你哋到底想唔想請人

失業率哩個數字講都累了，從來都唔係一個指標，而好多公司長期都請唔夠人。依家發覺喺香港做 HR 做到好似做 Sales 咁，有時又會俾人捽數，話點解咁耐都係請唔夠人，最慘係 Sales 都叫有 Commission，做 HR 無呀大佬。

其實邊會有完美嘅人選，所以如果個應徵者符合大部分要求， HR 都會嘗試 Sell 俾部門阿頭。有啲阿頭都會去 Try Try 嘅，但遇到以下嘅反應，真係吹漲……

1. 「點解個 Candidate 咁樣衰？」 / 「嘩！乜佢咁肥嘅？」

大佬呀，個樣天生架嘛，你估人哋想架咩？個個都想做靚仔靚女。同埋小編想問，依家選美定請人？前線嘅同事你對佢外表有一定要求，小編都可以理解，但後勤呢？到底想俾邊個睇？當然啦，有個靚仔靚女花瓶，就算坐喺到都可以提高士氣，賞心悅目。之不過咁，你要明白，就算有奇貌不揚嘅人，佢哋嘅工作能力都可以係好高，講野都係可以好有趣嘅。而更重要嘅係，如果真係靚仔靚女嘅，會唔會揀你間公司先？請人同揀男女朋友一樣，你揀人時人揀你。

2. 「嘩！乜佢住咁遠，會唔會成日遲到架？」

哩啲野似乎唔關其他人事，咁你想點？叫佢搬近啲？老實講，住喺邊同遲到係無直接關係的。小編有個朋友住天水圍，朝朝返北角，其實車程一個鐘頭鬆啲搞掂。當然，小編問佢辛唔辛苦，佢都話有啲遠，搭車來回都去到轉台灣嚕，但人工同福利相對黎講高少少。成日講一句就係，食得鹹魚抵得渴，Life is full of options，You make your choice, man。你知道係返咁遠，又要去 Apply 份工，而人哋又請左你嘅話，就無得怨，要努力準時工作，哩個係態度嘅問題。

3. 「佢上一份工做得咁短時間……」

小編承認上一份工做得短時間唔係太理想，但都要睇埋其他因素。做得短時間未必係個 Candidate 嘅選擇，可能係完左約、公司執左笠等等。如果畢業唔係好耐嘅年青人，未必搵到自己條路而轉工比較頻密少少都係可以接受嘅。畢竟有時候唔好太自私， succession planning 唔只係公司內部要做，其實哩個社會都要做 succession planning，俾現時嘅後生仔女接觸多少少，等佢哋盡快搵到佢哋理想嘅職業，咁樣對整個社會都有良性嘅發展。

4. 「點解佢上一份工做左咁耐……」

大佬呀，做得短你又話做得短，做得長你又有意見？小編不能理解，大家可唔可以幫下小編……你話個 Candidate 做得耐，變左老海鮮，咁你自己呢？你都做左就黎 10 年啦喎，咁唔通你要繼續留喺公司做成世？你同我出黎解釋下！

5. 「點解佢一把年紀都得咁少人工，你有無問下佢點解？」

有頭髮邊個想做癩痢，哩樣野小編真係問唔出……人哋都係想搵份工，無謂令人咁尷尬。而且人工哩樣野好講際遇，人哋想搵新工嘅其中一個原因都係想高啲人工姐；又或者人哋其實根本唔休做，就算唔做野都住緊豪宅，養緊番狗，出黎做野都只係為左搵個女朋友，或者體驗下生活，做下快樂的小薯仔，你又點知喎。

唉！咁揀擇，唔怪得個空缺成日登幾個月都搵唔到人啦。