辦公室之男親女愛（二）

兩個禮拜前講過有人投訴有同事係咁 Flirt 黎 Flirt 去，搞到好不爽，但其實哩樣都無咩得咁大不了，因為小編曾經聽過其他 HR 朋友講過佢哋嘅同事，喺哩個浩瀚嘅宇宙入面，更強大、更露骨嘅愛……（先旨聲明，小編的朋友不是小編……）

話說小編個朋友大隻仔喺 N 年前做緊一間百貨公司店舖嘅人事部。大家都知道做得零售，一定要有一顆堅毅無比嘅心，同埋無限嘅體力，尤其是做食品部嗰啲，成日將啲菠蘿呀、榴槤呀推黎推去，無返啲體力，一日點捱到十幾粒鐘。仲有嘅就係對黎對去都係嗰啲人同埋貨，睇都睇到麻木哂，好快就會開始懷疑人生。

有日大隻仔就收到消息話有兩個同事突然被辭職，有一個仲要係經理黎，仲要係走得好突然，咁佢八卦咪四圍打聽下囉，但又好奇怪地問哂成間舖，一係就無人答到佢，一係就咿咿哦哦、支吾以對咁，結果俾佢發現左一樣好神奇嘅事。

原來話說個經理就成四、五十歲，前嗰一晚同一個食品部嘅主管負責收夜，個主管都有返咁上下架，年紀……凌晨時分大家都走哂，而佢哋喺後倉收完最尾嘅貨之後，見悶悶地，就開始黎料，開始上演活春宮，為彼此嘅人生加一點樂趣（搞到小編好似舊時啲講故佬咁…… XD）。正當打得火熱嘅時候，突然有幾個同事忽然醒起漏左野，就一齊返轉頭，正正就撞破左哩件事，結果傳到去店長耳邊……從來職場上就無秘密……

你係咪以為哩件係單一事件呢？少年你真係太年輕啦。

話說小編又有另一個朋友獨角馬做高級酒店嘅 HR。哩類餐廳多數都有啲落場時間，而作為高級酒店，員工休息室都大過人，甚至有幾張床俾啲同事休息下。咁當然，有分男休息室同女休息室。

有日獨角馬收到消息，有人投訴話朝早喺男休息室見到樣好驚訝嘅事，就係有對苟男女衣衫不整咁瞓左喺同一張床到？！原來佢哋之前嗰一晚見累累地，於是就一齊渡過左一個乾柴烈火嘅晚上，然後本身想第二日一朝早就開工走人，點知就累得制，瞓到有早更同事返左黎，被撞破左。結果再問多幾問，原來佢哋已經唔係第一次咁樣做了，最後成件事搞到成間酒店嘅同事都知道左，結果當然又係要執包袱走人啦……

聽到哩到，突然小編開始懷疑人生，原來情慾哩家野係與生俱來，不分年齡界限……小編奉勸大家一句，如果真係情到濃時的話，記住搵一間房係鎖得、隔音有返咁上下同埋無閉路電視嘅地方，同埋最緊要嘅一點，就係記住清潔返好個地方，畢竟都係工作嘅地方。