你想改咩英文名？

成日對住班外國人，見埋哂成抽成抽咁上既 Middle Name，好似見到 D 咩 「Ampaphilia Great Wall S. Skywalker」 哩類呢，睇完都唔知個姓係 Ampaphilia 定係 Skywalker 定係成抽都係佢個姓……

本身以為係外國人先多古靈精怪名，實情係香港人都大把，仲要個名叫出口都實俾人改到花名。

老實講，除非一出世就係哩個名。如果唔係，改咩名係閣下既自由，例如叫下「肥脾（Phoebe）」、「矮肥（Ivy）」或者「蘿蔔（Robert）」都無咩特別，但仲有 D 名的確會令其他人有幻想。以下係睇 CV 既時候，見過最神奇，拍埋一齊企會變五星戰隊既名。

Alien — 異形？！我堅有興趣一睹廬山真面目。

Sweetie — 如果係個女仔既都幾有遐想既，好可惜佢係一個男仔。雖然我無性別歧視，但我嗌唔出口，我怕嗌完會嘔左出黎。

Cupid — 一位 50 幾歲幾大叔，唔知撮合左幾多姻緣呢？（以防萬一你唔知邊個係 Cupid，佢就係傳說中係咁射箭既丘吉爾？丫唔係，係丘比特。近年好似認錯左 D 男仔頭）

Emperor — 可能依家興，我跟唔上潮流。反正打工仔就無咩前途，高壓統治成就大器。

Keepwin — 成日贏？Keep 住贏？係咪賭馬賭得多上左腦？定係信得 FB 果 D 咩五百變五萬既人太多？

改得哩 D 名，某程度上都請得過既。因為俾著係我， D 人叫左咁耐我個名，無返幾公斤勇氣都唔敢應。

其實我都係想叫你先嗌你個名姐，斷估你都唔想一嗌你個名，跟住成村人望返轉頭……或者最後只可以書面或者面書溝通算了。 

曾經聽過有個師兄話傳統既公司見到男應徵者要有返個易嗌又 Man 既名先大機會 D，而女既就要斯文 D 同優雅 D。小編就唔係咁認為啦，因為雖則小編我兩隻都唔係，但都叫有幾獨特（至少香港無人會叫哩個名），發覺又真係有多左 Interview 同收到 Offer 既機會。所以話呢，有時候有個獨特少少，睇落又有少少氣質既名，的確會為你帶來機會，而小編就有一個咁既名啦，大家恨唔到咁多。

當然，最重要既都係顏值唔可以太低分……（笑）