0o HR 扮工週記 o0

開堂 Training 教寫辭職信 小編成日都講一句，合則來不合則去，覺得唔適合的話，走唔係問題，但係辭職唔好搞著大家啦。如果你係第一次辭職嘅， OK Fine ，當你唔識寫辭職信，但係如果你轉過一兩份工，或者有返少少 Sense 嘅，麻煩上網搵搵，到底咩先叫一封正正常常嘅辭職信。大家睇睇平日 HR 收收埋埋點樣嘅辭職信…… 1. 用公司信封 + 公司信紙 經常有同事走上黎遞信，真係齋遞信，又唔講咩事。未打開封信，剩係見到個信封，小編已經心諗咩料？唔通之前出嗰封 Bonus 信打錯左？喂呀！打開左封信發現係辭職信黎嘅……先唔講公司信封同信紙係代表公司出嘅正式嘅書信呀、合約等等，你自己辭職可唔可以用返自己嘅紙？一張白紙已經好足夠架啦，如果你想慳，可以唔駛信封都可以，但最低限度唔好用公司嘅信封或者信紙去做私人野。 2. 色香味俱全 上面講到用白紙，無錯，用一張純白嘅紙張，或者用環保紙張（唔係講緊背頁寫左野嘅環保紙，係用環保物料整出黎嗰啲紙），但係唔知點解成日小編收收埋埋嘅信都係色香味俱全，試過有茶漬、油漬、水漬；又試過真係用環保紙，後面畫到花哂嘅；亦都試過摺左幾廿摺，摺到連啲字都好似睇唔到咁。 3. 上款寫上司名但交俾 HR 睇真啲封信，上款寫上司個名。嗯，無咩問題丫……咪住？咦，點解係個同事自己親手交上黎小編到嘅？問多兩問，發現原來個同事無俾上司，直接交左上黎俾 HR ，仲要話封信交俾 HR 都係一樣姐……唔該，一唔一樣唔係你講，既然你上款寫俾上司嘅，你就好自己交俾上司啦，當小編係咩？你 Personal Assistant 呀？幫你交哂俾相關嘅人士？ 4. 今日寫信跟住今日 Effective 再睇落去，寫到 Effective Date 係今日……咦？即日通知？要賠錢喎……再問下，原來同事知啲唔知啲咁，以為 Effective Date 係寫寫信嘅日子，搞到變左今日寫信今日 Effective …… 5. 唔簽名 去到最後，唔簽名！唔簽名代表咩？代表任何人都可以被辭職，小編求其寫一封信去幫求其一個同事辭職都得，甚至幫你直接今日辭職，等你賠錢都得？唔簽名嘅辭職信你話有無用啦…… 老老豆豆，到底幾時先可以唔收千奇百趣嘅辭職信？唔該唔識寫辭職信嘅朋友仔，睇下下面...

你哋到底想唔想請人 失業率哩個數字講都累了，從來都唔係一個指標，而好多公司長期都請唔夠人。依家發覺喺香港做 HR 做到好似做 Sales 咁，有時又會俾人捽數，話點解咁耐都係請唔夠人，最慘係 Sales 都叫有 Commission ，做 HR 無呀大佬。 其實邊會有完美嘅人選，所以如果個應徵者符合大部分要求， HR 都會嘗試 Sell 俾部門阿頭。有啲阿頭都會去 Try Try 嘅，但遇到以下嘅反應，真係吹漲…… 1. 「點解個 Candidate 咁樣衰？」 / 「嘩！乜佢咁肥嘅？」 大佬呀，個樣天生架嘛，你估人哋想架咩？個個都想做靚仔靚女。同埋小編想問，依家選美定請人？前線嘅同事你對佢外表有一定要求，小編都可以理解，但後勤呢？到底想俾邊個睇？當然啦，有個靚仔靚女花瓶，就算坐喺到都可以提高士氣，賞心悅目。之不過咁，你要明白，就算有奇貌不揚嘅人，佢哋嘅工作能力都可以係好高，講野都係可以好有趣嘅。而更重要嘅係，如果真係靚仔靚女嘅，會唔會揀你間公司先？請人同揀男女朋友一樣，你揀人時人揀你。 2. 「嘩！乜佢住咁遠，會唔會成日遲到架？」 哩啲野似乎唔關其他人事，咁你想點？叫佢搬近啲？老實講，住喺邊同遲到係無直接關係的。小編有個朋友住天水圍，朝朝返北角，其實車程一個鐘頭鬆啲搞掂。當然，小編問佢辛唔辛苦，佢都話有啲遠，搭車來回都去到轉台灣嚕，但人工同福利相對黎講高少少。成日講一句就係，食得鹹魚抵得渴， Life is full of options ， You make your choice, man 。你知道係返咁遠，又要去 Apply 份工，而人哋又請左你嘅話，就無得怨，要努力準時工作，哩個係態度嘅問題。 3. 「佢上一份工做得咁短時間……」 小編承認上一份工做得短時間唔係太理想，但都要睇埋其他因素。做得短時間未必係個 Candidate 嘅選擇，可能係完左約、公司執左笠等等。如果畢業唔係好耐嘅年青人，未必搵到自己條路而轉工比較頻密少少都係可以接受嘅。畢竟有時候唔好太自私， succession planning 唔只係公司內部要做，其實哩個社會都要做 succession planning ，俾現時嘅後生仔女接觸多少少，等佢哋盡快搵到佢哋理想嘅職業，咁樣對整個社會都...

工作量大到不行的 HR 講到工作量，其實無論邊個行業、工種都無咩太大分別，總之都係多、多、多。當然，小編以前做暑期工嘅時候，都上過一啲 Office ，嗰到返工嘅職員每一日都係食住生果睇住戲，或者開住 Youtube 咁等運到，而哩種咁嘅寓工作於娛樂嘅工，亦係小編一直夢寐以求的，但現實中絕大部分都係工作量極多嘅職業， HR 亦係其中一樣。 不過今次並唔係要講到底 HR 平時要做啲咩，因為大家都略知一二，雖然可能唔夠深入，但係都係容後再談。唔知大家仲記唔記得做百貨公事總部 HR 嘅大隻仔，佢最近又講返起啲往事，其中一單就係佢曾經有一個奇葩 HR 同事，真係掂到氹一聲， send 左個 Email 俾店舖班 HR ，完全係令人汗顏。 奇葩人入左職大約一年到，隸屬於薪酬福利組，不過哩一組人其實都係得兩丁友，佢地平日除左要搵下料做下 Benchmarking 之外，又要跟埋全公司連店舖嘅工傷（店舖 HR 填好 Form ，報上黎俾佢再補充資料同寄俾相關部門）， R 下 Sponsor 俾啲福利同事，同埋跟下醫療福利呀、勞工保險嘅野。你話多野做又唔算多，但係 Paper Work 就一定走唔甩，尤其是工傷 Case ， 14 日內報上去俾勞工處，又要俾埋保險公司，到 Close File 嘅時候等勞工處出信都要等兩、三個禮拜。有時個 Timeline 疊埋一齊，收信拆信都拆到手軟，仲未計店舖 HR 用 Internal Mail 寄野上黎…… 有一日佢終於要爆啦。結果，佢就出左一個令人汗顏嘅 Email ，大意就係話「佢每日都已經有好多野做，包括影印、收信、拆信、跟工傷等等，叫啲店舖 HR 咪鬼成日都郁啲就打上黎問佢到底啲野邊個跟，同埋寄啲唔關事嘅野上黎俾佢」，再跟住喺個 Email 底到附上埋薪酬福利組嘅分工。 就咁睇大概，好似無咩問題丫？都係釐清返到底啲野邊個做姐？好似都正路丫……之不過咁，佢表達得實在太差了，咩影印、收拆信呀等等，佢寫嘅哩一大堆工作一般所有 HR 同事都日日做緊，大家都係 Suffer 緊哩樣野，又豈只有奇葩人一個呢？ 另外，奇葩人出嘅分工表，係完全無同 Teammate 溝通過……點解小編會知道？因為張分工表入面， 10 樣嘅薪酬福利工作，有 8 樣都係分左俾...