辦公室騎呢行為

除左一啲喺工作上會令你火都黎埋嘅同事，仲有一啲係 Office 內發生，但係屬於工作以外嘅奇異行為，唔知大家有無遇過……

1) 剪手指（腳指？）甲

試過有同事喺個位到剪指甲，不但只剪指甲嗰陣發出嘅清脆聲音好滋擾，而且個同事任由啲指甲亂飛嘅情況更令人不安。仲有啲膠層會閂埋房門，喺自己間房入面剪，雖然你睇佢唔到，但係小編相信喺一個清靜嘅 Office入面一定聽到。有時候其實小編都好想問下其他同事到底有無人好似小編咁諗，覺得膠層其實係喺房到剪緊腳指甲？

2) 挖鼻屎

雖然同德國隊嘅領隊路維比起上黎，簡直係小巫見大巫（毛？），而挖鼻屎可能係幾爽，有時候喺嗰一刻真係會忍唔住，亦都係人之常情，之不過可唔可以入廁所先進行哩個咁私人嘅行為？！唔好喺個位肆無忌憚咁挖完鼻屎，再周圍彈出去！一係就同小編食左佢！其他同事好驚啲紙同 File 會沾染到分泌物 >﹏< 仲細咩！

3) 飲酒

唔係講緊喺公司飲酒，但如果有同事每日返工都帶住一身酒氣返黎，試問其他同事會點諗？要見客嘅固之然係死得，就算係後勤同事都講唔過去，小編深信絕大部分同事都會想問你：「你醒未呀？！」

4) 護膚

曾經見過有位女同事，佢 Office 張枱長期擺放全 Set 護膚品。正當小編以為護膚實係早晚喺屋企進行嘅時候，哩位同事完美示範點樣善用返工時間去護膚……有日哩位女同事突然喺個位大叫左一聲：「嘩，唔得啦，我啲毛孔咁污糟嘅？！」正當其他同事都仲喺到諗緊應該俾咩反應嘅時候，嗰位女同事一另轉面，塊面突然變左灰綠色，應該係敷左清潔泥 Mask……小編都係扮見唔到算了……之後嘅 20 分鐘入面，見佢好似喺屋企咁，將一層一層一層的剝開我的心（誤），將一層層唔同嘅爽膚水呀、精華液呀、面霜之類嘅野搽上塊面到……

5) 真係古里吾島

有日忙到一頭煙嗰陣，隔離位個女同事突然大大力咁拍左張枱一下，然後企起身好大聲咁宣佈：「返工真係好辛苦呀呀呀呀~~~ 我好想俾人包，有無人可以包我呀？！」小編偷偷地望左一下周圍嘅同事，發覺所有人都好似聽唔到咁，繼續好正經咁做野，連笑都唔笑下。嗯……睇黎哩個應該係最佳嘅反應，小編一於照跟。睇黎又一個返工返到傻左……唉 ~

返工返到傻，最後一次搭單幫「海港青年商會 - 「 充電吧 香港人」」散播一下活動詳情，今日 6 月 24 號下晝 2 半至 4 半有個身心健康運動嘉許禮，地點係馬鞍山廣場，到時會分享下「微放鬆行動」對身心健康嘅意義，同埋推行成效。總之就係一句到尾，希望唔想返工返到好似奴隸咁……（笑）

自己睇：https://www.facebook.com/events/216314808974812/