關你叉事？

作為一個 HR 既人才，有時候真係見人多過食飯（一日見 4 個人都已經多過啦！），但有時候唔係太明白其他同行既某 D 行為。

話說有一次，小編自己作為 Candidate 去見工，大家都循例都問完基本野，包括以往既工作經驗、對工作上有咩期望、點解對哩間公司有興趣等，哩一類既話題。

跟住對方 HR 就話：「我另外都有 D 問題想再問你」

果一刻，我仲以為佢問漏左 D 咩……

對方 HR：「你屋企有咩人？同邊個一齊住？」

欸？當下我只係諗到一句野：關你叉事？我同邊個一齊住關你關家姐事，定關份工事？咁出於大家都係同行，好，我照答。

我：「我同父母一齊住。」

對方 HR：「咁即係 3 個人一齊住？」

我：「係。」（咪理我答真定假先，就睇你想玩咩。）

對方 HR：「咁你爸爸媽媽退左休未？」

我：「仲做緊野呀。」（未退休關你叉事？我剩係知我未退休。）

對方 HR：「佢地做邊行？」

XYZ##%%XYZ##%%

我依家相親咩？定考緊紀律部隊？要查我家宅？

為左保持禮貌，求其同佢講話我爸爸做緊 I-Banker，媽媽做緊家庭主婦，點知佢竟然咁講……

對方 HR：「下？咁你屋企咪得你爸爸一個賺緊錢？」（我裸辭左又真係待業）

……

老實講，雖然曾經都有 D 同事係咁問人借錢，但至少一睇我個 Look 都知我唔係 D 隨便問人借錢既人啦（誤），而且依家又唔係搵你借錢，查我家宅做咩喎。（就算真係借錢，依家出面求其一間入息證明都唔駛啦）

問多兩問，我諗哩份工都係唔岩我。公司既 HR 係咁，都真係幾趕客……

有時我地面對應徵者，問就一定唔會直接開宗明義咁問，無謂令人尷尬又反感之餘，仲可能有家庭崗位歧視既問題添，到時就麻煩。當然，想知道的話都可以用旁敲側擊既方法，例如問下平時有咩做？有無車開屋企人去旅行呀？從而得知對方家庭背景。又可以講下依家 D 小朋友要關心多 D，或者講下平時有無孝順下父母，陪佢地去飲茶，從而知道大概爸爸媽媽或者小朋友做緊邊行，或者駛唔駛返 Shift 之類。

作為一個雖然好 Hea，但係好專業既 HR，時常要留意觀察應徵，係你問完問題之後會唔會有咩眉頭眼額，從而要反省自己問既野有無問題，以成就 Hea HR 大師之路。（誤）