你估 HR 好想壓你價咩？
打工仔：放假先黎打風，唔通連個天都唔鍾意打工仔？
老闆：聽日一定會好天嘅……
打工仔：你又知聽日會好天嘅？
老闆：因為希望在明天丫嘛……
打工仔：生命無希望，前路白茫茫（唉）
依家十號風球 + 紅色暴雨警告，大家記住要留喺安全地方暫避，養好身子聽日準時返工收拾殘局！
小編成日都聽到唔少朋友仔去見完工之後，都嬲嬲豬話 HR 壓佢價……真係冤枉呀法官大人！乜你以為 HR 壓人價好好玩，好過癮咩？ HR 又唔係 Sales，又無 Quota 話壓得價多，就有 Commission 分返俾小編（如果有，求大大話俾小編知）。無得分嘅，小編點解要落咁多嘴頭去壓你價喎。
大家都係打工仔，打工仔嘅心情，小編點會唔同情？就算壓到個人工低一低，而個 Candidate 又咁都應承返工嘅，一開始個心都已經唔舒服，有條刺啦，仲點會指意佢留得耐。轉個頭佢騎住小編隻牛，做唔夠 2、3 個月就走去搵對家隻馬（可能俾多左時間佢添），咁咪仲搞著小編幫佢做完入職做離職？！公司啲錢又唔係小編啲錢，小編都廢鬼事同佢慳。有時 Hea 啲咁諗，如果可以嘅話，小編想公司俾多過個 Candidate 嘅 Expected Salary 添，咁請人哩方面就容易同簡單好多，俾 Offer 嘅時候亦都快好多，唔駛講咁多野去同個 Candidate 解釋點解俾低啲人工，佢條氣又 Gur 啲，覆得又快啲（除非突然覺得高價請自己有啲伏之外）。你估解釋完一輪，然後俾個 Candidate 嫌棄好好玩咩？！
講到小編千萬個唔想，咁點解仲要咁做呢？其中有一個非常之常見嘅原因，係你未來嘅腦細突然發覺唔對路，想慳返啲，或者係佢駛凸左，搞到部門 budget 唔夠用，所以咪唯有叫 HR 做醜人同個 Candidate 講囉。你要知道，雖然佢叫腦細，但佢背後仲有一個大腦細，個腦比佢更細，爆左 Budget 分分鐘俾大腦細召去照腦。
另外，仲有原因就係因為個 Candidate 要求嘅人工，高出間公司現職同等職位嘅人工好多。唔明？簡單啲，姐係例如間公司一般有幾年經驗嘅侍應袋緊月薪 HK$16,000 – HK$18,000 嘅，而個 Candidate 唔知做乜鬼開 HK$20,000。試諗下，如果公司應承左個 Candidate 俾 HK$20,000 佢，你估下依家袋住 HK$16,000 嗰個人會唔會即刻眼火爆？香港地，話就話叫你唔好同人講自己幾錢人工，不過，少年你懂的。
提一提返依家搵緊工，或者係將來考慮轉工嘅朋友仔，強烈建議 CV 上面一定要寫 Expected Salary 同埋 Availability of Work，有哩兩樣野就可以令 HR 好快地覺得你適唔適合，你真係唔好懶醒就咁寫一句 Negotiable，就增加面試機會，因為咁樣只係浪費 HR 同埋你自己嘅時間。如果 HR 真係叫你上去面試，而又咁成功地俾你見完大腦細都 OK 喎，到傾人工或者係直接出 Offer 俾你嘅時候，出唔起咁多錢請你，你連車錢都蝕埋。再者， HR 一見你連人工都無寫，甚至睇都唔睇，直接 Filter 走你份 CV，因為無時間再慢慢問你到底要幾錢人工，更惶論面試去到最後先同你傾人工。
當然，小編公司有時都幾等人用，所以就算個 Candidate 可能真係就咁一句 Negotiable 就算嘅，都會打去或者係 Whatsapp 佢，問下到底想開幾錢人工，或者係 Bottom Line 係幾多錢。點知有啲盲毛死都話幾錢都得，睇下到底小編公司出到幾錢請。有次真係問極都唔肯講，火滾到小編直接爆返一句「係咪我地出 1 蚊請你你都做？」，跟住個盲毛先肯講到底想出幾錢？去到哩個時候，就算你開個價係 Within Budget，小編都會自動幫你落選，因為你嘅印象實在太差了。
再黎，就係同各大公司嘅腦細講，唔該唔好成日再壓人價。一來你個空缺已經空左好多日子啦，好難有人返工，二黎就算接受左你個 Offer，返左工又好快走，搞到 HR 嘅工作量大增，你估做 HR 幫新同事做完入職再做離職好好玩咩？俾多少少錢啲員工，大家開心，自己部門又低啲流失率，生意同士氣都好好多。（小編又可以 Hea 啲）
最後順帶一提，好多時候搵新工，對方開嘅新人工好多時候都係，現有人工上加一個百份比。至於幾多，都同行業有密切嘅關係。一般黎講，大部分嘅工作都係差唔多 12% – 15%，有啲出手闊綽啲嘅腦細，但都好少會多過 20%；同金融有關嘅行業就多數都加到 20% – 30%。高職位嘅朋友又要預左個加幅會少返啲。當然有啲人會話「下？阿邊個邊個轉工加 40% 人工！」你又知唔知佢為左哩 40% 人工加幅，放棄左幾多私人生活？放棄左幾多福利？而且凡事總有例外，又俾啲時間你諗諗，六合彩夠話有人中，你買左 5、6、7、8 期，你中過幾多次一千萬？（提外話，小編對上嗰次轉工都加左 30%，諗落都幾爽 A_A）
留言
張貼留言