到底咩先叫一個正常嘅應徵者？（上）

上個禮拜大除夕，小編同屋企人，同埋幾個親戚一齊喺一間情調幾好嘅餐廳食除夕大餐。由於小編都係第一次見啲親戚，所以大家都介紹左自己一下先（唔知點解成個 Feel 就好似 Speed Dating 咁），點知其中一個親戚獨獨（年紀比小編細幾年），一聽到小編係 HR，就係咁問問題，起初都無咩野嘅……

獨獨：阿 Hea，你做 HR 咁勁呀？係咪平時都係負責請人架？請開咩人？

小編：哈哈，平時都有請人嘅，不過其他 HR 嘅野都有負責嘅，例如培訓、薪酬福利之類嘅野都有做開，至於請人方面，主要都係請前線嘅同事為主啦……

獨獨：噢，咁一定有好多有趣野啦……

小編：有趣呀？都有嘅，有時會遇到啲怪怪哋嘅應徵者嘅……

（正當小編個腦 Load 緊有咩得意野嘅時候）

獨獨：有無例子呀？

小編：Um……有次試過個應徵者見見下工無啦啦電話響，而佢又真係拎起個電話黎聽，仲話自己見緊工，跟住幾個經理望住佢講完個電話，先再繼續面試。

獨獨：嘩，咁都得？仲有無其他得意野？

小編：Er……有次試過有個應徵者見文職，但話耍套拳我睇下咁囉……

（本身小編記憶力好似金魚咁得幾秒，有時連自己嘅經歷都要問下隔離嘅同事，哩個 Moment 仲要問小編 In 過咩有趣野，點記得咁多野呀？）

獨獨：噢……咁其實你哋見一個人點先會請？同埋其實成個面試程序係點架？點解你哋 HR 見完，先到部門經理見嘅？咁點解要見你哋嘅？

（連發幾條問題，小編開始有啲唔耐煩）

小編：睇情況啦，例如前線同事為例，主要睇佢正唔正常，好大機會正常嘅都會照要架啦，畢竟依家請人都艱難，所以見過談吐 OK 嘅話，都會 Pass 俾部門經理過一過目，畢竟 User Department 都係佢哋。至於 HR 哩個情況下，都 Screen 下睇下個應徵者基本 Background 岩唔岩 User Department 用，例如以前做過嘅工作、經驗、人工同埋可到職日期等等，畢竟部門經理主要工作都係要做返佢哋部門嘅工作，所以哩個工作就會率先由 HR 幫佢哋節省時間。

獨獨：咦？咁如果正正常常都要，咁同一時間有幾個正正常常，係咪個個都要？

小編：咁都要部門經理睇岩嘅，畢竟都要同佢夾得到，又要睇埋佢哋部門嘅 Budget……

獨獨：你哋 HR 會睇啲咩條件先決定俾部門經理見架？

（又黎？頭先咪講左囉？似乎答唔岩獨獨心目中嘅答案。好！小編再黎過！）

小編：Er……就好似岩岩講過嘅，第一樣野就睇個應徵者正唔正常先啦……（下省一百字，將頭先嘅野包裝下又再講返出黎）

獨獨：咁咩先叫正常？可唔可以俾啲例子黎？

（喂呀！又俾例子，小編好似返左去以前會考年代，咩都要俾例子！可唔可以俾小編 Hea 下帶過左就算呀？）

小編：Er……姐係唔會奇奇怪怪咁，至少講到兩句自己以前嘅工作經驗，談吐正正常常，畢竟只要講嘅內容唔係太離譜的話，都唔會太斟酌講過嘅內容。

獨獨：噢，原來係咁……（突然好憤慨咁講）係喎，有時又未必係 HR 見應徵者，有次我見工直接見部門經理，不過佢好串，做完一輪 Test，然後就直接話我其實只係識好皮毛嘅野，完全唔符合佢哋要求。

小編：係架，有啲公司未必有 HR，所以就由部門經理直接見。既然佢話你只係識得好皮毛嘅野，咁你見完工之後就去搵資料，學左佢話你唔識嘅野，見多幾次工，你就知哩一類工作到底要識啲咩……（下省一百字）

獨獨：我唔係話學唔到野嘅，見工都可以學到野嘅，不過點解佢哋要咁串喎？

（小編一直拎住刀叉，望住塊羊架郁都未郁過，就黎凍哂啦！）

小編：我都唔知喎……不過咁，一樣米養百樣人（辦公室金句王又黎料），有啲人係咁串架啦，有時候佢哋又真係串得起嘅，因為佢哋有料。如果受唔住，就算俾你入到間公司你都唔開心啦，所謂面試，除左係僱主觀察緊應徵者之外，都係應徵者觀察緊間公司同埋個經理，睇夾唔夾得到……

（身邊嘅屋企人、親戚全部靜哂咁聽住我哋嘅對話，但係一啲都插唔到嘴）

獨獨：咁如果本身識個 HR，會唔會增加成功嘅機會架？靠關係係咪易入啲？係咪唔駛見個 HR，直接俾部門經理見？同埋會唔會睇樣架？姐係靚仔啲會唔會易啲請？

小編：睇情況啦，不過話哂識嘅，都應該幫你講幾句好說話，不過循例都要見一見嘅；至於靚唔靚仔，都係睇情況啦，如果做前線要見客嘅，靚仔啲點都有著數，但當然啦，唔通我會話因為你唔夠靚仔而唔請你咩？

（小編開始應付不了……）

屋企人：咦，塊牛扒又幾好食喎……

（因為講左太多野，小編一直係咁飲水，所以哩個時候，侍應過黎幫手斟水…… ……）

小編：有無咁好食呀？試啖……係喎，又真係幾好食……

（眼見獨獨想繼續問有關見工嘅野！）

小編：今日大除夕咁開心，不如我咃只談風月，不談工作！

（最後，小編終於可以開始食眼前嘅羊架……）