最高工時的迷思
上個禮拜有一篇新聞話澳洲有一間財務公司推行每天 5 小時工作，小編睇完之後真係「嘩」一聲！如果小編嘅公司可以推行每個禮拜返少啲，唔好話多，Let say 每個禮拜變到返四日，相信同事嘅怨氣都無咁大……（當然小編嘅 Hea 病應該會好返少少）
不過咁，要減少工作時數，僱主就梗係死都唔肯，因為開支會大左勁多。啲人仔做少左野，仲要出返一樣既人工，分分鐘仲要請多啲人去頂埋果啲無人開工嘅 Opening Hours。同時小編諗返起上年睇過另一篇新聞話瑞典有一間老人中心都實施過 6 小時工作，由原本一日工作 8 粒鐘，變到得返 6 粒鐘，發現要請多 17 個人返黎做野，結果兩年黎開支增加左 220 萬美元（咁多嘅？）。作為一位 HR，某程度上都仲係一個打工仔，唔係話幫住僱主，但係對於佢地黎講，哩條數未必個個都頂得順。
睇完上面兩篇報道，其實只可以話，唔同行業可能要採取唔同嘅措施，未必個個行業都適合完全嘅減低工時。毫無疑問，降低左工時，員工嘅滿足度有一定程度嘅上升，而且少左工作時間，變相佢地要迫住喺短時間內完成既有工作，相對黎講集中力同埋工作效率都會提高左，而且放工之後多左私人時間，都唔駛成日問醫生拎醫生紙啦，因為出黎都唔抵，用幾百蚊先換 6 粒鐘，簡直係蝕到入肉。當然，如果真係減低左工時都仲要 Hea 嘅員工，建議仲係盡早 KO 佢地好過啦。（那，小編只係因為工時太長，先要啲時間去 Hea 下，調節下心情……）仲有仲有，多左私人時間，自然多左消費，出街消費又得，喺網上面禁下禁下咁消費又得，經濟得左。
當服務性行業面對哩個問題，咁樣就難好多了。因為公司嘅營業時間不變，你減少左工作時數，變相一係請多啲人，一係就接受同一時段少啲人手去服務啲客人，想保持服務質素又係一大難題。另外就係對社會嘅問題，依家就話大部分公司都養住啲人 9 粒鐘，跟住哩個城市嘅打工仔就有 8 粒鐘係喺公司入面（或者自己做野嘅地盤到），商場又好，街又好，相對黎講會少好多人。但係如果工作時數少左，雖然佢地有機會都係喺屋企抖下，但係總會有人行出街，咁成個城市人均面積又會少啲。（好似講笑咁講，不過星期六、日嘅情況可能喺平日都會出現……）
無論點，小編都係支持最高工時嘅實施，最好仲係推行降低工時！依家社會氛圍又好，後生一代又好（再講多次呀啦，小編仲係後生人黎架！），大趨勢都係 Gig（即係所謂嘅零工，零散工作）。簡單啲，姐係家陣啲人唔興做長工，唔志在你啲僱主成日講嘅所謂「福利」，寧願做 Slash 都唔肯打一份返咁長時間，又要咁無聊嘅工作！試問，就算你唔推最高工時出黎，前線都請唔齊人，又返返去嗰個問題，一係請多啲人，一係就接受同一時段少啲人手去服務啲客人。
當然，仲有另一個方法，就係用科技！用 Ipad 落單，用機械人去做 check-in check-out等等。雖然依家科技仲未係太普及，但一定係未來嘅大趨勢！唔好成日話咁樣會降低工作機會，因為本身就有哩啲工作機會，係無人做！而且依家唔係完全無哂人手，而係將本身無人想做嘅野，變做科技幫手做！所以維基叔所做嘅投資，其實係睇到未來嘅事，作為做 Pioneer 真係有過之而無不及，只不過……時機係咪太早，仲係有相榷嘅餘地。
P.S. 小編又突然好多道理出左黎，正經左添，最後仲係祝大家 520 快樂，祝有情人一對對，快啲兩年俾小編抱下三。
留言
張貼留言