新一年搵新工

恭喜，賀喜，喜上加喜慶雙喜，更祝每年獲厚利 ~ ♫ ~ ♫

恭祝大家新春慶新歲，未拍拖既早日有拖拍，未結婚既早日拉埋天窗，未生仔既兩年抱三……

雖然今日就赤口，不過都叫正式踏入狗年，又差唔多係時候派錢同等到 4 月加人工，過埋之後就梗係拜拜你條尾，由依家哩個地獄跳去第二個地獄，務求 65 歲前可以跳返上地面，過返人類應該過既生活。

咁岩小編襯住新年整理枱面既時候，有份鋪左塵既 2018 Asia Salary Snapshot，見到話有 73% 既僱主願意俾 Counter offer D 辭職既同事，但只係得 38% 既打工仔係會接受，同埋留多一年。

哩樣野令我諗返起以前 CTgoodjobs 有篇文（自己 Google 下啦），話唔同時期辭職有唔同理由：

入職 3 個月：個人能力同工作性質契合度太差；

入職 6 個月：同上司既處事方式磨合唔到；

入職 1至 2 年：接受唔到公司文化同價值觀；

入職 3 至 5 年：缺乏學習機會；

入職 5 年以上：原地踏步無新突破。

你話啦，如果用返哩個邏輯去諗，到底腦細俾既 Counter offer 彌唔彌補得到以上既原因先？絕大部分既腦細所謂既 Counter offer 就係加返你一千幾百，想你留多段日子，吊住鹽水先。老老實實，有幾多個腦細或者 HR 係認認真真幫辭職既同事做 Exit Interview，認認真真問清楚到底 D 阿仔阿女點解要離開先。

話說最近派完錢，收到幾個主管遞信。平時其中一個主管 H 周不時都會上黎小編 Office 呻下佢地個經理點樣發癲（堅係癲果隻，會鬧人，同埋會做勢打人），同埋係咁呻話過埋年就會走。無奈地老闆又鬼死咁鍾意個經理，咁我地哩 D 咁 Hea 既小薯梗係食住花生睇好戲，同埋成日同佢講用 Cap 57 僱傭條例 Section 10 (a) 直接走人啦，點知佢又淆底。終於，係 2018 年踏出左新既一步，真係辭左職了。

搞笑既位就在於當班主管一齊俾辭職信個經理既時候，佢只係苦笑左一下就放低左，隔左一段時間之後，就叫左主管 H 去佢個位，然後問佢：

「到底點樣先可以令你唔走？」

WOW ~ 小蟹柳 ~

仲以為平時扮哂蟹鬧人同裝兇作勢打人，係想迫走人添，原來一知成班一齊走佢就會搞唔掂。

那，哩 D 就係人版。「咩叫衣冠禽獸，就係我哩 D。」（誤）

當然，主管 H 雖然暗地裡想 Hi 佢，同埋講「如果你走，我咪唔走囉」，不過都已經搵到新工，哩句野梗係吞返落個肚到，睬佢多一句都哂氣。

當然，人工都係其中一樣野。每年睇新聞話有機構做完薪金調整調查，加薪幅度為 2% – 5%。OK Fine，小編依家係到可以預言，黎緊 10 年既加薪幅度都係2% – 5%，而平均既加薪百分比都係 3.5% 左右。

腦細成日諗既 Counter offer，美其名就叫 offer，實質上就係你既 salary review。我走既時候你先加人工俾我，唔係證明左你覺得我有幾重要，而係證明左你一路都 underpay 緊我，仲要我擺下姿態先肯俾我。同埋加得一千幾百，計計埋埋同 salary review 條數咁似樣既？

人工追唔上通脹就既成事實，自沙士之後有邊年追得上？但係人工低都算，你仲要侮辱人哩下可惡。

一句到尾，到底腦細你知唔知打工仔點解想走？