咁厚禮？

每逢到農曆新年，作為中華大地既子民，一定會秉承送禮同收禮既傳統，在過年過節起勢係咁買禮送俾親戚朋友。

雖然作為人類黎講既小編經常都諗唔明一點，就係你送盒天使跌落凡間既金莎俾我，我又在地上執返盒一模一樣既金莎俾你，雖然話大家張花紙未必一樣，但底蘊中依然係金莎，感覺就好似係自己買俾自己食咁，為乜？仲要用好多好多張花紙同膠紙，為世界沒日帶來一點貢獻。

咁傳統都無計，唔送實會俾 D 親戚朋友媽叉，仲要講足幾十年。所以小編曾經有諗過收完盒禮之後拎入房，用另一隻花紙包返同一盒做回禮。正當閃過哩個念頭既時候，點知已經俾人搶先一步，用返同一盒金莎做回禮。點解我知？因為包花紙既時候，個包裝唔小心俾我刮花左少少，仲要同一個位，有無咁橋？

當然，商界就更加要送禮，甚至個幾月前已經要諗定送咩俾人，同埋預返 budget 同留定 D 貨，一來要俾人知你既存在，二來都要打好下 D 關係。作為 HR，到左農曆新年前夕，一定收到強積金公司寄 D 蘿蔔糕呀、年糕既禮劵黎，哩 D 就算啦，都叫有 D 野可以私底下分左佢。

點知有一年既農曆新年前夕，同其他部門既同事一齊去見個供應商（雖然到依家都仲係唔明點解乜都關 HR 事，明明小編既存在感已經極低），討論完正經野之後，佢無啦啦問我地既店舖有邊樣係好食，接住仲問有無賣年糕，咁個同事梗係話有啦，諗住佢好似有 D 興趣，順便 up-sell 下。

雖然小編心底裡覺得個年糕極難食不特只，仲要其他野食都係極難食，不過算啦，增加下 sale 都要既，話唔定年尾份花紅都會大份 D。

講到佢心郁郁，佢隨即買左一大盒年糕。

哩個時候小編心諗：「買完野，應該走啦掛，都係時候食個飯 Hea 下啦。」

點知，眼見佢將拎住袋年糕既手伸出黎，然後話：「都就黎農曆新年，送俾你地公司做賀年禮物。」

Er……

嘩！真係多謝你唔少喎，當住我地面，買我地公司既野，仲要送返俾我地，這是甚麼玩法？見佢仲笑笑口咁，莫非依家哩個舉動其實在商界係正常不過？

當然，見慣風浪既小編在窒左兩秒之後，雙手接住，連忙講多謝。

雖然就咁睇，哩個舉動就唔係幾得體啦，在於公司既立場黎睇，咁無 sense 既供應商，下年應該未必會再簽。但係在小編既立場，其實都無乜野既，都係一番心意姐，簡單 D，有 免費野，你就收左佢啦。（不過記住收之前溫下防止賄賂條例先）