人呢？喂，人呢？（二）

與其成日話市場上好難搵到合適嘅人，倒不如話依家做 In-house HR 面對最大嘅困難就係根本無人會做，所以就算明知某 D 招聘渠道係收唔到成效，或者係明知個 Candidate 係廢，你都要送返幾份垃圾 application 俾部門經理「審視」下，確保返唔係我地無做野，而係無人願意做份工。

不過咁，雖然話人呢，就點都請唔足架啦，不過 Turnover 就點都有，新人點都有幾個嘅。但係每個月先得幾丁友，新入職嘅 Orientation 一係就幾條友都照做，一係就唯有等多一兩個月，一次過做多 D。不過最大問題係 D 前線部門嘅主管見到新同事就好似執金咁，一落左去就好似永遠都唔想俾佢走，連幾粒鐘做個 training 都唔得咁，無論點樣去解釋俾 D 主管聽，合適同埋適量嘅 Training 某程度上係可以令新同事留耐 D，主管都係一於懶理，總之就係解決左依家嘅問題，過得一日得一日，因為分分鐘聽日就即刻 Short Notice 走左咪唔駛理囉。

最經典試過有一次，本身安排左 20 個唔同部門嘅新同事上 Orientation。一開波已經知道佢地未必會黎得齊，所以直頭俾定兩個日子，等部門經理自己安排佢地邊日上。咁好啦，覆返黎每日都有 10 個左右。心諗，無死啦掛今次。點知喺 Orientation 開始之前幾粒鐘， D 部門經理話邊個邊個射左波，唔夠人手，出唔到。已經心知不妙，數一數到底剩低幾多人呢……

1 個？！

數真 D 先！

咦？得返 1 個？！

搞定唔搞？搞！ 1 個都照殺！由本身一對多變左做單對單補習，當然心理壓力下降唔少（Hea 底嘅小編梗係唔想對住咁多人啦），不過同時諗一諗，如果逐個逐個做都唔係辦法，可能求其整返個 LMS (Learning Management System) 去俾份資料佢地自己睇同做算了。

今時今日做 In-house HR 已經要做到好似 Sales 咁，要俾人捽數，但最慘嘅又要無 Commission。某日出去一間大專院校 Recruitment fair，見到某大集團係咁搶人，一見到有學生行過，就好似以前大學嘅 Society 咁，係咁搵 D 靚女型男去色誘人埋去咁，起勢係咁吸引人去申請，務求做到愈多 Application 愈好。當然，可能佢地其實係請返黎嘅 Agent，有幾多 Application 就計幾多 Commission，不過俾著我係個 Candidate 一諗到咁 Chur，分分鐘臨尾彈鐘都唔定，同埋收左咁多 Application，揀都有排揀。（當然啦，有得揀好過無得揀嘅。）

除左請人，另一個面對嘅就係搞 Training，夾時間 Book 房仲要安排人上，有 D 公司有獨立 Training Room / Centre 同埋有合作嘅部門經理就梗係最好啦，如果無的話就有排你執。甚至以前跟過某大公司嘅 Director 話：「講公司 Underpay 已經講左好多年，哩樣野唔駛再講，改變唔到。請唔到人同留唔到人，係因為 Training 唔夠！」

嘩？我真係眼都凸埋出黎，人工俾唔夠，仲要賴？Sorry 我真係識條毛了，可能要返去 20 世紀搵我地偉大嘅 Maslow 去研究下 Hierarchy of Needs 先……

家陣做 HR 真係難……