Side Effects

本來今個禮拜已經諗好左題材，再寫下平時面試遇過嘅搞笑野，不過碌碌下 Facebook 嘅時候，碌返以前睇過嘅一段短片《Side Effects》，所以都係想轉一轉今個禮拜嘅 Topic。

 

每一個年青人一定都會經歷過最少一個黑暗嘅時期，當下會突然覺得迷茫，唔知每日嘅目標，日日只剩下返工同放工，拖住疲憊嘅身軀返到屋企，對住屋企人、伴侶，有時候甚至會忍唔住將工作嘅壓力發洩喺佢哋身上，事後諗返雖然明知唔岩，但係又唔知點解不自覺地會做出哩種行為，然後又會反覆地覺得好內咎……

可能喺哩一個時空下，睇緊哩篇文嘅你，正正就係遇到哩一個週期，有一種好迷茫嘅心情，唔知人生哩條慢慢長路點行落去。工作上嘅唔如意，覺得不受上司賞識，升職又唔輪到你，加人工又只係每年按通漲加最多 4 %，然後仲有三、四十年工要返；感情上嘅唔如意，單身嘅你一直都遇唔到理想中嘅伴侶，可能直頭係仆街磁石，又或者拍拖好多年嘅你，發覺感情已經變淡，唔識得點樣重拾熱戀時期嘅感覺，考慮緊到底應唔應該同對方繼續行落去，定抑或係選擇分手收場……

明明只係想世界無咁多罪案，社會上唔會有咁多不公，平平淡淡咁有一份工作，放工返到一個溫暖嘅屋企，享受天倫之樂，甚至可能只係睇住電視咁，同自己鍾意嘅人坐喺沙發上面食雪糕，已經係一件好幸福嘅事，但偏偏唔知點解哩個世界係咁嘅樣。漸漸你了解到，哩個世界有咁多紛擾，其實亦係源於人類。有人類嘅地方，就會有猜忌、爭權奪利、為一己私慾而剝削其他人。慢慢開始，你對哩個社會失望，對世界失望，對人類失望……

哩一刻，可能你會有一種諗法，就係輕生嘅念頭。

小編想對咁樣嘅你講一句：You never walk alone……你身邊唔係得你一個，最起碼仲有小編喺到陪住你……

好多人都會覺得一間公司嘅 HR 無咩用，又未做過前線，但又偏偏負責幫前線請人同培訓人，而且出糧又可以俾返會計做，最多就係識多少少勞工法例。不過小編認為其實 HR 亦擔當一個好重要，好似一個大哥哥、大姐姐咁嘅角色。所以小編以前培訓嘅時候，都會同同事講，每當佢哋每論喺職場上定係私事上遇到唔如意嘅事，即管打上黎搵小編傾下分享下。當然，一部分原因係心情影響工作表現，另一部分原因就係大家日對夜對，除左返屋企嘅時間外，其餘時間就係對住哩班同事，某程度上關係可能仲密切過屋企人。

 小編唔會講咩退一步海闊天空，瞓一覺明天會更好，小編會靜靜地聽你講，聽你分享你嘅難處，因為好多時候，你需要嘅唔係一個解決方法，而係一個願意聽你講野嘅樹洞。