間有好多都係掛名 MT，名利不收。

唔知大家仲記唔記得小編有個朋友叫大隻仔，佢曾經做過百貨公司嘅人事部，後期佢上左總部做培訓，而其中一樣野就係要跟 MT 哩個大 Project。當佢第一年跟 MT 嘅時候，睇返以前記錄，然後佢發覺出事了，因為條 Team 換左幾代人之後，依家成個 Programme 除左一開波嘅入職典禮同埋 Orientation 之外，其他乜都無！？其後問一問經理，點知得返黎嘅答案係……

因為前線一直都請唔到人，所以每年就請一班 MT 嘅人返黎，然後就掉哂佢地落去舖頭到，幫補下前線人手不足嘅情況，順便美其名叫配合返公司文化，而且又可以俾佢地了解前線嘅管理……

「岩岩畢業出黎嘅後生仔，頂哂龍咪廿零歲仔女，要同前線班哥哥姐姐一齊搬搬抬抬，啲貨重到連大隻仔都要出盡食奶嘅氣力先可以搬得到上車推，而且讀左咁多書，結果同啲讀書唔太多嘅哥哥姐姐做同樣嘅野？無野下話？」

雖然小編都好想講上面嘅野，但係職業無分貴賤，而且人生哩樣野就好死嘅，Life is full of options，你有權選擇自己條路，但係既然你揀得，就要堅持落去，因為無論任何時候，你都係獲得嘅某啲嘅野，至於係咩野？可以係技能，亦都可以係眼光，甚至可以係待人接物嘅技巧，在乎你點樣去睇成件事。好似大隻仔公司啲 MT 咁，佢地可以獲得執貨同排貨嘅技能，亦都可以獲得審美嘅眼光，要對客嘅亦都可以訓練到自己到底點樣喺情緒低落嘅時候，仍然唔會問候顧客嘅母親，慢慢人亦會變得圓滑，為自己後續嘅人生鋪路，為自己嘅將來奠定基礎……而哩一切一切，都係在乎於三樣野，就係「態度」、「態度」同埋「態度」。（因為好重要，所以要講三次）

正如一開始小編咁講，你可以認為哩份工唔適合自己，搞到自己行緊冤枉路，但係與此同時，其實你已經知道左一份咩工會令自己反感，咁黎緊落去，就可以追尋一樣無咁反感嘅工作。

依家哩個世代無話讀書多就一定可以做舒服啲嘅工，總之要返工嘅你，就已經注定係悲劇嘅主角，問題就在於，唔好又要呻辛苦同人工低，但係又要留喺到繼續做，小編公司就已經成堆哩啲咁嘅同事，仲要個個做左 5、6、7 年。又要 Loop 返去，Life is full of options，唔滿意咪走囉，直行轉左撳 Lift 上 7 樓唔該，最衰嘅就係哩班 Old Seafood 完全無想去改變嘅意欲，結果令公司嘅士氣低到落腳扯尾。

重點如下：

作為畢業生嘅各位，睇清楚公司嘅文化同背景，然後諗清楚自己係咪真係想入哩間公司。無論真假 MT 都好，雖然人工可以差好多 K，但如果鍾意一間公司嘅模式，不妨試一試，反正你依家擁有嘅係青春，而且就算你點比，你都唔會夠含住金鎖匙出世嘅人咁有錢，因為佢地唔駛工作都可以過世，手上仲要揸住幾幢樓，你得嗎？所以不妨襯自己岩岩畢業頭 5 年，放下身段，好似舊海綿咁，吸得幾多得幾多，造就屬於你自己嘅人生。（注：即使放下身段，第一份人工都唔好低過 12K。）

最後大隻仔嘅故事結局就係，一聽到經理之後就發覺勢色唔對，然後即刻發奮圖強，搵返舊底嘅資料，睇下點樣重整 MT Programme，到最後……第一年跟嘅果班 MT 全部胎死腹中，經過一整年無任何培訓同活動，而且喺舖頭捱生捱死，有啲頂唔順嘅就喺半路走左，而頂得順嘅，士氣都無左一半……好彩地，經過大隻仔嘅研究，終於喺第二年開始有返起色……最後王子同公主們都可以喺城堡入面過住幸福快樂嘅生活。（笑）