0o HR 扮工週記 o0

廁所奇遇記 廁所可能同你嘅日常工作可能無咩大關係，而你亦都可能唔會太關心扮工室廁所嘅情況，但係無論你想唔想都好，扮工時間內都一定會「幫襯」下個廁所。當然，次數多少就因人而異。小編想講嘅係，有時喺廁所見到嘅野真係可以驚嚇過你平時嘅工作…… 事件一：小姐……你邊位呀？ 驚嚇指數：一粒星 經過晨早長征咁款，終於返到公司，多數都會先去一去廁所，作為一整天嘅開光儀式。 一入廁所，未行到入廁格，有位化緊妝嘅小姐突然問：「今日個 Training 係 10 點定係 10 點半？」 廁所無其他人，佢應該係問緊小編我。 等等先？小姐你邊位呀？！ 答左佢之後，我一路都思考緊佢到底係邊個。幾分鐘後，我行出廁格佢已經化完妝。 噢……原來係 Marketing 嘅 Tracy ！嘩？點解幾分鐘前後完全唔同樣嘅？學黃子華話齋，認得到嘅叫化妝，認唔到嘅喬裝！高明，高明。 事件二：你哋真係好污糟呀！！ 驚嚇指數：二粒星 唔係單一事件，小編真係真係好多次喺廁所見到由廁格行出黎嘅同事唔洗手就直接離開廁所，搞到小編完全唔想掂其他同事掂過嘅野。嗯，即係所有野……你試諗下，行出廁所門口嘅時候，已經要掂門嘅手把。感覺上，就好似直接掂住同事嘅一個部位咁…… 事件三：神婆作法 驚嚇指數：三粒星 有次行入其中一個廁格，鎖門後一個華麗轉身。 嘩！我啤你個啤丫，到底小編我睇左啲咩？！有一張用過嘅 M 巾痴左喺道門到！我開門嘅時候都驚張 M 巾會跌落黎……可能哩位同事岩岩俾腦細照完肺，但係都唔駛將用完嘅 M 巾，好似道符咁痴喺廁所道門上面架，可能去打小人會有用啲。 事件四：個廁所流血呀！ 驚嚇指數：四粒星 試過有一次見到其中一個廁格，有唔少過 10 條血痕，由廁板一路沿住個坐廁滴落個地面到，而啲血痕嘅位置係圍住個坐廁…… 突然有一刻小編怕同事失血過多…… ！下方高能注意！ 事件五：你到底點去廁所架？！ 驚嚇指數：五粒星 某一日小編推開女廁道門，未行入去已經聞到惡臭……諗住睇下咩事，真係唔睇由之可，一睇就簡直癲倒左小編嘅世界，環繞世界好似環迴立體聲 Dolby 3.0 咁…… 其中一個廁格好似岩岩經歷完生化襲擊咁，情況就好似有人將啲 SSS 引爆，令到個廁格嘅 360 度都不

真．真假 MT Programme 好啦，上個禮拜小編已經好勵志地叫大家最緊要保持好自己應有嘅態度，相信大家唔理係畢業牛定係打左幾年工嘅老牛，應該都有反思過自己態度上嘅問題啦掛（小編真心希望你有啦）？咁哩個禮拜就俾返少少詳細資料大家，等大家有返個心理準備。 相信差唔多每個人都經歷過搵工嘅日子，除非你係由爸爸、媽媽幫你搵工，或者係幫屋企人打理生意，自己 Un Un 工坐喺到就有工開，如果唔係都一定有哩種經歷。每年最受大專生歡迎嘅空缺正正就係 Management Trainee ，而好多大公司亦都會去各大專院校搞 Recruitment Talk ，從而吸引大量求職者應徵 MT 哩個位。之不過咁，到底哩個 MT 位有咩吸引力？ 1. 入職薪金相對較高 唔計上個禮拜提過嘅名利不收嘅假 MT ，一般銀行、跨國企業、本地上市公司等等嘅 MT 職位，起薪點都係由 20,000 蚊開始，最低限度都比一般大學生平均起薪點嘅 15K 高 3 分 1 ，尤其是對唔係專業資格嘅商科畢業生有一定嘅吸引力。（咩叫專業資格？簡單啲黎講就係有得考牌嘅，例如會計師、醫生、飛機師等等。雖然小編作為一個喺香港嘅專業 HR ，但好可惜都唔算係有專業資格 …… ） 2. 升職快 MT Porgramme 一般為期 1 – 2 年，而哩兩年期間，差唔多每 3 個月至半年時間，就會將你調去唔同嘅部門或者 Team 去實習，要求你對公司一啲主要範疇同職能都有一定認識。而順利完成 MT Programme 嘅 MT 仔女，外加少少運氣同際遇，已經半隻腳踏入管理層道門（去到哩個階段，可能只係中層，但都已經快過一般人好多），成為被 Succession Planning 考慮嘅人物。講升職，其實到最後都係講返 $ 字，話到明管理層，人工梗係有返咁上下。 3. 其他福利 除左 $ 之外，又點少得其他福利，假期、保險、退休金額外供款就唔駛講，有啲公司更加會 Offer 一啲大部分人夢寐以求嘅福利（真係只有某啲公司 …… ），就係唔駛首期買樓！！！丫唔好意思，小編嘅意思係公司會借足錢俾你 …… 當然，如果你真係借左，個 Rate 雖然極唔錯，但係你就唔駛諗話轉工嚕 …… 如果一切順利，你又會比其他人更快成為一個「成功人士」

真假 MT Programme 話咁快 7 月都過左一半，想當年小編業都未畢就已經揸住兩個 Offer 唔知揀咩好了，其中一間係 NGO 黎，當日同 NGO 個理事長 Interview 完左之後， send 左封 Thank You Email 俾佢，跟手佢已經好快地覆，仲打左篇千字文俾小編，話俾小編知黎緊到底條路可以點行，佢仲話年中唔少人都 send Thank You Email 俾佢，但唔係個個都覆。雖然到最後小編都係選擇左入 Commercial World ，但亦經過哩次獲益良多。 之所以點解用哩個故仔黎開頭，除左想話俾大家聽小編有幾勁之外（誤），就係想同大家講一樣野，每個人條路要點行，可以係千變萬化，不過如果有個明燈點一點條路，至少行少好多冤枉路。當然，就算行錯左冤枉路（小編都行過），咪當用時間買個教訓囉…… 好啦，入正題，相信應屆畢業生有部分已經好似小編咁，揸住 N 個 Offer 唔知揀咩好，而其中最大嘅考慮之一就係各大企業嘅 MT Programme 。不過記住一點，雖然捉到老鼠就係好貓，但係做到 MT 未必係好事，因為坊間有好多都係掛名 MT ，名利不收。 唔知大家仲記唔記得小編有個朋友叫大隻仔，佢曾經做過百貨公司嘅人事部，後期佢上左總部做培訓，而其中一樣野就係要跟 MT 哩個大 Project 。當佢第一年跟 MT 嘅時候，睇返以前記錄，然後佢發覺出事了，因為條 Team 換左幾代人之後，依家成個 Programme 除左一開波嘅入職典禮同埋 Orientation 之外，其他乜都無！？其後問一問經理，點知得返黎嘅答案係…… 因為前線一直都請唔到人，所以每年就請一班 MT 嘅人返黎，然後就掉哂佢地落去舖頭到，幫補下前線人手不足嘅情況，順便美其名叫配合返公司文化，而且又可以俾佢地了解前線嘅管理…… 「岩岩畢業出黎嘅後生仔，頂哂龍咪廿零歲仔女，要同前線班哥哥姐姐一齊搬搬抬抬，啲貨重到連大隻仔都要出盡食奶嘅氣力先可以搬得到上車推，而且讀左咁多書，結果同啲讀書唔太多嘅哥哥姐姐做同樣嘅野？無野下話？」 雖然小編都好想講上面嘅野，但係職業無分貴賤，而且人生哩樣野就好死嘅， Life is full of options ，你有權選擇自己條路，但係既然你揀得

千奇百趣 Interview   之   廿四孝阿媽 哩次黎見工嘅係一位中年女士，就叫佢做廿四媽媽先，佢申請嘅職位係清潔工。傾左兩句，小編發現廿四媽媽之前無做過相關工作（清潔依家都好難請人，所以就算無相關工作經驗，都會試下睇下做唔做到），於是乎小編就同佢講：「不如我解釋一下工作內容、返工時間同埋輪班嘅情況……」 點知佢一下就 Ban 埋黎話：「哩啲野唔駛解釋咁多，估都估到……」 小編對眼突然變大，直頭啲火都噴埋出黎。諗左陣，唔……都係算，慳返。無計，一來因為 Hea 哩樣已經深深地紮根於小編嘅 DNA 裡面；二來就係你又真係咬佢食，最多只係唔請佢就算數，串佢都厭哂氣。 跟住廿四媽媽未等我出聲，已經繼續講：「不如講下我個女丫，佢岩岩畢業搵緊工，你哋公司有無空缺適合佢呀？」 小編繼續眼火爆中：「咁……你個女讀咩科，對邊一類工作有興趣？」 然後心諗：反正有個咁無禮貌嘅媽媽，個女都唔好得去邊…… 廿四媽媽答小編：「佢好叻架，又斯斯文文咁，有無啲寫字樓工，即係好似你哩啲咁，舒舒服服，又唔係好多野做嘅工？」 What the Bird ……估唔到依家連啲阿媽都想仔女日日扮下工咁就算…… 首先小編先旨聲明，小編份工真係好多野做，應該咁講，香港地應該無乜邊份工唔係咁，而且寫字樓工唔係舒舒服服架，受嘅壓力大過勞動工作好多。再者，如果有哩啲無乜野做嘅工，小編都第一時間自己去做左先啦！ 躁躁地咁同廿四媽媽講：「我哋文職嘅職位暫時無空缺。如果你個女對我哋公司有興趣，你可以叫佢 send 個 CV 俾我哋，適合的話會安排約個時間同佢見一見面。」 廿四媽媽驚訝咁問：「 CV ？咩黎架？我以前喺鄉下搵工嗰陣都唔駛交哩啲野個喎，我個女喺國內讀完書，依家仲係大陸，如果你哋唔係請佢就無謂哂時間叫佢黎香港。」 …… 小編拉返個話題返黎：「不如我哋講返你申請清潔工哩個職位先……」 廿四媽媽即刻插嘴：「咁你哋請唔請我？我黎左香港唔係好耐，求其有份工就得！」 跟住又自言自語話：「我都係想個女喺香港做野，然後搵住好人家……」 佢講到咁，小編一時之間唔知點應佢，唯有叫佢返屋企等消息…… 老生常談一句，入鄉隨俗，最低限度保持返應有嘅禮貌。雖然當事人可能不自知，而且亦都