中秋節快樂

下個禮拜就中秋節，預祝你人月兩團圓先，不過提提你，中秋節分手率高達 78%，要小心啲睇住自己另一半啦。

每年中秋節，HR 朋友仔可能都梗要諗下到底派咩好。如果你公司平時無派開嘅話，真係恭喜賀喜，因為你少左好多野搞；有派開嘅話就要諗下買邊間嘅月餅黎派，又要就埋拎餅時間。有時候突然又話要新野，又話要配合 CSR，唔派月餅，改為派其他野，可能係社企整嘅手作仔啦，又或者係曲奇餅等等，總之就係一個字，煩！

小編做過一間都幾大嘅公司，正正就係有一年，當小編嘅腦細照舊拎個派月餅 Plan 入房傾嘅時候，個大腦細突然話要搞搞新意思，同埋順便做下形象工程嘅野，結果要小編嘅同事去同啲社企傾下，要訂人哋嘅曲奇餅。

喂呀，又係無野搵野黎搞，唔係話幫下社企手唔得，亦都唔係話唔應該有新意，之但係點解中秋節要派月餅？華人社會嘅傳統黎架嘛，派咩曲奇餅姐……再講，你肯出錢嘅，曲奇餅幾時派都得啦，駛乜要中秋節先黎派，分明就係厭月餅貴。仲有呀，公司大大話話幾千人，我當你每個同事送 3 塊曲奇，就算曲奇餅相比起月餅黎講叫易整好多，但你要對方咁短時間內起差唔多成萬件餅出黎俾你，真係阿荗整餅啦。仲有呀，派嘅時候，啲同事又喺到呻話年年都派月餅，問做乜今年大縮水要派餅，又要小編個部門同同事解畫，扮咩形象工程姐，公司個形象工程咪又係 HR 黎做……

小編亦做過一間公司實在對同事幾好嘅，年年都派月餅架啦，不過有一年突然話考慮到有啲同事唔食月餅，所以特登整多兩款野出黎俾同事揀，就係超市禮券同埋咖啡店禮券。點知做完統計到底每樣有幾多人要，竟然一面倒勁多人揀咖啡店禮券。然後問左一問間咖啡店，原來咁啱嗰期全線嘅禮券都賣左好多，唔夠俾小編，最多都只係俾到小編需要嘅一半，結果要同嗰班揀左咖啡店禮券嘅同事解釋，然後叫佢哋揀另外一樣，結果成件事又做多次。

不過算啦，反正搞得掂就得啦。點知原來你對人好，人唔一定對你好。拎餅嘅時候，真係咩花款都出哂黎：有啲同事埋怨點解月餅唔揀流心奶黃嗰隻，話唔想要；有啲同事投訴話做咩只係得一個禮拜拎餅，拎唔切；又有啲同事就臨時話唔想要月餅，問可唔可以改要禮券。大佬呀，你揀嘅時候知道唔係流心奶黃，你自己揀架喎，唔好又臨時話哩樣嗰樣，有得俾你揀仲想點。同埋重點係有月餅送俾你就拎啦，理得你自己食定係派俾人，俾左你就自己搞掂左佢，三分顏色上大紅，堅係睇到小編眼都凸埋出黎。

希望咁多位施主，放過自己，放過 HR，俾意見完全無問題，不過唔好咩都老奉咁，記住一點，無人欠左你……

最後，希望大家開開心心，有另一半嘅就同另一半團圓，無另一半嘅就同家人團圓啦。中秋節快樂！