人呢？喂，人呢？

不經不覺已經黎到 3 月份，距離農曆新年已經過左差唔多 3 個禮拜了。諗返起新年果個禮拜，返工真係勁爽。點解？因為令小編覺得果個禮拜，哩到先係真真正正嘅香港！

想當年，就算香港經濟達至頂峰嘅時候，D 人都無咁恐怖，唔會唔夠兩三日就一單鬧車長嘅新聞；等車、鐵都唔駛等成 3 班都搭唔到；禮拜六、日行商場都唔駛迫到人貼人。但依家嘅香港呢？即使唔係假期，個香港就係好多好多人，周圍都好迫，甚至只要有一班地鐵遲左幾分鐘到站，排隊都好似螞蟻咁，貼住前面個人（前面係女性的話，都仲可以接受到 A _A，但如果係大汗搭細汗嘅大叔的話，真係想流淚狂奔），差唔多排到過對面月台；又或者好似巴士遲左少少咁，已經會俾 D 情緒高漲嘅乘客不停係咁問候。不過，一到每年嘅農曆新年就會返返去以前嘅香港，雖然都多人，但至少唔駛迫到貼住哂，而且見到大家嘅表情同心情上，比起平日返工，明顯係輕鬆好多。

一諗到哩到，就好奇睇下統計處嘅人口統計，睇睇到底依家香港到底有幾多人。純粹只係計居港人口， 2017 年年底已經去到 740 萬人，仲未計訪港旅客果 110 萬人。原來香港不經不覺已經過左 800 萬人好幾年了。難怪無論任何時候香港人迫到好似螞蟻咁。

作為 Hea 底嘅 HR，成日聽到各行各業話請唔到人，咁當然要睇下勞動人口，2017 年 11 月至 2018 年 1 月香港勞動人口有 396 萬。

咦？原來得 396 萬係勞動人口，當中亦包括左 10.6 萬失業人士，以及「因灰心而不求職的人士」！而且，勞動人口參與率只有 61.2%。如果純粹只係計 15 – 64 歲嘅人口，就已經有 531 萬人，咁到底果 134 萬人呢？經常話物價上升，又唔加人工，但係仲有咁多人都唔駛返工，仍然仲可以維持到生計？

再黎睇睇職位空缺情況，根據 2017 年 9 月就業及職位空缺統計指數，喺71,150 個私營機構職位空缺當中，按行業分析，經常新聞提到嘅餐飲服務業佔 10,780 個，零售業佔 8,130 個。按主要職業組別分析的話，服務工作及銷售人員佔21,780 個。如果頭先講嘅 10.6 萬失業人士重新投入返勞動市場中，甚至會有供過於求嘅情況，但係點解永遠都好似無辦法接觸到果班人呢？

其中一個可見的原因就係，舊時代讀書好艱難，讀完大學拎到張砂紙嘅人，比例上低過依家好多，而個個讀完大學嘅人出黎都做白領，人工又高；相比之下，服務行業嘅前線人員或者係藍領都係係讀唔到書嘅人先做，搵唔到錢。之不過，到左依家，周街不乏大學生，甚至拎完砂紙搵唔到工，又唔肯放下身段做前線嘅人大有人在。仲有就係有 D 腦細嫌新人無經驗，但係又出唔起錢請有經驗嘅人。一籃子因素嘅疊加效應之下，就造就左依家發育不全嘅勞動市場。

其實一間公司請唔到人，並唔係一個致命性問題，因為當「請唔到人」哩件事唔剩係存在於一間公司內，而係在存於整個行業之中，腦細就應該考慮一下進行 BPR （Business Process Re-engineering），去改變營運模式，又或者進而以 AI 或者機械人去代替，而並唔係單純迫啪我哩 D HR 去係咁請人。有好多報導講話好多行業將會被 AI 取代，會影響勞動需要，但依家問題係無人願意做哩 D 工嘛。舉一個例子，香港人壓力大，作為顧客平時返工已經積積埋埋唔少怨氣，有錢就發洩喺服務員工身上；作為前線服務人員經常被要求返工時要帶笑容，試問面對住一入門口就西口西面嘅顧客問候自己時，你自己笑唔笑得出？

即使請到人，一間公司又有無足夠能力去留住一班好嘅員工呢？每間公司都不乏害群之馬，絕大部分公司嘅腦細一日未見到公司員工同時辭職，都唔會放棄有問題嘅人。好多時候，如果 D 廢人做唔到某 D 工作， D 工作就會落左去做到野嘅人到。換句話說，姐係能力高可以獲得更多工作，但人工又唔一定成正比。你話啦，有邊個會繼續努力工作？

所謂窮則變，變則通。唯有改變思維，Think out of the box 先可以改變請唔到人哩個困局。你自問做到嗎？