千奇百趣 Interview 之 耍套拳黎睇下先啦

年尾啦……Woo~~ 咁又一年，距離退休又邁進一大步！！！預祝大家新年快樂！！！

最近天氣終於變返真正嘅冬天咁，一方面覺得幾爽，另一方面又搞到小編好懶，連寫都唔多願寫多兩句。XD

舊時啲人走去見一份工，都會問個應徵者識啲咩，同武打有關係嘅工作，可能都要個應徵者「耍返套拳」黎睇下先。不過小編真係估唔到去到依家哩個年代，見位普普通通嘅水電工都咁非凡，竟然話想耍套拳俾小編睇！

話說臨近年尾，小編公司出左 Post 請 Technician，入黎嘅申請都有小貓三四隻，睇返份履歷，全部都好似唔錯咁，所以都約佢哋上黎見一見個面，話哂一睇岩就轉個頭俾 Offer 約返工嚕。

其中一個應徵者拳輝，約到上黎就開始面試嘅過程：自我介紹、講下自己以前嘅工作等等。聽左一陣，小編想知道除左份履歷上面寫嘅工作之外，拳輝仲有無其他隱藏技能對公司有用。

點解會咁呢，因為小編亦都深知好多時候，履歷都未必真真正正反映得到一個應徵者嘅所有野。諗深一層大家都明白，一生人流流長，幾隻字又點樣講得哂。所以你當小編想知道更加了解拳輝又好，當小編衰多口又好，循例都會問一問佢有無其他履歷表上面無嘅野。

「Um……我後生嘅時候就學過下拳嘅，依家都仲有打開架，駛唔駛我耍返套拳俾你開下眼界？」

欸？大獲！凍得制搞到小編表達得唔係太好，問得唔好搞到拳輝誤會咗！！所以隨即就同拳輝講話唔駛啦，雖然小編都想睇下耍拳，不過一來面試間房咁細，耍起套拳應該會拆哂間房嘅野，而且小編都係想知會唔會有其他技能可以幫到公司，所以就拒絕咗。最後都見到七七八八，都覺得拳輝幾好，循例打埋俾個部門經理上黎見一見……

雖然拳輝突然間咁爆話耍套拳俾小編睇下，不過同時又可以緩和下面試嘅氣氛都唔錯，同埋傾落都覺得拳輝都係一個正常人，又有恰當嘅技能，Why not have a try？