Annual Dinner 醉酒多蘿蘿

話說第一篇係講 Annual Dinner，而小編咁岩哩排又完左，諗返起少少 Annual Dinner 既趣怪事。

基本上 Annual Dinner 要做 MC，已經係 HR 既份內事，而飲到爛醉如泥就係台下班同事必做既事。有一年，開席之後都無一個半鐘，已經醉到 D 經理面紅耳赤。新同事唔知自己酒量就話姐，點知上年醉到瞓左係到既舊同事，到今年都仲係飲到咁醉。仲記得上年去到最後仲要迫我地狗衝返公司搵佢個 P File，再打俾佢個緊急聯絡人，然後叫佢黎接返個同事，真係聽幾多次都識笑。

當黎到抽獎環節既時候，坐最前果班醉左既經理，已經開始起哄緊，茶壺都扑爆左幾個。而咁岩抽緊豬肉獎既時候，有個日本經理抽中左，就拎埋枝酒出黎排隊等領獎。話明豬肉獎，咁梗係有成村人走左出黎拎禮物啦，佢等得唔耐煩，就開始破口大罵，話咁耐都未到佢，咁岩佢又同台上做緊 MC 既 HR 夥囝囝都幾熟下既，就吹左兩句，同埋問佢做咩咁耐都未到佢，跟手好大力咁拍落佢個頭到，見到個 HR 囝囝勁尷尬咁想打返佢轉頭，但又要笑笑口咁叫佢過去拎禮物，果下真係心諗好彩唔係我哩個 HEA 友。（我哩 D Hea HR 梗係適當時候哩埋等埋尾）當個經理拎完禮物之後，仲要一野大大力咁拍左落去 HR 囝囝個 pat pat 到，真係聽到啪左一聲，台上另外 D MC 都笑左出聲。去到最尾，幾經辛苦終於請左個經理返落台慢慢繼續完成埋佢枝酒。

去到最尾既時候，心諗：「終於埋尾啦！等 HR 囝囝講埋哩句野就完啦！好野！」

點 Q 知半路殺出個程咬金，無啦啦有個日本腦細係咁用日文係到大聲嚎叫。起初大家都聽唔清楚佢到底講緊乜，因為醉左講到 1999，所以 HR 經理（唔識日文）以為佢飲得太 HIGH，要講返 D 多謝呀、恭喜既說話，然後跟手就隊左枝咪俾佢，然後仲叫 HR 囝囝俾埋枝咪佢個秘書做翻譯。唔講由自可，一講就出事了。

日本腦細：「馬鹿野郎~~~~~~~ XYZ%$#ABABAABBABAXYZ」

Hea 底既我剩係聽得明第一句馬鹿野郎，其他都唔知佢鬧緊乜，好彩個秘書醒水知唔對路，即刻搶返枝咪，然後幫佢兜話佢講緊 D 恭喜說話，當然其他日本膠層都知咩事。我都係問左好多枝針，先有人肯話我知原來佢壓力太大，所以係到鬧 D 人對佢唔好。真係好慘 T^T 原來腦細都咁大壓力架，都係做一個小小既 Hea 底 HR 好過了。

飲酒真係會亂性，仲可能會搞出人命（可能又會多左個人）。最後都係奉勸大家一句，「喝酒不駕車，駕車不喝酒」。