最低工資的迷思
話說小編成日都收到啲同事隊上黎唔同嘅表格，話申請政府哩樣福利、嗰樣福利，跟住叫小編幫佢地填表俾份收入證明。明明小編公司各個職位嘅人工真係唔算低，但係出奇地佢又可以每年都申請到唔同嘅津貼，例如低收入家庭津貼等等。
當然小編知道有部分同事真係幾慘，養住屋企幾隻化骨龍，另一半又要照顧幾條龍仔，最多只可以做份兼職幫補下家計。之不過，小編知道有部分嘅同事都係特登叫另一半唔好返工，然後見工果陣就已經問定話可唔可以唔要雙糧、花紅，同埋要求公司每年唔好加人工俾佢地，就係因為要申請公屋。
本來小編以為啲同事真係好蠢好蠢，但係發覺原來蠢嘅係小編，因為佢哋只係將自己嘅智慧用左喺走精面……要問點解香港社會倒退緊，不停好似漁護署咁講有外來魚入侵，某程度上都係成日將智慧用左喺其他地方，不思進取……（下刪三萬字）
睇返香港嘅堅尼系數（堅尼系數愈接近 1，姐係個收入差距愈大），根據統計處公佈嘅 2016 年數字已經係 0.539，而統計署雖然仲未出 2017 年嘅數字，不過瑞信嘅 Global Wealth Databook 2017 有指出香港 2017 年嘅堅尼系數竟然有成 0.85？！
（小編唔做 Fact Check 啦……大家得閒幫手睇睇哩個資料有無前設）
咁到底靠住現有嘅所謂福利，到底有幾多係真正幫到低收入嘅人？定抑或只係淪為俾啲不思進取、攤大手板問政府拎錢嘅人利用？令到窮者越窮，富者越富嘅現象更甚？
仲有最低工資嘅倡議，又係另一個問題。上個禮拜日，有建議話提高最低工資至最低 40 蚊，同埋一年一檢。不斷提高最低工資，到最後會唔會發生物價不停上升哩個情況呢，小編都講唔定，只不過會有 99% 會出現啦。點解？因為羊毛出在羊身上，只係將人工增幅轉嫁左俾消費者。其次就係，就算唔提高工資，物價都係照樣上升……（笑）
那，那，那，先旨聲明呀，小編唔係唔同意有福利同最低工資，只不過一味單單加哩樣加嗰樣俾啲市民未必係最有效。成日話學校、公司係社會嘅縮影，講得非常非常之無錯，因為同樣地依家社會正正就係出現緊哩個問題。
小編問下大家，有無試過公司有啲問題，一個部門推一個部門，而最後因為某一個部門唔合作，大家吹佢唔漲，而搞到個問題到依家都仲係一直存在喺到？其實情況同依家嘅社會一模一樣。一直只係得一個部門努力，就好似不停加福利同提高最低工資，係永遠唔會阻止到事情嘅惡化。反而應該要從個源頭入手，將智慧用喺點樣控制物價同埋市場競爭，同時減低濫用福利嘅一群人，以及培育香港本土嘅專材，而並非話不停輸入啲外來魚。
當然，小編深信一點，人類總是自私的，所以作為既得利益者嘅人係一定唔會諗個源頭，而只係會諗點樣去賺更多嘅錢。
突然小編諗返好多年前成先生嘅天災論……（咪笑小編呀那，梗係知成龍唔係姓成 XD）
留言
張貼留言