0o HR 扮工週記 o0

世界真細小 同事 B 已經在公司服務了 2 年多，有一日收到佢主管通知話佢無返工，但又無打電話返黎話病左定係有急事，而我地嘗試聯絡同事 B 亦唔成功。 幾日後收到同事 B 的來電，話要辭職，仲要即時走。震驚既同時，我地解釋俾佢知辭職要 1 個月通知，或者係 1 個月人工作為代通知金。再向佢解釋話如果想今日辭職，麻煩返黎工作多 1 個月，或者補返一個月人工的支票俾公司就可以即時離職。同事 B 應承話會將支票寄返公司，因為有緊要事，無辦法再返工。 第二日再收到同事 B 既電郵，話財務上出現問題，需要遲點才可以將代通知金的支票寄俾我地。我地想問佢需要幾多時間，好等我地有個預算，點知無論電話定電郵，都無回覆，甚至連信都寄埋，都聯絡唔到同事 B 。 又過左一個月，腦細要求去勞工處幫佢開個 File 追討同事 B 既代通知金。（勞工處容許僱主或僱員備案，所以除左僱員可以去勞工處「告」公司，亦都可以掉返轉。）當然，勞工處亦都聯絡唔到哩位同事 B 。 之後又隔多一個月，某日放工同朋友去大隻佬健身中心做 Gym ，點知一踏入去健身中心…… 咦？接待處哩個人咪同事 B 黎既喂？我地四目交投，然後呆左幾秒鐘……我同佢講左句：「你近來幾好嗎？好耐無見……」 其實世界真係小小小，除非你中左六合彩，發左達以後唔駛做，否則一世人流流長，一定仲有大把時間要搵工， HR 點都有機會透過 Reference Check 或者同行消息收到風，甚或乎在街上，行行下撞到你…… 事後你估下追唔追到份代通知金丫啦？

面試  之  秒秒鐘幾十萬上落 一個星期五朝早 10   點 45 分， Outlook 提示我 15 分鐘後有 interview ，咁趁有時間就印返應徵者份履歷表同埋申請表出黎。 點知一直等，等到 11 點 10 分都仲係無聲氣，我以為個應徵者遲到或者係 No Show 。因為哩兩個情況現今都十分普遍，所以見怪不怪。就在哩個時候，突然我收到佢電話，正當我以為佢通知我地話要遲到或者有事黎唔到…… 應徵者：「我頭先去到你地公司門口，見唔到有其他人，等左大概 2 分鐘之後就走左。（嘟 ~ ）」佢直頭 Cut 埋我條線。 其實我地公司在扮工時間，接待處一定會有接待員。只要一走近門口，靚靚既接待員小姐一定會注意到你……（除非你既存在感低到一個點……） 老實講，面試係可以隨時取消，如果要改變主意唔想黎，只要打個電話就得。假若真係咁努力黎到面試地點，等左 2 分鐘就走（等左 2 個鐘就話姐），我地亦都唔好意思阻你秒秒鐘幾十萬上落，門口直行轉左唔該……

面試  之  我唔想知你諗咩 話說有一次約了一位 A 小姐來面試。面試前一天下午，收到佢電話 ……   A 小姐：「你好，我係 A 小姐，我約了明天下午 3 時見工，請問有甚麼需要帶？」 我：「麻煩帶身份證、工作證明及學歷證明就可以了。」 A 小姐：「明白，明天見。」 1 分鐘後 …… A 小姐：「我係 A 小姐，剛剛打過來的，我有其他事想再問。」 我：「好，無問題。」 A 小姐：「我明天見的主管係男定女？」 我：「明天見的主管是女的。」 A 小姐：「那你地公司有沒有宿舍？因為我都住得頗遠。」 我：「關於這方面，我地暫時無提供宿舍這個安排。」 A 小姐：「但我真的住得很遠，你地會否在附近租地方給我住？」 我：「抱歉，我地暫時未有類似的安排 …… 」（忍住） A 小姐：「其實我真係住得好遠，你地肯定有好多其他應徵者，一定唔會揀個住得咁遠 …… 」 我（無奈 ing ）：「其實我地唔係睇住址，係睇態度同 …… 」 （說話都未講完） A 小姐：「咁我覺得我黎左你地都唔會請我，我住得咁遠，有得揀都會揀第二個。」 我：「……」 （完全無插嘴的空檔） A 小姐：「呢個係我既諗法，你地會睇埋住邊 …… 」 我（怒 ing ）：「小姐，不如聽日見面再詳細講。」（極速收線） 收線後 2 分鐘 …… 又再一次聽到 A 小姐尖銳的聲音 …… A 小姐：「咁係咪我聽日見工可以知道更多關於公司同份工既資料？」 我：「係。」（點解感覺上好似被質問？） A 小姐：「咁聽日我見果個主管叫咩名？」 我：「聽日你就會知道 …… 」 A 小姐：「吓？無理由連名都唔講得喎，咁秘密？咁又係，我之前見果 D 工都係咁樣唔俾我知見邊個……」 我（底已躁）：「唔係唔俾你知邊個，不過個部門咁大，未知聽日邊一位會見你，所以聽日 …… 」 A 小姐：「 …… （嘟嘟嘟）」 其實在電話上約面試已經係見緊工，睇緊大家日後有無機會做同事，如果在電話上的表現差，就算去到面試都已經打左個八折，你估下仲見唔見得成？ 應徵者打電話詢問有關公司或職位問題，我地係歡迎，但有少少建議，可先簡單記一下要問既問題，避免要打幾次電話俾 HR 。 而且有時候自己

肚餓既腦細 Annual Dinner 係每年令 HR 最頭痕的其中一個節目，由 Book 場、場地佈置、安排表演、遊戲，到抽獎禮物等都要一一安排，連最無人想做的 MC 都要自己硬食。 相信大部分公司每一年 Annual Dinner 開始是都有一個例牌環節，就係邀請腦細致詞。事情發生在上年的 Annual Dinner ，我們已經事先一再提醒腦細，在晚宴開始時會邀請佢上台致詞。而當我已經「好高興歡迎大家出席今晚的 Annual Dinner 」，以及「簡介了今晚的流程」等等之後，差不多輪到腦細出場。 「以下的時間，我們有請腦先生上台致詞。」正當各位同事熱烈地鼓掌歡迎，並將目光一致移向腦細身上時，腦細竟然無動於衷，繼續將戰鬥力放在面前幾件肥美的乳豬上……我以為他只是聽唔到，點知佢又突然與我四目交投，然後問：「我係咪依家需要立刻上台？」那一秒我很自然的反應就是點了一下頭。不過，腦細選擇繼續在眾人都鴉雀無聲，以及眾目睽睽之下，誓要完成他碟上的食物。 如是者，所有飢餓的同事、台上的我、酒店的工作人員在接下來的半分鐘，一直凝視著腦細慢慢將碟上的食物，逐件逐件送入口中，才施施然抹嘴走上台…… 原來，一個人肚餓起上黎，周圍的目光已不再重要了……

0o HR 扮工週記 o0 作為一個 HEA 到核爆既 HR ， 本來就想哩埋係寫字樓枱底畫下圈圈 ， HEA 到 2046 退休就算 。 不過悶悶地，又想同大家分享一下每一日 HR 平淡既生活 ， 所以決定由今日開始同大家見面 ！ P.S. Facebook Page 既 0o HR 扮工週記 o0 都會同時更新架 ！