CV 的問題

關於 CV 嘅問題，首先唔好問點解哩個年代都仲需要 CV，有啲地方可能真係唔會睇，但有返啲規模嘅公司又或者見嘅係文職工作，申請嘅時候都需要提交 CV。依家好多時候對 CV 嘅要求其實已經降到非常之低，但有啲情況依然令人覺得好無奇……

1) 資料錯誤

收到個 CV，想打俾個求職者約時間面試，點知嘟都未嘟，就已經彈一句「此電話號碼並無登記」。好彩 CV 上面有佢個電郵地址，有多過一個聯絡方法真係值得讚一讚哦~ 最後終於用電郵成功聯絡到個求職者，佢亦都證實咗 CV 上面個電話號碼打錯咗。雖然好似唔係咩大件事，而最後亦都順利搵到佢，但係好多人，包括你嘅未來腦細都有好大機會，對哩啲基本資料會出錯嘅人無咩好感。記住記住千其唔好衰喺打錯字上面！

2) 異常多的工作經驗

講緊嘅係畢咗業五年，做過二十間公司，每一份工作都唔超過六個月。如果哩啲工係屬於短期合約或兼職，麻煩大家幫下自己，喺 CV 上面註明返。但係細心啲再睇下份 CV，求職者係一份接住一份嘅長期工作，但無一份可以返多過六個月！小編好同意每一個人總會遇到人生嘅低潮，甚或乎只係某啲公司你係連 3 個月都頂唔順（正所謂天下烏龜一樣黑，畢竟十間公司好大機會有九間都係咁難頂），但點都有一兩間比較上無咁難頂，可以令你堅持到一年掛？如果唔係，可能要諗下自己有無揀錯行業……雖然依家行行都缺人，搵唔到人嘅公司最後可能都迫於無奈會揀啲唔係咁理想嘅 Candidate，但當市道唔好嘅時候就未必有哩枝歌仔唱啦。

3) CV 要Update 哦

你可能覺得 Update CV 無咩意義，但返工絕對可能有更多無意義嘅野要你做。既然寫得 CV，即係某程度上無可奈可之下要返工，咁不如行多一步。最誇張係試過收過一份 CV，最後嘅工作係 1995 年！小編成個部門都唔肯定個 Candidate 係由 1996 年之後唔記得 Update 份 CV，定抑或係 1996 年開始去咗流浪，無返過任何工。其實份 CV 有最 Update 嘅資料，係可以令大家嘅工作容易啲，等工作上可以有更多時間做啲更有意義嘅事，生命變得更美好。

4) CV 係咩黎架？

不解決……相信大家就算唔想寫，唔同意要寫都好，都唔會唔知係咩黎。就算你未聽過都可以問下朋友，或者喺網上搵到資料。不過小編又真係試過遇過有人直接問：「咩係履歷？即係乜野黎架？」

註：同語言無關，哩位人士無論係 CV、履歷、Resume 都未聽過……

那，先旨聲明，小編完全無任何歧視成份，只係如果未聽過係咩黎，依家你聽到啦，自己去搵一搵到底係咩一回事……謝謝。