關於Bonus 哩回事

繼上個禮拜講緊每年派錢，又係時候講下 Bonus 哩回事。Bonus 或者花紅都係有 D 吊詭既詞語，目的係用一筆賞金去慰藉一下班勞苦功高既打工仔。

話明 Bonus，絕大部分嘅情況下（當然要視乎實際情況，見最後的 Hea 爆冷知識），都唔一定出俾你，今年有亦都唔代表下年有，又或者咁講，公司高興就分俾你，唔高興就唔分，話事權完完全全掌握喺公司嘅手中。不過咁，大家偏偏就係對無能為力嘅事特別關心，關心今年有無 Bonus 出，出又會出幾多……

每間公司嘅做法都唔同，有啲四月出，有啲七月出，有啲十二月出，亦有啲喺農曆年前後出，但無論邊一個月出，都梗會聽過一句：「Bonus 出唔出，同出幾多，都係由工作表現以及公司業績而定。」聽落好正路，但係小編做做下都有 D 疑惑……

首先話要睇公司業績，但係點解我今年做 budget 嘅時候已經要估埋下年派花紅既數字？唔通準過睇相佬，預知到下年嘅全年業績實有得派？（係嘅話我都唔駛做打工仔啦！）當然，你可以話都係等公司預定筆數，等有得派果陣都叫有個預算。但喺咁多年入面，我又從來都未見過公司完左一年之後會調整返筆錢，到底係公司大方咁派，定係公司年年都賺到盆滿缽滿，派果筆錢其實已經係預低左條數？

工作表現哩部分，一般都會反映喺份 Annual Appraisal 到，腦細會同每個下屬做一次評核面談，然後喺份評核表上決定一個評分。一般由 A（最高）至 E（最低），以 C 級為合格。打工仔全年嘅努力，最後就只係換來評核表上嘅一個英文字母，然後再用個英文字母黎同我哋人事部換 Hello Kitty 公仔……多麼唏噓的人生哦 ~ （噴返一口事後煙）

我哋 Hea 爆嘅 HR 終於無得 Hea 了，要將每個同事嘅 Appraisal grading 入機，再由 HR 腦細細指示我哋入返相應嘅花紅數目。舉個例子，花紅一般以「相等於幾多個人工」嚟表達：

評分　　　花紅

A　　=　　2 個月

B　　=　　1.5 個月

C　　=　　1 個月

D　　=　　0.5 個月

E　　=　　0 個月

如果咁就決定到公司全部人既花紅數目的話，世事就唔會咁複雜……

因為完成左哩件事之後，喺派花紅之前嘅半個月到，會不停係咁開無限嘅會，就住以下哩三件事：

1. 某部門經理話收到風，佢下屬 Jack 最近有其他公司搵佢跳槽，所以想同我哋商量下到底出幾多俾佢，等佢可以考慮繼續留喺公司。當然，如果個經理無乜 Power 的話，維持原判；如果唔係的話，Jack 分分鐘用 C 嘅評分就可以拎到 B 級嘅花紅了。

2. 另一個部門經理向我地提出：「有乜可能 Jacky 份 Appraisal 會拎到 A，咁鬼 Hea，做出嚟嘅野又拿西！」就算份 Appraisal 係佢自己俾分都好，佢都覺得花紅高嘅係另有其人。結果梗係又俾佢講到由本身 2 個月人工，變到得返 1.6 個月。

3. 當 HR 腦細細同腦細匯報返各人嘅 Bonus 數目時，佢又有意見。雖然話正常情況下，公司最高領導人都無乜幾可會識哂全部嘅員工，但係佢有時候又會發表一下對某人嘅獨特見解：「咦？哩個 Jackie 上幾次開會見過佢，好似幾做得野架喎，分多 HK$5,000 俾佢啦！」（噢！難怪咁多人用盡氣力都想喺大大大腦細面前出下場！）

最後，到底份 Bonus 仲剩返幾多係真真正正同工作表現掛勾？我真係答你唔到……

咪住咪住，仲未完！得閒做埋個 Hea 爆冷知識先。

Hea 爆冷知識：

現行 Cap 57 《僱傭條例》第 11AA 條 (1)：「除非僱傭合約中有相反的書面條款或條件，否則須推定每年酬金或每年花紅不屬賞贈性質和不是僅由僱主酌情付給的。」就花紅而言，雖然成日一聽到花紅哩隻字就會覺得實係公司想俾就俾，唔想俾就唔俾，要睇返合約點寫花紅哩個 Term。當然，要告到上法庭都要考慮「一籃子因素」，包括睇埋公司每年出既花紅狀況而定（行為協議），所以都未必告得入嘅。如果本身無的話，最好加返落去條款到，有哂白紙黑字，慳返好多時間黎 Hea 嘛！

另外，第 11C 條提到有關非賞贈性質或者酌情發放嘅年終酬金或者花紅嘅酬金期（姐係 Payment Period，筆錢係 for 幾時到幾時）：「(a) 是僱傭合約就此而指明的酬金期；或 (b) 如合約並無指明，則以一個農曆年為酬金期。」換言之，姐係如果無寫的話，都係計農曆年。

除此之外，仲要留意返第 11F 條 (1) 提到嘅字眼：「(a) 其僱傭合約於以下時間終止─ (i) 酬金期內任何時間；或 (ii)    酬金期屆滿時；或  (由2001年第7號第4條修訂) (b) 於酬金期屆滿後，仍繼續由該僱主僱用」，仲有第 11F 條 (1B) 講嘅由僱員終止份僱傭合約……

姐係點呢？簡單 D，假設公司喺合約寫到年終酬金嘅酬金期係由 1月 1 日至 12 月 31 日，如果酬金期內 Last Day，理論上公司可以唔需要俾份年終酬金你。唔好諗住「車，我 1 月 1 號 Last Day 咪過左個酬金期囉」，因為要符合埋上面講嘅「於酬金期屆滿後，仍繼續由該僱主僱用」，姐係至少都要 1 月 2 號 Last Day 先可以 entitle 有。所以計到盡黎辭職嘅朋友就要小心啦，睇返到底自己公司幾時辭職先會 entitle 有 Bonus 同 Double May，丫唔係，係Double Pay……

免責聲明：小編只係一個 Hea 到核爆嘅 HR，唔係律師，一切冷知識都係睇僱傭條例學返黎，如有獨特見解或案例，歡迎分享、指教及討論 > v<