0o HR 扮工週記 o0

做 HR 需要嘅心態 坊間一向都有唔少做開 HR 嘅同行分享下做 HR 需要啲咩特質，今日小編都分享一下個人睇法。 1. 溝通能力好 唔駛多解釋啦，相信唔止剩係 HR 哩個行業需要，尤其是當公司入面， 18 歲岩岩出黎做野，去到就黎 65 歲退休嘅同事都會黎搵你嘅時候，你自然會明白…… 2. 記性好 一日見完咁多個 Candidate ，要記得每一個有咩特別，腦細問你 Recommend 邊個嘅時候又要即刻講到俾佢聽。不過小編記性就奇差，好彩有返啲小聰明頂到一頂…… 3. 守得秘密 當你知道每個同事咁多個人資料，小編相信每一位同事都唔會想你開心 Share ；而當你知道邊個同事就快升職，或者另一個同事就黎俾人炒，喺公司正式出 Memo 公佈之前，你亦只可以當唔知。就算見到當事人都唔可以提起，如果俾人知你傳左出去，你就 GG 了。 4. 睇得開 點解？因為工作上都有好多時候會接觸同事嘅資料，包括人工、地址、年齡等。雖然平時同事間嘅接觸，可能都會透露相關嘅資料，但相信全公司應該得 HR 可以一次過知道所有同事嘅資料。好快你亦會發現世界係充滿不公平嘅。（你話小編老土都係咁講架啦……） 腦細上年先好高興咁話自己終於上到車，死慳死抵咁買左奧運站上蓋一個單位。點知過左幾個月，公司有喜事， IT 部門一個男同事結婚，婚後佢將新地址交俾小編。 咦？又係奧運站上蓋嗰棟野？仲要同一座？唔好問小編點解一個月薪 3 皮野都唔夠嘅同事可以住到一間過千萬嘅豪宅，依小編估計，佢可能娶到個有米老婆。 之後，小編做 Payroll 嗰陣，好快發現又係 IT 部，頭先講嗰個男同事嘅隔離位，同小編一樣年紀，一樣年資，一樣 Grading 嘅同事，人工高過小編幾千蚊，小編又真係有睇過哩位同事嘅 CV （哩啲資料對 HR 黎講，簡直可以話係垂手可得）。不過講又咁講，人哋一入行個 Starting Salary 已經高過小編，做 IT 相對黎講係高啲嘅。小編當然都係睇完就算，好鵪鶉咁當唔知算了。 到年尾加人工、出 Bonus 嘅時候，又會令小編覺得公司真係好特別。唔少人都投訴過嘅 Peter ，話佢啲野跟唔足，又唔負責任，但當公司加人工嘅 Average 係 4% 嘅時候， P...

中秋節快樂 下個禮拜就中秋節，預祝你人月兩團圓先，不過提提你，中秋節分手率高達 78% ，要小心啲睇住自己另一半啦。 每年中秋節， HR 朋友仔可能都梗要諗下到底派咩好。如果你公司平時無派開嘅話，真係恭喜賀喜，因為你少左好多野搞；有派開嘅話就要諗下買邊間嘅月餅黎派，又要就埋拎餅時間。有時候突然又話要新野，又話要配合 CSR ，唔派月餅，改為派其他野，可能係社企整嘅手作仔啦，又或者係曲奇餅等等，總之就係一個字，煩！ 小編做過一間都幾大嘅公司，正正就係有一年，當小編嘅腦細照舊拎個派月餅 Plan 入房傾嘅時候，個大腦細突然話要搞搞新意思，同埋順便做下形象工程嘅野，結果要小編嘅同事去同啲社企傾下，要訂人哋嘅曲奇餅。 喂呀，又係無野搵野黎搞，唔係話幫下社企手唔得，亦都唔係話唔應該有新意，之但係點解中秋節要派月餅？華人社會嘅傳統黎架嘛，派咩曲奇餅姐……再講，你肯出錢嘅，曲奇餅幾時派都得啦，駛乜要中秋節先黎派，分明就係厭月餅貴。仲有呀，公司大大話話幾千人，我當你每個同事送 3 塊曲奇，就算曲奇餅相比起月餅黎講叫易整好多，但你要對方咁短時間內起差唔多成萬件餅出黎俾你，真係阿荗整餅啦。仲有呀，派嘅時候，啲同事又喺到呻話年年都派月餅，問做乜今年大縮水要派餅，又要小編個部門同同事解畫，扮咩形象工程姐，公司個形象工程咪又係 HR 黎做…… 小編亦做過一間公司實在對同事幾好嘅，年年都派月餅架啦，不過有一年突然話考慮到有啲同事唔食月餅，所以特登整多兩款野出黎俾同事揀，就係超市禮券同埋咖啡店禮券。點知做完統計到底每樣有幾多人要，竟然一面倒勁多人揀咖啡店禮券。然後問左一問間咖啡店，原來咁啱嗰期全線嘅禮券都賣左好多，唔夠俾小編，最多都只係俾到小編需要嘅一半，結果要同嗰班揀左咖啡店禮券嘅同事解釋，然後叫佢哋揀另外一樣，結果成件事又做多次。 不過算啦，反正搞得掂就得啦。點知原來你對人好，人唔一定對你好。拎餅嘅時候，真係咩花款都出哂黎：有啲同事埋怨點解月餅唔揀流心奶黃嗰隻，話唔想要；有啲同事投訴話做咩只係得一個禮拜拎餅，拎唔切；又有啲同事就臨時話唔想要月餅，問可唔可以改要禮券。大佬呀，你揀嘅時候知道唔係流心奶黃，你自己揀架喎，唔好又臨時話哩樣嗰樣，有得俾你揀仲想點。同埋重點係有月餅送俾你就拎啦，理得你自己食定係派俾人，俾左你就自己搞掂左佢，三分顏色...

你估 HR 好想壓你價咩？ 打工仔：放假先黎打風，唔通連個天都唔鍾意打工仔？ 老闆：聽日一定會好天嘅…… 打工仔：你又知聽日會好天嘅？ 老闆：因為希望在明天丫嘛…… 打工仔：生命無希望，前路白茫茫（唉） 依家十號風球 + 紅色暴雨警告，大家記住要留喺安全地方暫避，養好身子聽日準時返工收拾殘局！ 小編成日都聽到唔少朋友仔去見完工之後，都嬲嬲豬話 HR 壓佢價……真係冤枉呀法官大人！乜你以為 HR 壓人價好好玩，好過癮咩？ HR 又唔係 Sales ，又無 Quota 話壓得價多，就有 Commission 分返俾小編（如果有，求大大話俾小編知）。無得分嘅，小編點解要落咁多嘴頭去壓你價喎。 大家都係打工仔，打工仔嘅心情，小編點會唔同情？就算壓到個人工低一低，而個 Candidate 又咁都應承返工嘅，一開始個心都已經唔舒服，有條刺啦，仲點會指意佢留得耐。轉個頭佢騎住小編隻牛，做唔夠 2 、 3 個月就走去搵對家隻馬（可能俾多左時間佢添），咁咪仲搞著小編幫佢做完入職做離職？！公司啲錢又唔係小編啲錢，小編都廢鬼事同佢慳。有時 Hea 啲咁諗，如果可以嘅話，小編想公司俾多過個 Candidate 嘅 Expected Salary 添，咁請人哩方面就容易同簡單好多，俾 Offer 嘅時候亦都快好多，唔駛講咁多野去同個 Candidate 解釋點解俾低啲人工，佢條氣又 Gur 啲，覆得又快啲（除非突然覺得高價請自己有啲伏之外）。你估解釋完一輪，然後俾個 Candidate 嫌棄好好玩咩？！ 講到小編千萬個唔想，咁點解仲要咁做呢？其中有一個非常之常見嘅原因，係你未來嘅腦細突然發覺唔對路，想慳返啲，或者係佢駛凸左，搞到部門 budget 唔夠用，所以咪唯有叫 HR 做醜人同個 Candidate 講囉。你要知道，雖然佢叫腦細，但佢背後仲有一個大腦細，個腦比佢更細，爆左 Budget 分分鐘俾大腦細召去照腦。 另外，仲有原因就係因為個 Candidate 要求嘅人工，高出間公司現職同等職位嘅人工好多。唔明？簡單啲，姐係例如間公司一般有幾年經驗嘅侍應袋緊月薪 HK$16,000 – HK$18,000 嘅，而個 Candidate 唔知做乜鬼開 HK$...