千奇百趣 Interview  之  面試幾點到好

每年有幾個月份都會有好多同事辭職，唔係就二月出完雙糧花紅，就係就四月加完人工之後就走人，香港地差唔多大部分公司都係咁。既然同一時間咁多人走，咁梗係預先就要出定廣告請人啦。其實平時都係咁見人架啦，不過尤其哩啲月份就更加見得多，仲要夾埋應徵者嘅時間，分分鐘一日要安排兩至三位應徵者見。

話說有日約左三位應徵者下晝面試，正路一個面試就歷時 30 – 45 分鐘，所以約左一個 2 點半，一個 3 點半，一個 4 點半，咁小編打你就算拎盡 45 分鐘黎見，仲有 15 分鐘 Hea 下，等下一個黎。點知，估唔到小編仲係太年輕了，估唔到應徵者真係個個都「古里吾島」過黎……

當日 2 點半嘅時候，等極都唔見個應徵者出現，打俾佢又唔聽，諗住佢自動 No Show 算啦，滿心歡喜咁諗住「好 Yeah，有得 Hea 下」。點知去到 3 點鐘，接待處姐姐打上黎我到，話本身約左 3 點半果個提早左半粒鐘黎到，依家等緊我。

算數，至少都叫抖到半粒鐘，咪拿拿林「的」左佢上會議室到坐住填 Form。隔左唔夠五分鐘，接待處姐姐又打上黎話有人見工。

咦？又見工？

問真 D，原來係 2 點半嗰個遲左半粒鐘，電話又咁岩無電通知唔到小編。Anyway，本身佢自己遲到，無得講啦，焗住等我啦掛。嘿嘿。

到左時間大約 3 點 20 分左右啦， 3 點半嗰位應徵者填完 Form，突然接待處又打上黎，我諗住應該係 2 點半個應徵者等唔到，要閃人，點知……

「喂，HR 呀，有位小姐約左 4 點半上黎 Interview……」

咦？依家 3 點半都未夠喎！一問之下，原來因為佢記錯左時間，以為 3 點半……

喂呀！到底大家可以有幾大時差？一個就遲半粒鐘，一個早半粒鐘，仲有一個早一粒鐘，想玩咩呀？三條友同一時間黎小編到做乜……如果同一時間見你地，駛鬼小編幫大家約時間咩，不如個個約朝早 9 點正，早 D 搞掂唔駛 OT 啦。

俾大家一個小貼士，見工遲到或者知道你趕唔到，不妨早 D 打返俾 HR 睇下遲少少方唔方便，如果唔方便就再約過第二個時間啦。另外早到就一定架啦，不過早 10 至 15 分鐘已經非常非常非常之足夠，好多應徵者，尤其是見高級職位，成日都提早半粒鐘、一粒鐘到，咁樣其實會好打亂 HR 嘅 Schedule。無乜 Appointment 嘅時候，早 D 見你就無咩野嘅，但係遇著趕緊 Budget 嘅時候，你早左黎，都係照放你喺接待處坐咋，陣間你等唔到，又係咁叫接待處姐姐狂打上黎。

真心的，如果自己真係早左到，不妨唔好入公司住，喺附近商場行下，涼下冷氣，冷靜一下個人好過。小編都有聽過朋友去見半山嘅工，早到左 45 分鐘，而間公司附近無商場，又無地方抖下，結果佢去左附近屋苑嘅 Reception 到坐，扮見人地份工。

總之嘅就係見工早 10 至 15 分鐘已經非常非常非常之足夠！！！