0o HR 扮工週記 o0

千奇百趣 Interview  之  工程篇 開始故仔之前，先祝各位聖誕節快樂 Happy Christmas 😉 希望尋晚平安夜平平安安，早日二人行變三人行！ 應徵職位：技工（一） 我：「麻煩先簡單介紹自己」 應徵者：「其實你地都有我 CV ，咩都寫哂係上面……」 其實要你用把口講 CV 無既野係咪咁難？ 我：「咁上一份工作既主要工作範圍呢？你覺得點樣可以用上一份工作既經驗來幫到我地公司？」 應徵者：「都係果 D 啦，我又未做過你公司，我點知！」 （唔該門口直行前面轉左……） 應徵職位：技工（二） 哩次又係見技工。我一入會議室準備面試，櫈都未坐暖，連第一句開場白都未講，坐在我對面的應徵者已經講…… 應徵者：「唔駛介紹啦，你係 HR 丫嘛。不如我自己介紹自己先，同講下之前 D 工作經驗啦。而哩份工作要做 D 咩我都已經好清楚，以前哩到做的人我都識唔少……」 （咁我係咪可以慳返個 Interview ……） 面試途中突然傳來電話鈴聲…… 應徵者隨即從袋中拎個電話出黎聽：「喂，我依家見緊工呀！」 電話對面個人，講野大聲到我坐佢對面都聽到：「你邊到見呀？」 應徵者：「 XXX 公司呀。」 電話對面人：「係邊架？都無聽你講話見工既？」 應徵者：「我之後再同你講啦……」 跟住就收左線。不過咁，成段對話我都聽得好清楚……   其實當下我真係有諗過佢會唔會繼續講落去……

隨筆 尋日放工經過公司大堂棵聖誕許願樹，（純粹）八卦睇下同事寫     d 咩願望落去，睇睇下見到有人寫： 「希望我找到新的工作」 仲唔止一個添…… 我除左暗讚公司有言論自由 and 同事的推心置腹暢所欲言之外， 都覺得自己係時候趁呢個長假檢討下間公司。

2017 年冬至 是日冬至，哩返入枱底做個稱職既 Hea HR ，同事打電話入黎，考慮下聽唔聽先…… 今日冬至早收爐，出埋雙糧唔好眼紅紅……   😎 👍 各位不要葡萄我哦 ~

千奇百趣 Interview  之  廚房篇 Interview 可以話係 HR 工作範疇入面其中一個非常重要既環節，每日見住好多唔同既人，有時真係可以話係千奇百趣…… 應徵職位：初級廚師 我：「你之前多數煮開咩菜式？有無咩拿手菜？」 應徵者：「其實我好少煮野食，因為怕接觸生肉。」 我：「……」 我地無搞齋菜，佢又唔係見甜品師傅哩個位…… 應徵職位：廚師（水產） …… 我：「有無關於職位上或者公司上既問題？」 應徵者：「我係唔會殺生架，哩樣野我要依家講清楚。」 我：「……」 老實講，依家 d 人鬼咁鍾意食游水海鮮，貪佢夠新鮮嘛。上一個又話怕接觸生肉，哩個又話唔殺生，家陣係咪要佢地出返 d 人工請一個專人負責劏？

你同我打到佢聽為止！ 曾有幸在薄有名氣的 HR Director 手下工作，不過佢出名異常性急，哩頭 send 完 email 俾我， 2 秒後就即刻問我睇左未，仲話電話響兩下就要聽，問你既問題唔準諗要即刻答，總之樣樣野都要快快快，所有野都要即刻即刻即刻。 有一次負責 training 的女同事 G 到意大利度蜜月兩個禮拜，期間我地咩都要快既 HR Director 對女同事 G 整的 training plan 有疑問，想話打俾佢直接問。咁我地聽完覺得都係下年既 training plan ，無咩咁 urgent ，所以話諗住等佢放完個假再問。點知 HR Director 話唔得，要即刻問清楚。 我打左幾下無人聽，發覺唔對路。然後諗諗下香港時間朝早 10 點幾，意大利應該係半夜 4 點幾，應該仲瞓緊覺，打多幾次確定真係無人聽之後，諗住用埋時差既理由都叫交到差啦掛。點知佢一句「你同我打到佢聽為止！」然後仲要企在我身旁，開埋 speaker 望住我打完一次又一次，足足打左一個鐘。。。當然最後都無人聽啦。 公司用左一個鐘既人工請我返黎打電話，諗落都 so 左。 不過我哩一生入面，就連屋企人既電話，一個月都無打得多過佢哩日，當佢半分鐘打一次飛去留言，咁一個鐘就姐係打左 120 次，直到今時今日我都仲記得哩個電話號碼。。。