佛系 HR

祝大家愚仔愚女節快樂！ =D

哩排成日見到好多人都不停係咁拎 King of the Hill 個肥仔出黎搞佛系，搞到依家唔同界別都有個佛系種族，小編心血來潮又整返個佛系 HR 先，等大家領悟一下 Hea 到盡頭便是佛。

老實講，小編本身都係一個熱血嘅青年黎，只不過去到依家已經睇化哂。（那！唔代表小編老架！）睇化左 D 咩？咪就係睇化左咩都唔輪到你話事囉！唔係我地唔想做得更好，而係好多野都唔俾做！

其實，個個 HR 都出廣告請人，又唔通個個 HR 都想出廣告咩。出個廣告吸引人地 send CV 過黎同埋宣傳下，登三次咁大把就已經差唔多成皮野，仲要 Regular 咁登。樓下班前線成日都話低人工，做到成隻蟻咁咁辛苦，假期又少過人，仲要返 Shift，其實拎 D 登廣告嘅錢黎補貼下，分分鐘仲有著數，至少留到一班人，等個 Turnover Rate 唔好下下都咁高。

問題係你登左廣告以為有 CV 就好？成日有 D 「麒麟怪」俾埋 D 奇怪 CV 黎，就好似之前嗰篇「千奇百趣履歷表」咁，自己碌返去幾個禮拜前果到；又例如明明自己得一年工作經驗， Expected Salary 寫高過自己依家果份工 HK$5,000 都夠膽死。你叫小編點叫得落手丫。

就算見到 D 垃圾 CV，俾著小編都揀唔落手，但係偏偏就會有人話「叫佢地黎 In 下都好」（唔好問小編邊忽好，因為小編都唔知）。又或者搵到份正常嘅 CV，約完面試，到見面嘅時候，明知對方聽到我地開嘅銀碼，可能會即刻縮，但都要照樣壓價。大佬，唔係 HR 想壓你價，而係腦細死都唔肯加人工，就算做左幾多 Benchmarking 呀、Market Analysis 呀等等，佢要一意孤行都無計，唔通唔俾佢死咩，如果唔係分分鐘踢埋小編出公司添呀。

塵世間一切一切都係盡在「緣份」哩兩隻字入面，因為有時候就算你唔出廣告，唔主動去搵人返黎，唔睇履歷咁 in 人，甚至連 Interview 都唔 in，總會有一個腦細介紹唔知喺邊到彈出黎嘅人話聽日返工。

你話啦，搞成咁，邊有可能唔變佛系 HR……

P.S. 唔好意思，咁岩哩個禮拜有 D 情緒化，可能因為小編等緊復活……