0o HR 扮工週記 o0

又係統計處？ 話說有一日晏就食完飯坐返埋位，聽到隔離同事枱頭個電話不停係咁響，好想幫佢 pick ，但見來電顯示係街外電話，又廢事聽左同事既私人電話，所以諗住不了了之就算。 最後終於等到佢個電話自動收聲。點知過多幾秒鐘，突然到我枱頭電話響，跟住望一望來電顯示…… 咦？又係同一個人黎既？ 一聽之下，有一把幾甜既聲，話搵 HeaHR 。然後我答佢話我係。原來係統計處電話，話我地過左 deadline 都未交返份統計表過去。 去到哩到停一停，諗一諗，份統計表係我隔離個同事負責架啵，仲有就係點解佢知我叫咩名同咩內線？！ 又咁岩得咁好彩地，我個名又同隔離同事個名讀音好似（仲要大家都咁 Hea ），咁我咪問佢係咪真係搵我，點知佢又真係叫得出我個名…… 傾左一大輪之後，收左佢線。然後同事返黎就問佢拎左疊統計表黎睇。 嘩！搞咩？要填 15 條友既資料落去，要填職位名、職責、薪金……加加埋埋都成 30 幾頁紙要填，唔怪得我隔離位做到過左 deadline 都仲係一個同事既資料都無寫過。 跟住無聊咁睇睇封面統計處既通知信，話原來係我地被抽中左要填果 D 表格。不過隔離個同事話，之前統計處既人打黎果陣都係咁講，但係佢連續幾年都寄左過黎叫佢填。 有次佢終於忍唔住問統計處既人：「喂，又話隨機抽樣咁叫人填，點解年年都抽中我地？」 統計處個人支吾以對之後就收左線，跟住每隔一段時間，統計處就會轉唔同既人黎聯絡我地。（諗落統計處都幾大啵，養左咁多人……） 不過又咁，我岩岩初黎報到哩間公司，應該無咩街外人有我內線電話，就連公司內部既同事都唔知我內線，睇來電顯示又唔係 Reception 姐姐駁入黎，佢點解可以打到入黎既？仲要知我叫咩名？   自從果日之後，我就接二連三收到一   D 本來係我隔離同事平時接開既電話……莫非…… Hea ？ = 口 =?

Annual Dinner 的高潮位 之前講過 Annual Dinner 有個肚餓既腦細，哩次講下同事。 每年總有同事奉行公司出酒佢出命，搏哂老命咁飲無限量供應既紅酒白酒。 Annual Dinner 既程序進行到一半都未夠，已經唔難睇到有幾位同事醉到胡言亂語或者不醒人士。 上一年 Annual Dinner 既 MC 係剛加入 HR 部門的嫩肉。正當我們準備進行抽獎環節時，早有前科係公眾場合醉酒既五十幾歲、身形龐大既女同事 F ，突然唔知從邊到跳出黎，極速跑到台上，熊抱住台上既嫩肉 MC 。 仲記得嫩肉面部痛苦扭曲的表情， Dead Air 左兩秒之後，隨即哄堂大笑。雖然有幾個好心既同事即刻走到台上幫忙解圍，但都阻止唔到 95% 的同事係到拍照同埋錄影。 毫無疑問哩個就係當晚既高潮位，而剩低既時間入面，那 95% 的同事亦無再出現過哩種程度的興奮。 真係好想同 F 講：「如果咁有表演慾，應該早 D 同我地講嘛，二話不說地留返一個表演環節俾你，等我地唔駛諗到咁頭痛。」 而其他同事亦都好貼心，將哩段片即刻 post 上 Facebook ，等所有同事無論何時何地都可以重溫…… 其實工作上既閒言閒語，相信大家都經歷唔少。雖然 Annual Dinner 都係希望各位同事玩得盡興，但畢竟都係公眾場合，而且通常同事對哩一類笑料的記憶力都十分好，分分鐘俾你腦細記得，仲會影響升職添。（當然，嫩肉臨危不亂的精神，話唔定反而令佢升職……）

帶老豆辭職 上次講到帶女友見工，哩次講下帶老豆辭工。 話說同事 E 係年輕既小伙子，入職唔夠半年，已經屢次聽聞佢對工作唔太滿意，覺得工作時間長、工作量多、又需要輪班欠彈性。 （其實 HR 既工作都係 =_= …） 某一個下晝，我們 HR 正與其他部門開會，聽到會議室外十分嘈吵。接待處姐姐面有難色咁敲門走入會議室，話有人要立即找 HR ，於是腦細批准我離開會議室，去接待處睇下發生咩事。 點知只見一個大叔在咆哮：「我依家幫個仔黎辭職，我地要即刻走！」 之後我見到大叔身後同事 E 既身影。為免引人注目，我唯有請同事 E 父子到另一邊細少少既會議室。 一行入會議室，大叔就話：「依家我賠一個月人工，可以走未？」說罷後就將一疊銀紙同硬幣擲到會議室的桌上，正想轉身拉著同事 E 離去。我立即走到門前阻止佢地，同時解釋我們要一點時間計算 Final Payment ，同事 E 可能有未放既假期，可以計返俾佢。全程同事 E 都躲在父親身後不發一言。感覺就是俗稱的「裙腳仔」。如是者，找埋條數之後就 Close File 左。 點知大約一年後，我們又收到一封求職電郵，望一望…… 「咦？哩個咪之前帶埋老豆黎辭職果個同事 E ？仲要申請公司另一個職位？」 佢係咪忘記左之前對公司既各種不滿……定係發覺原來轉工只係由一個地獄跳去另一個地獄…… 其實辭職係好普遍既事，合則來不合則去，不過記住要跟足程序，唔好用比較奇怪既方法離開公司。 有時候你唔知件事會傳到去邊個人耳邊，尤其係你唔肯定將來會唔會對同一間公司既職位有興趣……