又黎性騷擾？

最近又收到一單投訴……其實小編有時都幾怕收到投訴，因為處理投訴嘅程序好多時都好繁複，最重要嘅係你會經常懷疑，到底要點做先岩。因為好多時候個情況係會令人覺得好似無論點決定都唔多妥。

今次單投訴嘅主角，一位係服務左公司差唔多成十年嘅中年男同事，而另一位係近幾個月放假先黎做下兼職，搵下零用錢嘅年輕女大學生。公司除左男女休息室之外，仲有一個公共休息室，俾啲同事睇下電視雜誌、上下網、食下野咁。

話說個女學生幾個月前開始就喺我哋公司返工，工作上都有唔少機會接觸嗰位中年男，而佢哋平時返工有時間都會傾兩句，而女學生就覺得中年男好似長輩咁，教下佢做野，又會提佢第二日返咩更。前線嘅同事喺少啲客嘅時候，都會分批去公共休息室抖下。

有一日，哩位中年男同女學生一齊去到公共休息室抖下，而咁岩個公共休息室又未有其他同事，中年男一去到休息室就坐左喺其中一角張梳化到玩手機，而個女學生就坐喺另一角睇電視，大家都無交流。隔左一陣，女學生眼角好似見到個中年男喺到摸自己下體。女學生以為係自己錯覺，加上因為禮貌嘅關係，唔敢直接望過去睇清楚中年男做緊咩，唯有繼續扮睇電視。又隔多一陣，唔知咩原因，個女學生直覺上覺得越黎越唔舒服，於是佢企起身諗住離開休息室。點知中年男見到女學生起身，佢又即刻跟住起身，仲一路向住女學生方向行過去，一路講：「我下面好辛苦，你可唔可以幫下我？」女學生嚇到即刻頭也不回地跑出休息室。聽到哩到，小編開始覺得精彩過 TBB 嘅劇集。心諗其實個中年男同事係咪會錯意？以為人哋肯同佢傾兩句計就唔抗拒？定抑或係個女學生等錢駛，特登屈中年男？

首先小編要利申，雖然平時小編都好想 Hea，但係遇到哩種事，一方面係職責上，而另一方面道義上亦會義不容辭地幫忙。而事實上職場上嘅性騷擾案件多不勝數，大大小小咁差唔多日日都發生緊，如果大家喺職場上遇到性騷擾，應該點樣做呢？尤其是遇到好似哩單投訴咁，假設女學生真係被性騷擾，但係個休息室得兩丁友，口同鼻拗咁，係咪就應該啞忍呢？絕對唔係！職場上嘅性騷擾，可以選擇同 HR 投訴嗰位性騷擾人嘅同事，亦都可以去平機會投訴。而根據情況嘅不同，亦可以選擇報警。

《性別歧視條例》中指出，對一名女性提出不受歡迎的性要求，或提出不受歡迎的獲取性方面的好處的要求；或就一名女性作出其他不受歡迎並涉及性的行徑，而在有關情況下，一名合理的人在顧及所有情況後，應會預期該女性會感到受冒犯、侮辱或威嚇；或如自行或聯同其他人作出涉及性的行徑，而該行徑造成對該名女性屬有敵意或具威嚇性的環境，該人即屬對該女性作出性騷擾。「性騷擾亦包括作出不受歡迎並涉及性的行徑，以營造一個在性方面具敵意或具威嚇性的工作環境，例如：說出與性有關的言論或笑話；展示與性有關的不雅圖片或海報；對別人的性別作出侮辱或嘲笑；挑引性地吹口哨。」（引用自http://www.clic.org.hk/tc/topics/antiDiscrimination/sex_discrimination/q4.shtml）

公司處理性騷擾其實亦都需要非常之慎重，因為有可能要為員工所犯嘅錯失而負上法律責任，亦即是平常所講嘅「轉承責任」。所以有唔少公司會喺迎新會，亦都會定時定候就安排講返受到性騷擾嘅處理方法，同埋個人需要負上嘅法律責任等。而哩啲嘅講座一般都係硬性規定所有員工必須參與，此舉除左係因為法例上要求之外，亦都係為左防止有疑似性騷擾事件發生時，等同事亦都認識可以點樣去處理，而最大嘅原因係為左防止件事矛頭直指公司無做任何預防措施。

Hea 爆冷知識：

雖然小編未接觸過投訴上平機會嘅案件，不過亦聽過一啲同行處理平機會案件，所以就喺哩到同大家分享一下。

如果發生性騷擾事件，一定要用文字清晰記錄低性騷擾嘅詳情，包括日期、時間、地點同經過等等，因為平機會只接受書面投訴，如果書寫有困難，平機會亦可以提供協助。而提交左投訴書之後，處理投訴可能需要歷時一段長時間，而期間亦有可能有需要作出書面上嘅一啲資料補充等。不過咁，遇到性騷擾，記住唔好啞忍，如果唔係可能會有下一個受害者。

如果你發現身邊有人受到性騷擾或者係其他形式嘅歧視，可以參考平機會嘅處理投訴程序同調停。

平機會處理投訴及調停：http://www.eoc.org.hk/eoc/graphicsfolder/showcontent.aspx?content=complaint%20handling%20procedures

記住，不可一，不可再。