廁所奇遇記

廁所可能同你嘅日常工作可能無咩大關係，而你亦都可能唔會太關心扮工室廁所嘅情況，但係無論你想唔想都好，扮工時間內都一定會「幫襯」下個廁所。當然，次數多少就因人而異。小編想講嘅係，有時喺廁所見到嘅野真係可以驚嚇過你平時嘅工作……

事件一：小姐……你邊位呀？

驚嚇指數：一粒星

經過晨早長征咁款，終於返到公司，多數都會先去一去廁所，作為一整天嘅開光儀式。

一入廁所，未行到入廁格，有位化緊妝嘅小姐突然問：「今日個 Training 係 10 點定係 10 點半？」

廁所無其他人，佢應該係問緊小編我。

等等先？小姐你邊位呀？！

答左佢之後，我一路都思考緊佢到底係邊個。幾分鐘後，我行出廁格佢已經化完妝。

噢……原來係 Marketing 嘅 Tracy！嘩？點解幾分鐘前後完全唔同樣嘅？學黃子華話齋，認得到嘅叫化妝，認唔到嘅喬裝！高明，高明。

事件二：你哋真係好污糟呀！！

驚嚇指數：二粒星

唔係單一事件，小編真係真係好多次喺廁所見到由廁格行出黎嘅同事唔洗手就直接離開廁所，搞到小編完全唔想掂其他同事掂過嘅野。嗯，即係所有野……你試諗下，行出廁所門口嘅時候，已經要掂門嘅手把。感覺上，就好似直接掂住同事嘅一個部位咁……

事件三：神婆作法

驚嚇指數：三粒星

有次行入其中一個廁格，鎖門後一個華麗轉身。

嘩！我啤你個啤丫，到底小編我睇左啲咩？！有一張用過嘅 M 巾痴左喺道門到！我開門嘅時候都驚張 M 巾會跌落黎……可能哩位同事岩岩俾腦細照完肺，但係都唔駛將用完嘅 M 巾，好似道符咁痴喺廁所道門上面架，可能去打小人會有用啲。

事件四：個廁所流血呀！

驚嚇指數：四粒星

試過有一次見到其中一個廁格，有唔少過 10 條血痕，由廁板一路沿住個坐廁滴落個地面到，而啲血痕嘅位置係圍住個坐廁……

突然有一刻小編怕同事失血過多……

！下方高能注意！

事件五：你到底點去廁所架？！

驚嚇指數：五粒星

某一日小編推開女廁道門，未行入去已經聞到惡臭……諗住睇下咩事，真係唔睇由之可，一睇就簡直癲倒左小編嘅世界，環繞世界好似環迴立體聲 Dolby 3.0 咁……

其中一個廁格好似岩岩經歷完生化襲擊咁，情況就好似有人將啲 SSS 引爆，令到個廁格嘅 360 度都不能倖免。講白啲即係成個廁格周圍都係 SSS！雖然嗰刻真係好臭，但小編都好想問：到底啲人點去廁所架？！