叫腦細加多啲人工（二）

其實香港地嘅職場真係好犯賤，點解咁講？喺香港返工，就算你日日無遲到無早退，生生性性跟足上頭指示做野，你嘅升職機會都唔會變多。老實咁講，公司架構同人員編制無變，除非公司托展業務，如果唔係你都要等，等到上面班友自己走或者退休，先有位俾你升。至於人工，做新人嘅時候，老海鮮成日都會叫你諗下，自己 5 年後或者 10 年後，會去到咩位，依家不如你開始計下到底 10 年後你會賺幾錢人工？每年加得 4% 都唔知有無，當你依家 2 萬出頭，每年加 1 千蚊唔夠，仲未計你個職級有頂薪，諗諗你有幾耐先成位「中產」（利申：絕無「中產」抽水成分）？

經常有一句就係「魚唔過塘唔肥」，想升職加人工？得，扭下 Pat Pat 先啦，因為你唔扭，就會跌返入剛才講嘅循環。切記，扭都要扭得有學問。

第一，一定要陰啲陰啲咁話俾腦細知，依家你唔妥個價錢，或者係工作與薪金不相乎，俾佢知市場情況，俾佢知平時你有幾辛苦，俾佢知你隔離個蛋散唔做野但同你一樣人工。前題係一定要陰啲陰啲咁俾佢知，因為腦細請班人返黎幫佢做野，就係因為自己唔想做，如果掉返轉頭請左班人返黎，反而仲搞到佢做多左野，或者日日怨哩樣怨嗰樣，佢又點會幫你呢？

第二，就算唔妥份工都好，都要俾返少少衝勁同埋正面嘅思想黎睇下，少少得架啦，因為有邊個返工會返到咁正面？但最低限度俾人睇你係尊重自己、尊重份工。試諗下，如果你嘅手下日日都話份工差，想過檔轉行嘅話，第一樣野你諗嘅一定係「又話差？咁你又唔真係走？你走左，我仲慳返筆代通知金！」所以你成日都會聽到啲老海鮮經常同啲新人講份工幾難頂，個腦細幾有問題，但佢自己就留喺公司做左廿幾三十年，其實佢地都係扭緊 Pat Pat，博新人走，然後提高流失率，證明哩個位置值得更高人工，與此同時證明自己嘅忠誠程度。

第三，間唔中扭下就得，因為如果你日日扭，變相腦細會覺得你其實都有心走，反正都留你唔到，由你走，即刻私底下搵相熟嘅獵頭請你個位返黎，到佢搵你傾計嘅時候，唔止無得升職加人工之外，其次你嘅情況就會被迫到入去二選一、去或留嘅境地。

最後，記住凡事一定要留有後著，如果決定要行扭 Pat Pat 哩一步，記住要睇定市場有咩岩心水嘅工，或者決定離職後嘅計劃，因為凡事都要向壞嗰方面諗，畢竟世事永遠未如理想。

講起扭 Pat Pat，小編喺一個做培訓嘅朋友 A 嗰到聽返黎（哩位朋友都係經大隻仔先識）。話說個朋友 A 喺一間大公司做左幾年，都叫做到悶悶地，想轉下新環境，所以佢本身就無意扭 Pat Pat，直接遞信裸辭，咁經理循例都見一見佢。哩位朋友 A 諗住無論你開咩條件都唔會留低架啦，不過都即管聽下講咩先。

經理：「做咩咁突然呀？」

朋友 A：「其實都 Plan 左好耐嘅，都做左幾年，都係時候轉下新環境，出去吸收下唔同嘅經驗。」

經理：「其實我覺得你性格都幾適合做 Audit，有無諗過轉過去 Audit 個部門做呀？」

（朋友 A 其實同 Audit 部門嘅同事都幾熟下，每晚眼見佢哋有開工無收工，做到死下死下咁，又知佢哋嗰邊 Short 緊幾個人，經理實係想搵佢填返個空位，所以堅決拒絕。）

朋友 A：「Um……暫時未有哩個諗法啦，都係想做返培訓或者 HR。」

經理：「噢……哈哈哈……咁呀，你依家幾錢人工？」

朋友 A：「岩岩升左一個 Point，依家 HK$18,000。」

經理：「噢……咁呀……你搵到工未呀？」

朋友 A：「未開始搵呀，反正之後多啲時間，見工嘅時間易就啲。」

經理：「咁不如你放住假先啦，咁岩依家公司 Cut headcount，唔可以再喺出面請哩個位，你當係坐住哩個位先，反正你又可以準備下搵新工見下。」

朋友 A：「我諗唔啦，都想順便抖下……」

最後朋友 A 除左調部門同放假之外，經理再無俾其他 Counter offer 佢了……

隔多一兩日，同朋友 A 一樣職位、一樣人工嘅朋友 B 都遞埋信，不過哩次經理問完佢人工之後，就叫佢等多 3 個月，然後會升佢做 Senior。當然，最後朋友 B 真係等多左 3 個月，而最後又真係俾佢升左做 Senior，不過過多一年都係堅決離開了……

朋友 A 可能工作上無朋友 B 做得咁好，不過最大嘅 Point 就係遞信嘅先後次序，姑勿論朋友 B 本身只係想扭 Pat Pat 又好，定真係想走都好，結果係佢可以食住朋友 A 嘅離開，突然令自己嘅價值暴增幾百倍。

其實只要搵岩時機扭下 Pat Pat，升職加人工嘅機會離你不遠矣。