巧立名目

成日都吹好多風話香港失業率低，最近幾個月嘅失業率都係維持喺 2.9%，睇落競爭好似好大咁，所以好多公司都各出其謀去吸引求職者。有留意用招聘廣告嘅都會發現，唔少公司都有一啲特別嘅福利，生日假、義工假哩類就唔少得，就連添孫假、孝順假都出埋黎……睇落好似好吸引，一年入面多左假期，但係又係咪真係用得到先？

雖然每間公司嘅制度都唔同，但以上所提到嘅假期，一般都有特定嘅要求。例如添孫假，一聽個名就知，係俾啲榮升外公 / 外婆 / 爺爺 / 嫲嫲嘅人放。除左要提交證明文件，放哩種假嘅人其實都有返咁上下年紀。哩個年代太後生放哩個假期，都可能唔係咩福氣。咁公司入面又有幾多人口係哩個年紀，享用到嘅人又有幾多？

輪到義工假，要放義工假嘅條件一般係你要喺私人時間做左相等於一個工作日咁多個鐘嘅義務工作，至少都要 8 – 9 個鐘。當然，唔排除有熱心公益、服務社會嘅同事，亦都好值得嘉許。之不過，見好多公司嘅同事追求嘅野都只係錢同北上，叫佢做義工？講笑咩？而且公司由開始有義工假到依家都已經幾年，申請嘅人數係 0。（題外話，差唔多每個禮拜六都有人賣旗，到底有幾多賣旗嘅人真係有認真睇張資料，講得出自己幫緊咩機構賣旗，同埋賣旗得返黎嘅善款用黎做咩？）

至於孝順假，可以要黎陪屋企父母或者老人家睇病覆診。如果有得揀嘅話，我相信大家都唔想有哩個需要。而且申請哩種假仲有可能需要交屋企人嘅病假紙，而你又會唔會覺得係好私隱，唔想將哩樣資料交俾公司呢？

不過無論咩假都好，都要留意返自己公司政策，因為如果你放唔哂 D 生日假呀，義工假哩 D，而你又搵到好路數辭職走人，分分鐘可以唔駛補俾你。

雖然喺香港地，如果你公司願意「發明」各式各樣嘅額外假期，已經係皇恩浩蕩，要謝主隆恩，但老實講如果真係想俾多 D 福利員工，不妨考慮直接「加假」好過啦。最基本年假由 14 日起跳，一來又可以減省左個 HRIS 唔記得加做得耐嘅員工嘅年假（姐係法定要求 7、7、8、9、10遞增至第九年 14 日嘅規定），二來請年假又唔駛話特登符合咩要求先放得，自由度大好多，鍾意用黎陪屋企人睇醫生又得，陪下自己個孫又得，甚至過一個生日都仲得，至少唔會剩係得某部分人先可以享有。

除左假期之外，仲有 D 所謂津貼，有實報實銷嘅非經常性津貼，當然係對員工好，至少你出左幾多，補返幾多俾你；至於固定出嘅津貼，好似 D 因公司太遠而個個月俾你嘅交通津貼哩一類，簡直就係壓低左你本身個底薪而出現的。如果你俾小編揀要選擇一：（底薪 HK$20,000）定係選擇二：（底薪 HK$18,000 + 交通津貼 HK$2,000）的話，一定係前者。因為好多時每年加人工都係用個底薪做。例如今年嘅加幅係 4%，就可以睇下以下嘅計算：

選擇一：HK$20,000 x 4% = HK$800（Yeah，加左 800 蚊！）

選擇二：HK$18,000 x 4% = HK$720（喂，少左 80 蚊喎！）

仲有唔只加人工，雙糧同花紅呢？哩 D 加加埋埋可以話一年少收 4 位數字。仲有喎，如果你搵到好路數，出去開價嘅時候你開 HK$18,000 定 HK$20,000 好？當然你會照開 HK$20,000，但係對家 HR 又會唔會考慮你嘅津貼？唔通你同佢講話因為依家間公司位於交通唔方便先有嘅津貼，如果新公司開喺地鐵站上蓋呢？GG 了……

不過咁，姜太公釣魚，願者上釣姐，接受與否，在乎溝通與關懷， Life is full of options……