千奇百趣履歷表

負責招聘既同事每日都收到唔少求職信同履歷。點樣寫一份好既履歷，我地以後可以慢慢探討，但以下收到既就一定可以突圍而「出」：

第一個要講既 CV 就係……你既經驗係無經驗？直接去片。

Mr Chan XXXXXXXX

Phone: 61234567

Address: XXXXXXXXXXXXX

Education:

XXX Higher Diploma         2017

XXX College                         2000 – 2006

睇到哩到都覺得無咩野，想打去俾佢架啦，不過繼續睇埋落去先。

Work Experience:             No Experience

欸？

每個人都經歷過 Fresh Grad 搵工既日子，雖然無工作經驗係事實，但無必要畫公仔畫出腸，出黎社會第一樣野要學既就係包裝自己，可以寫下其他經驗，例如上莊、學校搞下活動或者做下義工服務等，又可以搵下兼職，累積下經驗，但佢份 CV 寫住 No Experience 就真係第一眼就打個凸。

仲有既係…… 2006 年至 2017 年，成 11 年做過咩？依家都已經 2018 年嚕，又無做野，又無讀書，莫非去流浪？而通常叫得哩類應徵者黎到既答案都係：「噢，哩段時間幫屋企生意執頭執尾咁囉……」其實哩 D 都係經驗黎架嘛。

跟住睇下第二份 CV （應該話係求職電郵）果陣，我個腦只係浮現左一個問題：「你想申請咩職位？」

Subject: Looking for a job

Content: Hi I would like to apply for a job. Thank you! Hoping for your reply.

好彩你真係 Hope 下，想 Apply 咩工又唔講，連得果幾句野既 Grammar 都錯。

我地唔係職業介紹所，無時間去建議你申請邊類工作（雖然其實咁樣既 HR 應該會幾有挑戰性，可以真真正正做到 Staffing 既真諦）。

然後收到既係一個無 CV 無 Cover Letter 既求職電郵……

姓名：何先生

電話：6123 4567

工作經驗：6 年

↓或者係好似哩個電郵咁↓

申請侍應生

本人姓陳，申請廚師，請電：1234 1234，謝謝！

雖然近年大趨勢都係講緊唔駛 CV，不過最近收到越黎越多只係留低個名同電話既電郵。其實 CV 其中一個作用係唔想大家哂時間，又係果句：合則來，不合則去。如果你無 CV，我地可以做既只有 Ignore 或者打電話請你將 CV 電郵俾我地，亦都唔會增加面試機會。

做得 HR 既，一定曾經收過好似書咁厚既 CV，而小編亦都收過一份超過 20 頁既 CV，申請人將每份工作上既所有細節都詳細列出。可能佢真係經驗豐富，但我地當故仔咁睇，睇到第 4 頁都已經開始頭暈（其實睇到咁多，係咪已經好勁？）。

麻煩執 CV 既時候，諗一諗我地哩 D Hea 底 HR 睇既心情。

初心者至中階者 CV 最好唔多過 3 頁，當然 D 字唔好密密麻麻，列出重點就可以了，除非你見緊設計師，如果唔係份 CV 最好唔好太多花巧野（適當既花巧可以突圍而出）；高階者的話，都打滾左咁多年，自行決定吧。

最後睇緊一份係好禪既 CV，亦係我入行以來，收過最弔詭既 CV，直頭有洗滌心靈既感覺。

準備好未？

.

3

.

2

.

1

.

去片

特別的履歷

這是一份履歷，也不是一份履歷。不論是甚麼，反正是特別的。既然是特別的，不妨看完再說。當你看到這句話，相信你已經感覺到某種與眾不同。這份履歷不會說我的背景和經驗，因為我認為最重要的是思想。一種思想，或者一句說話……（ 下刪 1,000字）

老實說，望住哩份 CV 我無咩好講，好似睇緊 TBB 既遺書咁。我諗我應該未去到咁高 Level，可以同哩個哲學家溝通到，因為我覺得選擇見唔見一個申請人，第一步一定係睇你 CV 上面寫係背景同經驗，同埋到底你識 D 咩，最好就係一上崗就即刻可以 pick up 到工作上既野，又可以同到其他同事溝通同夾得到，反正大家都係扮工一族。反而搵男、女朋友的話，我都認為最重要的是思想。一種思想，或者一句說話……（下刪 1,000 字）

再見到哩類 CV 我真係想將個申請人折斷，哂大家寶貴既時間，大家都知秒秒鐘幾千萬上落，分分鐘俾我中左個六合彩就可以第二日 No Show 架啦嘛，日返 9 粒鐘，俾 D 時間我 Hea 下好嘛，咁多位大佬？

祝各位可以請到合適既人才。