炒人到底有幾爽？

入行一段時間嘅 HR 應該經歷過炒人，今次嘅主角係同事肥仔文……

話說佢入職都成 2 年，但係一直表現都唔理想，佢最擅長嘅係喺返工時間發呆，而且屢次勸佢都唔改，甚至有試過兜口兜面喺個客面前發呆，仲要個客叫左佢幾聲都無反應，十足十突然被人強制登出左嘅機械人咁，之後當然俾個客投訴。最後佢經理終於都頂佢唔順，決定唔再俾機會佢，escalate 上黎我地 HR 到話要炒佢。

雖然你可以話好多時候見工都係扮哂蟹咁，返工又另一回事，但明明當初見工嘅時候都仲叫係一個正常人，唔知係 D 人定係 Duties 搞到佢變到傻 Q 左。其實佢經理都算勁，忍到佢 2 年無同我哋講，仲要連 Appraisal 都無寫低。如果當時佢入職已經係咁樣，可能小編連 2 個月都忍佢唔到。

仲記得炒肥仔文果陣，佢仲係 O 嘴嘅表情，發緊呆咁望實小編……大佬呀，撞邪咩？不過個故事仲未完……

炒左肥仔文之後第一日

收到佢老婆電話：「我係肥仔文老婆，想問下佢做得好地地，點解會俾人炒左嘅？問佢佢又話唔知……」

炒佢嘅時候解釋得清清楚楚，到底有無聽清楚？無聽或者聽唔明嘅話，人地問你明唔明果陣你就唔好答話明啦！（哩樣野好多人都係咁！）

炒左肥仔文之後第二日

又係肥仔文老婆打黎：「係咪真係無得傾？阿文話佢好鍾意份工，好想返黎做……」

梗係鍾意份工啦，日日發呆都可以留到 2 年，俾著小編嘅話，都仆倒去做啦。

早知今日，何必當初……如果真係咁鍾意份工，喺 2 年入面點會唔諗辦法改善？同埋幾廿歲人，有咩同自己份工有關係嘅野又唔自己問，要個老婆仔代勞，說好的男人呢？

炒左肥仔文之後第三日

喂？又係佢老婆打黎：「阿文真係無左份工唔得架，我哋一家大細靠哂佢養……」

上次講過香港人力資源錯配，但係如果真係靠佢養，大不了降低要求架姐，除非特別挑剔，否則應該唔難搵到新工……

跟住佢老婆又繼續講：「你知啦，阿文佢傻架嘛，個人又蠢，你地唔請佢都唔知搵邊個請佢啦！」

嗚呀！俾著小編係肥仔文，聽到自己個老婆咁話自己，應該都會受唔住打擊而放棄自己……

不過老實說，小編真係好想好想好想咁同佢老婆講：「既然你講到佢咁差，仲好意思叫我地接收阿文！無人肯請嘅人就叫我地請，你當我地公司係樂善堂？」

當然，有 D 說話都係咕一聲吞返落肚算了……

在於公司立場，炒左個害群之馬係幾爽嘅，但係作為 HR 嘅小薯仔，要做緊野真係好多，仲要處理埋被炒果個嘅屋企人，咪玩啦！

Hea 爆冷知識：

其實要同一個僱員終止一段僱傭關係好簡單：「只要雙方都願意，就甚麼也可以」，好多時候點解會有勞資糾紛都係因為啖氣，作為打工仔辛辛苦苦幫你打左咁耐工，你一個唔該就話炒我，實係唔好受。不過即使係咁，其實只要有正常理由，同埋補足錢同通知期，雙方任意一方都可以終止哩段僱傭關係。

黎到哩到作為 HR 嘅朋友要注意了，記住唔好亂用 Cap 57 《僱傭條例》第 9 條去炒人，因為哩樣「即時解僱」喺勞資糾紛入面係一樣好嚴重嘅事，唔係單單無左句「Resign on his/her own accord」 咁簡單，而係代表住佢所有本來應得嘅權利都無哂，基本嘅例如通知期 / 代通知金、遣散費、長期服務金等等。

即使有如第 9 條「僱主不給予通知而終止合約」嘅情況：

(1)         (a)          僱員在與其僱傭有關的事宜上─

(i)            故意不服從合法而又合理的命令；

(ii)           行為不當，與正當及忠誠履行職責的原則不相符；

(iii)          犯有欺詐或不忠實行為；或

(iv)          慣常疏忽職責；或

(b)          僱主因任何其他理由而有權根據普通法無須給予通知而終止合約。

(2)         僱主無權以僱員參加罷工而根據第(1)款終止其僱傭合約。

都要視乎返實際情況去決定，如果唔係分分鐘要惹上官非。

有時候可能你會覺得同事犯有欺詐或不忠實行為，而想即時解僱佢。如果真係咁，你得閒可以睇下 HCLA57/2003 謝家和對香港品質保證局哩單案，睇下個官嘅判辭就會明。

再黎，睇返早幾個禮拜二月尾果單九巴罷工事件，雖然第 9 條 (2) 講話唔俾以哩個理由去不給予通知期或代通知金，不過係咪代表補足哂錢俾佢就得呢？

Sorry，因為 Cap 57 有 21B 條 (2) ，「任何僱主，或任何代表僱主的人，如 (a) 阻止或阻嚇，或作出任何作為以刻意阻止或阻嚇僱員行使第 (1) 款所授予的任何權利；或 (b) 因僱員行使任何該等權利而終止其僱傭合約、懲罰或以其他方式歧視該僱員，即屬犯罪，一經定罪，可處第6級罰款。」

所以點解明明見到網上流傳好多九巴計出黎嘅 Final Payment 明明計哂所有野，去到最尾都咁驚而要收返個命令呢，哩個就係其中一個原因（定係唯一一個原因就唔知啦）。當然，如果九巴有心郁佢，隔多幾個月再郁你都吹佢唔漲。 

其實，大家都係打工仔為三餐，何必呢？


免責聲明：小編只係一個 Hea 到核爆嘅 HR，唔係律師，一切冷知識都係睇僱傭條例學返黎，如有獨特見解或案例，歡迎分享、指教及討論 > v<