辦公室騎呢行為 除左一啲喺工作上會令你火都黎埋嘅同事，仲有一啲係 Office 內發生，但係屬於工作以外嘅奇異行為，唔知大家有無遇過…… 1) 剪手指（腳指？）甲 試過有同事喺個位到剪指甲，不但只剪指甲嗰陣發出嘅清脆聲音好滋擾，而且個同事任由啲指甲亂飛嘅情況更令人不安。仲有啲膠層會閂埋房門，喺自己間房入面剪，雖然你睇佢唔到，但係小編相信喺一個清靜嘅 Office 入面一定聽到。有時候其實小編都好想問下其他同事到底有無人好似小編咁諗，覺得膠層其實係喺房到剪緊腳指甲？ 2) 挖鼻屎 雖然同德國隊嘅領隊路維比起上黎，簡直係小巫見大巫（毛？），而挖鼻屎可能係幾爽，有時候喺嗰一刻真係會忍唔住，亦都係人之常情，之不過可唔可以入廁所先進行哩個咁私人嘅行為？！唔好喺個位肆無忌憚咁挖完鼻屎，再周圍彈出去！一係就同小編食左佢！其他同事好驚啲紙同 File 會沾染到分泌物 > ﹏ < 仲細咩！ 3) 飲酒 唔係講緊喺公司飲酒，但如果有同事每日返工都帶住一身酒氣返黎，試問其他同事會點諗？要見客嘅固之然係死得，就算係後勤同事都講唔過去，小編深信絕大部分同事都會想問你：「你醒未呀？！」 4) 護膚 曾經見過有位女同事，佢 Office 張枱長期擺放全 Set 護膚品。正當小編以為護膚實係早晚喺屋企進行嘅時候，哩位同事完美示範點樣善用返工時間去護膚……有日哩位女同事突然喺個位大叫左一聲：「嘩，唔得啦，我啲毛孔咁污糟嘅？！」正當其他同事都仲喺到諗緊應該俾咩反應嘅時候，嗰位女同事一另轉面，塊面突然變左灰綠色，應該係敷左清潔泥 Mask ……小編都係扮見唔到算了……之後嘅 20 分鐘入面，見佢好似喺屋企咁，將一層一層一層的剝開我的心（誤），將一層層唔同嘅爽膚水呀、精華液呀、面霜之類嘅野搽上塊面到…… 5) 真係古里吾島 有日忙到一頭煙嗰陣，隔離位個女同事突然大大力咁拍左張枱一下，然後企起身好大聲咁宣佈：「返工真係好辛苦呀呀呀呀 ~~~ 我好想俾人包，有無人可以包我呀？！」小編偷偷地望左一下周圍嘅同事，發覺所有人都好似聽唔到咁，繼續好正經咁做野，連笑都唔笑下。嗯……睇黎哩個應該係最佳嘅反應，小編一於照跟。睇黎又一個返工返到傻左……唉 ~ 返工返到傻，最後一次搭單幫「海港青年商會 - 「 充電吧
發表文章
辦公室之男親女愛（一） 有啲野人事部係控制唔到嘅，例如男歡女愛哩啲野本身就好個人嘅，公司亦都無特別規定，去限制哩家野。如果有，小編相信你都會話公司變態啦！但係又有人真係認為哩樣野係公司可以控制得到，而打過黎小編枱頭去投訴…… 話說有一日小編收到一個電話，電話另一邊嘅男人自稱係匿名嘅爆料男。佢話公司嘅家英哥同道德妹有奸情，仲話家英哥已經有家室，係唔應該咁做，所以想我哋人事部阻止佢哋繼續錯落去，仲話家英哥個老婆都知道左，隨時會上黎公司捉奸…… 聽到哩到，小編除左開定包花生之外，真係唔知點幫到哩位爆料男了，唯有同佢解釋返，哩啲私人事唔係公司嘅管轄範圍。雖然道德倫理上，家英哥同道德妹可能唔係太正確，但係佢哋哩個 Moment 又真係無違反公司嘅守則。再者，佢地都係追求緊自己嘅真愛姐，何罪之有？（誤）點知爆料男唔肯接受公司嘅解釋，仲話會每兩日打一次上黎俾小編，希望小編可以匯報事情嘅進度…… 大佬，你唔駛做姐，小編都要做架嘛，兩日一次？食藥咩！ 就算係男未婚女未嫁，一樣都會招人話柄…… 話說又有另一位爆料女走黎同小編投訴，話秘書女同會計男喺 Lift 到 Flirt 黎 Flirt 去，搞到咁岩搭同一部 Lift 嘅佢想作嘔。又等小編了解下依家嘅人類係點樣 Flirt 人嘅先…… 秘書女手執會計男一把頭髮：「你啲頭髮咁長，仲唔快啲去剪？」 會計男：「都唔係丫，等長啲先剪，可以慳返啲嘛……」 秘書女：「咁醒，咁都俾你諗到，哈哈哈……」 唔……頭髮？小編唔喺現場，相信要聽埋個 Tone 先知。不過又咁，又好似無明文規定唔可以喺公眾場合問候人哋嘅頭髮…… 最神奇都莫過於哩單啦…… Reception 姐姐駁左個電話入黎俾小編，話有個客想投訴。 咦？投訴？投訴關小編 _ 事？投訴就搵 CS 啦，搵 HR 托咩？對方係一個怒氣衝衝嘅怒衝女，原來佢話佢個女去過公司一間餐廳幫襯，然後同我哋其中一個同事搭上左，而且話佢個女好細個，仲要同嗰個男同事發生左關係……（咦？小編雖然唔想知？不過咁似甜故嘅？）哩位怒衝女好嬲咁話我哋同事犯左錯，應該要炒左佢…… 下？原來想搵個女朋友都有錯？ T_T 衰 11 就話姐，家陣你情我願咁都唔得？又係講返正題，公司又
邊一個發明了返工 話說聽聽下小飛機場嘅《邊一個發明了返工》，諗返起上個禮拜某日晏就趕緊返 Report 途中接左一個女士電話…… https://youtu.be/Fx_EEfKUouY 女士：「請問你地係咪小蕃茄公司人事部？」 小編：「係，請問有咩幫到你？」 女士：「你哋係咪請緊侍應？」 小編：「係……」 飲食業人手長期短缺，入行嘅年輕人數唔多，所以可以話長期都係請緊人。正當小編以為對方對職位有興趣嘅時候…… 女士：「唔係我自己想申請，我都唔駛返工，我無做野好耐啦……」 唔……噢！原來你就係小編之前喺 14 個禮拜前提過嘅，嗰 134 萬人嘅其中一個……（咁都搵到幾多個禮拜之前講過嘅野，原來小編都幾勁 XD ）不過咁，你唔駛返工姐，但係小編依家仲係返緊工！可唔可以唔好提起人哋嘅傷心事…… 女士繼續講：「其實我係幫人問嘅，我成日都幫襯開你哋，見你哋啲同事嘅質素真係麻麻地，乜依家真係咁難請啲好嘅侍應咩？咁岩我去開有間 Fine Dining 餐廳，識到有個侍應真係好好，服務好細心，咪想介紹俾你哋囉。」 可能小編嘅公司無人哋去開嗰間 Fine Dining 餐廳咁高檔，服務咪無人哋咁好囉…… 小編：「多謝你嘅意見，如果你想介紹其他人應徵，麻煩你叫佢將履歷 Send 去我哋公司嘅 Email 到， Email Address 係 hiring@smalltomato.com.hk 。」 女士疑問 Mode ：「乜原來要咁麻煩架？我仲以為打個電話黎同你哋講下就可以安排面個試添……不過我其實都唔知人哋係咪想轉工，等我下次問下先。」 係啦，你問左人先啦，人哋做得好地地，可能唔想轉工呢。同埋如果真係對小編公司嘅職位有興趣，都咁大個人啦，不如自己親自打電話黎問…… 話說，到底係邊隻皮蛋發明左返工哩樣野？而點解有人又唔駛返工？聽日又返工啦…… 題外話，有間機構 approach 小編，問小編可唔可以幫佢地手宣傳下，本身就對幫人宣傳無咩大興趣，因為小編只係諗住 Hea 下就算。不過見到佢個 Logo 個人仔又幾 Chill 咁，又講到重視放鬆同休息咁，重點仲係因為有治療犬…… 唔理點都好，小編做野之前都係要做下 Fa
撳一個制出糧 好多公司每個月都有一日係固定出糧日，好似 7 號、 25 號、 26 號、 30 號等等。撞岩嗰個月出糧日係週末或者紅日就會推前。一般就唔會特別改，而新同事一入職小編就會通知佢哋關於公司係每個月 25 號出糧嘅。而據小編所知，幾十年都無變過。 早幾個月嘅 25 號（唔係星期六、日或者紅日），有個做左幾年嘅同事走上黎小編 Office …… 金同事：「唔該，我想今個月轉出糧戶口。」 正當小編個「好」字想衝出黎嘅時候…… 咦？等等……今個月？今個月啲糧今日咪岩岩過左數囉？！ 等小編問清楚啲先：「今個月嘅糧喺今日已經過左數啦，你係咪想我哋下個月幫你轉哩個新戶口出糧呀？」 金同事突然心急咁話：「唔係，我係想今個月份糧出落哩個新戶口。我知係今日出糧，而今日又未過，你依家幫我轉咪得囉。」 喂呀，又黎！哩個同事腦部咩構造呀！？！？ 出糧唔係小編依家喺個位撳個制即刻幫你過到數，係我哋幾日前已經做好哂，再搵腦細簽名作實，然後再交去銀行。就算小編喺銀行做，都幫到個同事即時轉戶口號碼，已經過左舊戶口嘅糧都…… 小編：「今日過數無可能幫到你轉戶口，而且今個月份糧都過左落你之前個戶口，下個月開始可以轉戶口出糧。」 金同事：「下？我前日 Cut 左個舊戶口啦喎……」 喂呀！！！不如你出年先講？！即係依家出唔到糧俾你啦！又多左樣野做啦！ 小編要 Hea 呀！ 係 Hea 呀，哈利！ Hea 爆冷知識 Recap 多次： 根據現行 Cap 57 《僱傭條例》第 63C 條，如果唔遵守 7 日出糧哩一個規定的話，最高可被判罰款 35 萬港幣及監禁 3 年。講緊嘅 7 日係酬金期後嘅 7 個 Calendar Day ，唔理係咪星期六、日或者紅日，所以大家要小心，尤其是你公司唔係預付，而係酬金期完左先做 Payroll 。 記住，係所有有份令到遲出糧嘅人都有機會被罰！（雖然多數 Case 都係罰錢了事，但唔代表唔會拉人坐監！） 另外就係根據第 25A 條，每遲一日，就要罰多一日利息，直至完全支付薪金。現時終審法院首席法官頒令判定債項利率為 8% ，每 3 個月就會頒佈新嘅利率，不過最近咁多年都係維持