真．真假 MT Programme

好啦，上個禮拜小編已經好勵志地叫大家最緊要保持好自己應有嘅態度，相信大家唔理係畢業牛定係打左幾年工嘅老牛，應該都有反思過自己態度上嘅問題啦掛（小編真心希望你有啦）？咁哩個禮拜就俾返少少詳細資料大家，等大家有返個心理準備。

相信差唔多每個人都經歷過搵工嘅日子，除非你係由爸爸、媽媽幫你搵工，或者係幫屋企人打理生意，自己 Un Un 工坐喺到就有工開，如果唔係都一定有哩種經歷。每年最受大專生歡迎嘅空缺正正就係 Management Trainee，而好多大公司亦都會去各大專院校搞 Recruitment Talk，從而吸引大量求職者應徵 MT 哩個位。之不過咁，到底哩個 MT 位有咩吸引力？

1. 入職薪金相對較高

唔計上個禮拜提過嘅名利不收嘅假 MT，一般銀行、跨國企業、本地上市公司等等嘅 MT 職位，起薪點都係由 20,000 蚊開始，最低限度都比一般大學生平均起薪點嘅 15K 高 3 分 1，尤其是對唔係專業資格嘅商科畢業生有一定嘅吸引力。（咩叫專業資格？簡單啲黎講就係有得考牌嘅，例如會計師、醫生、飛機師等等。雖然小編作為一個喺香港嘅專業 HR，但好可惜都唔算係有專業資格……）

2. 升職快

MT Porgramme 一般為期 1 – 2 年，而哩兩年期間，差唔多每 3 個月至半年時間，就會將你調去唔同嘅部門或者 Team 去實習，要求你對公司一啲主要範疇同職能都有一定認識。而順利完成 MT Programme 嘅 MT 仔女，外加少少運氣同際遇，已經半隻腳踏入管理層道門（去到哩個階段，可能只係中層，但都已經快過一般人好多），成為被 Succession Planning 考慮嘅人物。講升職，其實到最後都係講返 $ 字，話到明管理層，人工梗係有返咁上下。

3. 其他福利

除左 $ 之外，又點少得其他福利，假期、保險、退休金額外供款就唔駛講，有啲公司更加會 Offer 一啲大部分人夢寐以求嘅福利（真係只有某啲公司……），就係唔駛首期買樓！！！丫唔好意思，小編嘅意思係公司會借足錢俾你……當然，如果你真係借左，個 Rate 雖然極唔錯，但係你就唔駛諗話轉工嚕……如果一切順利，你又會比其他人更快成為一個「成功人士」，即係又上左車，又有高薪厚職。真係快人一步，理想達到。若要成功，不須自宮，不論男女，達到者均可隨工贈送傾慕者 N 位。當然，出到咁嘅 Offer，要求一定唔會低，每年幾千人應徵，過五關斬六將，最後得大約十個人順利入職，唔係精英都唔駛諗。想當年，好似小編哩啲咁普通、成績又只係一般嘅學生，一早打定輸數，哩啲工唔會關我事……（講笑，只係無咩興趣做 MT……）

講返依家，如果有留意開香港嘅勞動市場，都會發覺依家啲公司都係鬥搶人，畢業生當然唔例外，都係要搶，所以衍生你的兒科專家……（利申：仲未有公司俾錢搵小編做植入式廣告，只係突然諗起哩首歌 XD）……所以衍生左越黎越多 MT Programme，不論規模大小，都會整返個 MT Programme 出黎。無他嘅， MT 哩個位咁受歡迎，巧立名目就可以吸引多啲人申請，多啲人入職，何樂而不為？

上面都講過，大部分 MT Progarmme 都存在住 Rotation 哩樣野，等班 MT 涉獵多啲唔同領域嘅野，從而將來成為管理層之後，可以真正成為一個合格嘅領導人物；之不過有啲 MT Programme 一睇就知流野，一入職上左個幾兩個禮拜堂，跟住就叫你決定入邊個部門，然後就會一路喺同一個部門，你可能仲會發覺你嘅工作安排、福利，以及待遇等等都同同部門唔係 MT 入黎嘅同事無分別，唯一有分別嘅就可能只係你嘅人工高佢少少咁大把，而哩個情況亦有機會只係維持一兩年左右，因為其實從來無人 guarantee 過你嘅人工升幅一定高過其他人。再者，如果同事嘅 Appraisal 好過你，分分鐘人工仲加得高過你，跟住你哋嘅人工又會好快差唔多。結果過完一年嘅 MT Programme，好多時候都未必有你期待嘅畫面出現，最後只會繼續留喺同一位置，升職嗰陣同其他非 MT 出身嘅差唔多。

都係嗰句，為自己後續嘅人生鋪路，為自己嘅將來奠定基礎，「態度」、「態度」同埋「態度」都係好重要的……

P.S. 如果有幸成功被取錄為成 MT，如果情況許可的話，最好完成哂整個 MT Programme，試諗下，如果你喺一個 2 年嘅 Programme 入面只係完成左一年，你去新工面試嘅時候，對家一定會懷疑你點解中途辭職（除非你轉行啦）……當然，情況唔許可的話就無辦法了，早走早著啦。 ; P