0o HR 扮工週記 o0

我都唔想交咁多稅 係，我都唔想，相信無人想…… 所謂課稅年度就係由 4 月 1 號至下年嘅 3 月 31 號，而差唔多 5 月嘅時候，你就會收到稅局寄信俾你，叫你報稅。 小編每年都會差唔多喺 4 月頭嘅時候，幫每位同事都準備一份「 IR56B 」嘅 Form ，去協助大家報稅之用。哩份 Form 除左會交去稅局之外，小編亦都會俾返一份同事作個人報稅之用。 可能你對「 IR56B 」哩個名無乜印象，但係絕大部分打工仔都一定收過哩份 Form （走法律罅果 D 公司可能就唔幫大家報），上面記錄左你嘅全名、身份證號碼、地址、性別、婚姻狀況等等，當然唔少得你喺哩一個課稅年度嘅總收入。 話說有一年派完哩份 Form 俾 D 同事，本來諗住可以 Hea 一 Hea 先做其他工作，點知哩個時候，收到一個同事嘅電話…… 同事：「 Er ……我呢……我其實岩岩收到份 56B ，見到個數目都唔細，應該要交唔少稅，所以想同公司商量下可唔可以報少 D 收入，我唔想交咁多稅……」 我啞左兩秒：「唔……其實咁樣係犯法架，我唔想返工返到俾人告。」 我當下心諗：你哩 D 收入多嘅人，仲對住我哩 D 收入少嘅人咁講？！ 同事：「係咪真係無得傾？」 我心諗：留返你自己同稅局慢慢傾飽佢啦！你都識講收入唔少，咁交稅梗係唔少啦！況且年年都係咁交，同埋一早都知自己每個月搵幾多，心裡有數啦。慘得過我哩 D 係完全無機會好似你咁交咁多稅…… P.S. 如果真係想交少 D 稅，都係睇下有 D 咩正常途徑啦…… 稅項扣除： https://www.gov.hk/tc/residents/taxes/salaries/allowances/deductions/index.htm  

炒人到底有幾爽？ 入行一段時間嘅 HR 應該經歷過炒人，今次嘅主角係同事肥仔文…… 話說佢入職都成 2 年，但係一直表現都唔理想，佢最擅長嘅係喺返工時間發呆，而且屢次勸佢都唔改，甚至有試過兜口兜面喺個客面前發呆，仲要個客叫左佢幾聲都無反應，十足十突然被人強制登出左嘅機械人咁，之後當然俾個客投訴。最後佢經理終於都頂佢唔順，決定唔再俾機會佢， escalate 上黎我地 HR 到話要炒佢。 雖然你可以話好多時候見工都係扮哂蟹咁，返工又另一回事，但明明當初見工嘅時候都仲叫係一個正常人，唔知係 D 人定係 Duties 搞到佢變到傻 Q 左。其實佢經理都算勁，忍到佢 2 年無同我哋講，仲要連 Appraisal 都無寫低。如果當時佢入職已經係咁樣，可能小編連 2 個月都忍佢唔到。 仲記得炒肥仔文果陣，佢仲係 O 嘴嘅表情，發緊呆咁望實小編……大佬呀，撞邪咩？不過個故事仲未完…… 炒左肥仔文之後第一日 收到佢老婆電話：「我係肥仔文老婆，想問下佢做得好地地，點解會俾人炒左嘅？問佢佢又話唔知……」 炒佢嘅時候解釋得清清楚楚，到底有無聽清楚？無聽或者聽唔明嘅話，人地問你明唔明果陣你就唔好答話明啦！（哩樣野好多人都係咁！） 炒左肥仔文之後第二日 又係肥仔文老婆打黎：「係咪真係無得傾？阿文話佢好鍾意份工，好想返黎做……」 梗係鍾意份工啦，日日發呆都可以留到 2 年，俾著小編嘅話，都仆倒去做啦。 早知今日，何必當初……如果真係咁鍾意份工，喺 2 年入面點會唔諗辦法改善？同埋幾廿歲人，有咩同自己份工有關係嘅野又唔自己問，要個老婆仔代勞，說好的男人呢？ 炒左肥仔文之後第三日 喂？又係佢老婆打黎：「阿文真係無左份工唔得架，我哋一家大細靠哂佢養……」 上次講過香港人力資源錯配，但係如果真係靠佢養，大不了降低要求架姐，除非特別挑剔，否則應該唔難搵到新工…… 跟住佢老婆又繼續講：「你知啦，阿文佢傻架嘛，個人又蠢，你地唔請佢都唔知搵邊個請佢啦！」 嗚呀！俾著小編係肥仔文，聽到自己個老婆咁話自己，應該都會受唔住打擊而放棄自己…… 不過老實說，小編真係好想好想好想咁同佢老婆講：「既然你講到佢咁差，仲好意思叫我地接收阿文！無人肯請嘅人就叫我地請，你當我地

人呢？喂，人呢？（二） 與其成日話市場上好難搵到合適嘅人，倒不如話依家做 In-house HR 面對最大嘅困難就係根本無人會做，所以就算明知某 D 招聘渠道係收唔到成效，或者係明知個 Candidate 係廢，你都要送返幾份垃圾 application 俾部門經理「審視」下，確保返唔係我地無做野，而係無人願意做份工。 不過咁，雖然話人呢，就點都請唔足架啦，不過 Turnover 就點都有，新人點都有幾個嘅。但係每個月先得幾丁友，新入職嘅 Orientation 一係就幾條友都照做，一係就唯有等多一兩個月，一次過做多 D 。不過最大問題係 D 前線部門嘅主管見到新同事就好似執金咁，一落左去就好似永遠都唔想俾佢走，連幾粒鐘做個 training 都唔得咁，無論點樣去解釋俾 D 主管聽，合適同埋適量嘅 Training 某程度上係可以令新同事留耐 D ，主管都係一於懶理，總之就係解決左依家嘅問題，過得一日得一日，因為分分鐘聽日就即刻 Short Notice 走左咪唔駛理囉。 最經典試過有一次，本身安排左 20 個唔同部門嘅新同事上 Orientation 。一開波已經知道佢地未必會黎得齊，所以直頭俾定兩個日子，等部門經理自己安排佢地邊日上。咁好啦，覆返黎每日都有 10 個左右。心諗，無死啦掛今次。點知喺 Orientation 開始之前幾粒鐘， D 部門經理話邊個邊個射左波，唔夠人手，出唔到。已經心知不妙，數一數到底剩低幾多人呢…… 1 個？！ 數真 D 先！ 咦？得返 1 個？！ 搞定唔搞？搞！ 1 個都照殺！由本身一對多變左做單對單補習，當然心理壓力下降唔少（ Hea 底嘅小編梗係唔想對住咁多人啦），不過同時諗一諗，如果逐個逐個做都唔係辦法，可能求其整返個 LMS (Learning Management System) 去俾份資料佢地自己睇同做算了。 今時今日做 In-house HR 已經要做到好似 Sales 咁，要俾人捽數，但最慘嘅又要無 Commission 。某日出去一間大專院校 Recruitment fair ，見到某大集團係咁搶人，一見到有學生行過，就好似以前大學嘅 Society 咁，係咁搵 D 靚女型男去色誘人埋去咁，