到底咩先叫一個正常嘅應徵者？（下）

除夕嗰晚俾獨獨問左咁多關於見工嘅野，其實無非都係想問一句「到底僱主點先會請我」，而僱主考慮請唔請一個人，當中有好多原因，亦都同空缺嘅 Level 有關。

前線或者係主管級以下職位

1. 期望薪金及可到職日期

喺考慮哩一類嘅職位空缺時，第一樣野就會睇到底開幾錢人工，同埋可以幾時返到工。因為哩一類嘅工作相對黎講，流失率都會大少少，所以當拎起一份 CV 嘅時候，小編會即刻碌到落最底，睇下應徵者寫嘅人工同可到職日期，只要見到開嘅價岩部門 Budget，而又可以即時返工嘅話，小編都會眼前一亮，最低限度會喺份 CV 停留多一秒。

2. 背景 & 經驗

其次就係考慮返，到底喺應徵者嘅工作生涯當中，所負責嘅 Duties 同埋所擁有嘅經驗，對公司招聘嘅哩個職位有無用，因為好多時候前線或者係主管以下職位，僱主梗係希望可以個應徵者請左返黎，一放佢埋位就識自動自覺做野，一來慳返好多培訓嘅時間，二來亦有機會可以帶到其他公司嘅經驗返黎 Brainstorming 一下點樣去改善一下個 Business Process，有時候喺做所謂 Business Process Re-engineering (BPR) 嘅時候，哩一班外來人嘅經驗都可以令成件事加速唔少。

雖然背景同工作經驗係其次睇嘅野，但重要性唔代表比較低啲。最主要原因就係喺職場上打滾左一段日子，大家都知份工大約幾錢，開出黎嘅人工都唔會差太遠；而一般通知期都係一個月，所以可到職日期多數都會係一個月後。當期望薪金同可到職日期都差唔多嘅時候，就要睇下到底個 Background 同經驗邊個優勝啲，與此同時，亦唔可以請一個太勁嘅應徵者，因為同時要考慮 Staff Retention 嘅問題，有可能公司長遠未必俾到應徵者想要嘅野，到時又係哂左時間。

主管級或以上職位

基本上上述考慮嘅兩個因素都係調返轉，即是會先睇背景以及相關嘅管理經驗，因為哩一個級別嘅職位都係牽一髮動全身，如果無必須元素嘅話，除左哂左時間之外，亦好大機會影響哂現有嘅公司士氣、文化，甚至業績等。所以就算對方通知期要 3 個月，只要有齊公司所需人材嘅條件同埋元素，同時又係 Within Budget 的話，3 個月亦都會照等。

好啦，正如之前同獨獨咁講，其實一個應徵者只要正正常常就好大機會會請，咁到底點先係一個正常嘅應徵者呢？

基本黎講就係 Make Sense！當 Common Sense 不再 Common 的時候，小編已經開始懷疑緊人生……

成日睇戲都可能有啲情節，係無啦啦主角明明無學歷無經驗，但係突然會俾某上市公司主席睇中左，然後個主角就無突然變左公司嘅一個經理，繼而成為公司下任接班人……小編唔敢話現實生活無，不過係唔係你就唔知道，所以申請職位嘅時候，要睇返到底自己嘅背景同嗌價合唔合乎公司要求。咩叫正常？就係唔會一個不停係咁轉工轉足兩年，而平均每一份工都唔夠三、四個月嘅侍應，去 Apply 一個主管嘅職位，然後嗌價 3 皮。

面試嘅時候，禮貌以及基本談吐都係好重要，「唔該多謝不離口」就好似「去完廁所要洗手」一樣，小編幫你安排時間面試、開門、撳升降機、拎杯水俾你飲、印野、送你走……幫你做咁多野，一句唔該都無，面試途中仲要成個大爺咁自吹自擂、得吋進尺，係咁話小編間公司啲福利比唔上舊公司，哩一類應徵者直頭令小編想將佢由 Sky100 扔落街。

識睇氣氛亦都係非常之重要，除左面試之外，正式 Onboard 之後亦要睇清楚。簡單啲，姐係做人嘅藝術，適當嘅時候做適當嘅野。切身少少嘅例子，除夕晚上親戚食飯，一直係咁 Jer 住人關於工作上嘅野，連其他人插唔到嘴都睇唔到，哩樣亦係一個敗筆。

有時候，小編已經分唔清楚咩叫正常，咩叫唔正常，因為實在經常發生，簡直係 Common 過 Common Sense。不過咁，人夾人緣，有啲腦細偏偏就係鍾意哩一類人。

講到底，請唔請一個人，其實都係得一個字，就係緣！