0o HR 扮工週記 o0

又黎性騷擾？ 最近又收到一單投訴……其實小編有時都幾怕收到投訴，因為處理投訴嘅程序好多時都好繁複，最重要嘅係你會經常懷疑，到底要點做先岩。因為好多時候個情況係會令人覺得好似無論點決定都唔多妥。 今次單投訴嘅主角，一位係服務左公司差唔多成十年嘅中年男同事，而另一位係近幾個月放假先黎做下兼職，搵下零用錢嘅年輕女大學生。公司除左男女休息室之外，仲有一個公共休息室，俾啲同事睇下電視雜誌、上下網、食下野咁。 話說個女學生幾個月前開始就喺我哋公司返工，工作上都有唔少機會接觸嗰位中年男，而佢哋平時返工有時間都會傾兩句，而女學生就覺得中年男好似長輩咁，教下佢做野，又會提佢第二日返咩更。前線嘅同事喺少啲客嘅時候，都會分批去公共休息室抖下。 有一日，哩位中年男同女學生一齊去到公共休息室抖下，而咁岩個公共休息室又未有其他同事，中年男一去到休息室就坐左喺其中一角張梳化到玩手機，而個女學生就坐喺另一角睇電視，大家都無交流。隔左一陣，女學生眼角好似見到個中年男喺到摸自己下體。女學生以為係自己錯覺，加上因為禮貌嘅關係，唔敢直接望過去睇清楚中年男做緊咩，唯有繼續扮睇電視。又隔多一陣，唔知咩原因，個女學生直覺上覺得越黎越唔舒服，於是佢企起身諗住離開休息室。點知中年男見到女學生起身，佢又即刻跟住起身，仲一路向住女學生方向行過去，一路講：「我下面好辛苦，你可唔可以幫下我？」女學生嚇到即刻頭也不回地跑出休息室。聽到哩到，小編開始覺得精彩過 TBB 嘅劇集。心諗其實個中年男同事係咪會錯意？以為人哋肯同佢傾兩句計就唔抗拒？定抑或係個女學生等錢駛，特登屈中年男？ 首先小編要利申，雖然平時小編都好想 Hea ，但係遇到哩種事，一方面係職責上，而另一方面道義上亦會義不容辭地幫忙。而事實上職場上嘅性騷擾案件多不勝數，大大小小咁差唔多日日都發生緊，如果大家喺職場上遇到性騷擾，應該點樣做呢？尤其是遇到好似哩單投訴咁，假設女學生真係被性騷擾，但係個休息室得兩丁友，口同鼻拗咁，係咪就應該啞忍呢？絕對唔係！職場上嘅性騷擾，可以選擇同 HR 投訴嗰位性騷擾人嘅同事，亦都可以去平機會投訴。而根據情況嘅不同，亦可以選擇報警。 《性別歧視條例》中指出，對一名女性提出不受歡迎的性要求，或提出不受歡迎的獲取性方面的好處的要求；或就一名女性作出其他不受歡迎並涉及性的行徑，而在有關情況下...

裸辭 話說裸辭有無問題？好多人經常都好掙扎就係到底好唔好裸辭。 無，其實真係無，小編完全唔覺得裸辭係有問題。都 2018 年啦，腦部都要開發下，返緊一份工真係好困身，好難去 Interview ，除非你做開返 Shift 嘅工，如果唔係突然要你上晝或者下晝某幾粒鐘去 Interview ，除左請假扮病或者係直接同老闆講你去見工之外，相信都幾難去到，變相可能要拉長搵工嘅時間。 另一樣野就係一份工做左一段時間，會令人身心疲累（做得幾個月嗰啲另計），係需要啲 Me Time 休息下，洗滌一下心靈，咁可以趁住未搵到新工之前休息下。但係伴隨而黎嘅可能係另一個煩惱嘅問題：如何解釋空白期。 首先唔駛太擔心，依家好多公司其實都唔係太在意哩個空白期，尤其只係幾個月嗰啲。大多數腦細同 HR 朋友都會諗你只係想休息下，甚至去下個旅行咁都個幾兩個月啦。不過咁，注意如果比較長嘅空白期的確會引起人類嘅好奇心，而長達一年或以上嘅空白期，又無合理解釋嘅話，更有機會降低受聘嘅機會。 雖然小編真係唔算太在意，但循例都要問下，睇係咪有咩特別原因，定純粹只係因為份工做得太短時間而唔寫落 CV 。其實即使轉工頻密都唔係一個問題，因為最重要係背後有「合理」嘅原因支持到你哩一個決定，例如可以係份工伏到喊出黎、講嘅福利同實際收到嘅唔同、突然發掘到想做嘅野等等，其實只要老老豆豆咁講返你個「合理」原因就得。 哩個時候或者你會好無奈，但最緊要都係合理，因為黎得見工，總有少少做戲成份。可能你會覺得，要俾真實嘅一面腦細睇、又唔鍾意講大話、只要返到工就可以表現到實力等等。但係諗深一層，其實同識男、女朋友一樣，你唔先吸引對方，又點令對方想深入了解你？如果你連戲都不屑去做，人哋點會俾機會你去表現呢？所以好好睇睇咁做埋場戲佢，準備返一個得體少少嘅答案。下面有反面教材…… 個案 1 黃小姐：「我上年 6 月結婚，要返大陸擺酒，好多野要搞，所以咪無做囉。」 欸？之後呢？結左婚到依家都就黎年半啦喎，擺酒都擺左好耐啦……除非你補返句話你分左好多次咁擺酒就講得通。 個案 2 陳先生：「我無做野四個月之後習慣左咁得閒，懶得去搵工，所以一直都無搵工啦。」 最後拖到十個月之後咪又係要搵，唔知陳生平日有咩野做呢？可能種下花花草草咁又一日...

排隊的迷思 小編最近去自動櫃員機撳錢，又遭遇返一個一直以黎都諗唔明嘅問題，就係排隊。唔知大家去撳錢嘅時候，有無試過就係有兩部櫃員機，明明有相同嘅功能，可以提款，又可以轉帳，而地下亦都有銀行特登整出黎嘅排隊路線，但啲人就偏偏排左兩條隊出黎。 兩部機都有人用緊，而每條隊都有 2 個人喺後面等緊，你諗住可能是但揀一條都無所謂啦，反正你都係排第 3 個，然後就排埋去「左邊」條隊。點知「右邊」條隊郁啦喎，你諗住依家「右邊」少人排，跟住轉排「右邊」，跟住有街外人排去「左邊」食左你頭先個位。好順利地，「右邊」最前面嗰個人好快撳完錢，依家你前面只係得返 1 條友，只要佢搞掂左，就輪到你用櫃員機。點知原來你跟緊嘅前面嗰條友係做轉帳，撳勁耐都未撳完。等多一陣，「左邊」部機啲人個個都好快撳完，連最後排隊嘅街外人都搞掂埋。結果，你死死氣地走返過「左邊」，然後企喺到後悔緊點解要轉隊…… 係咪似曾相識呢？相同情況唔單只係出現喺櫃員機，去超級市場買野都係，明明前面個客買得幾樣貨，偏偏佢俾現金，仲要慢慢嘔啲散銀出黎，搞到仲耐過隔離買成車野而俾信用卡嘅客。 其實差唔多半個世紀之前已經出現一樣叫「等候理論」嘅野，點解就係唔可以一條隊排哂咁多個櫃位？雖然唔係個個場合都適合，但係往往喺日常生活中卻偏偏好實用，亦可以提高效率。 「人類總是相信自己掌握自己的命運，並渴望能打敗堅不可摧的制度」（節錄自《為什麼隔壁排總是比我快結帳？不是運氣差，而是你不知道等候理論》 https://www.businessweekly.com.tw/article.aspx?id=8883&type=Blog ），哩樣好可能就係點解即使有規則定左出黎，啲人都仲係要逾越個規則，而迫使其他人跟從。 無錯，的確係唔公平，但後面嘅人根本無辦法改變，因為前面一路咁排落去；即使你想排返岩，但排你後面嘅人會覺得你奇怪，質疑你點解唔跟住前面嘅人咁排，而忽略左地下嘅指示，更甚嘅係直接無視你，然後跟住前面嘅人咁排…… 其實哩樣野同平日扮工一模一樣，做每件事都有千萬種方法，偏偏作為新手村嘅你入到一間新公司，即使發現到一樣可以增加效率嘅做事方法，亦只可以沉著氣，死死氣地跟住前輩嘅方法做，如果唔係你份 Appraisal 有可能會俾佢寫花，因為不服從上司合理的命令，而令自己升職...

其實點解唔可以 Share 人工？ 其實做野一段時間嘅朋友都知，有一個約定俗成嘅規矩，就係大家嘅人工都係機密野，唔可以俾其他人知，或者係唔可以知人哋嘅人工，尤其是加完人工或者啱啱出完 Bonus 之後。雖然小編都明白哩句都只係約定俗成，因為好多人都會同自己熟啲，或者係同部門嘅同事「開心些牙」自己個人工去到邊、加左幾多人工，或者出左幾多 Bonus 等等。 出咗黎做野一段日子，原本都已經習慣咗哩條不成文規定，但最近小編又忽然喺到諗，點解唔俾員工討論哩個話題呢？就算員工真係 Share 咗俾其他同事知佢搵幾多，又會有咩影響呢？ 先假設一樣野，就係如果所有同職位嘅人，入職都係一樣嘅薪金，每年加人工又係加一樣嘅百份比，簡單啲，姐係同工同酬，咁小編相信大家都唔會花咩美國時間喺到討論哩個話暝，因為根本就無咩好講。當然，哩樣野係無乜可能發生喺香港。香港一直以黎講嘅都係競爭力，如果喺同一間公司，同一個職位有廿個員工，佢哋嘅人工都有可能差好多。因為年資唔同，學歷唔同，經驗亦都可能唔同（例如喺一啲出名嘅公司做過，有機會高啲人工）。絕大部分嘅公司都係為咗令員工努力啲，所以都會宣稱以工作表現、 Meet 唔 Meet 到 Quota 等等去決定每年嘅人工加幅，同埋有幾多 Bonus 。 小編覺得入職嘅人工好難講，一定會有個範圍。你問得其他同事就預咗有人高過你，但你又唔知人哋可能真係經驗多過你。當然，講就講到好公平咁，之但係咁，無論你隔離嗰個同事幾咁有經驗，但同你依家做緊嘅野一模一樣，啲經驗係咪值得令人工多過你？佢做野係咪真係好過你？如果真係好過你，一係腦細升左佢，咁責任大啲，人工高啲，咁就無咩問題。 講到加人工同 Bonus ，大部分腦細都會話自己好公平，都係按照工作表現去決定，但小編又諗，如果公司真係咁公平，又怕咩同事去比較人工同 Bonus ？如果份 Appraisal 攞 A 嘅同事加 5% ， B 嘅一律加 4% ，如此類推，將哩樣野公告天下，發現同一個評分得出黎嘅加人工幅度係一樣，大家都可能覺得公司係公平處理哩樣野，或者亦唔會有太多投訴。除非公司加人工同出 Bonus 唔係完全按 Appraisal 而定（之前小編好似都探討過哩個話題），怕同事一討論就會發現，甚至發現連 Appraisal 個評分都係有問題嘅。...