辭職原因

上個禮拜睇到「辦公室日報x聶瞳」一篇關於離職原因(https://www.facebook.com/officedaily/photos/a.267877603659068/702201486893342/?type=3&theater),個原因竟然可以一言以敝之?!「錢少事多返工遠,權輕位低責任重」!大家都知小編有個朵叫金句王,哩句咁精境,梗係要收歸小編嘅金句庫,順便打落 Whatsapp Status 到俾大家睇下,點知……早幾日有同事無啦啦叫小編 Del 左哩句野,話因為腦細睇到唔係太高興,會以為小編唔想撈……簡直……好似回歸左去一個限制言論、文字獄嘅年代!當然,小編梗係一於少理,反正都係打份工,收工你理得我打咩 ^ 3^ 吹咩!

講開又講,今時今日辭職嘅原因其實唔係真係咁重要,正所謂合則來不合則去,而且亦唔係事必要同腦細解釋點解要辭職。不過咁,基於一般商業禮儀,同埋做下統計,以及被腦細要求(主要),HR 好多時都會問一下遞信同事點解要辭職。除左一般嘅人工問題、同上司唔夾、工作量太多、壓力太大、工作時間長之外,亦都有以下比較真情流露嘅原因……

最適合有錢人嘅原因:
「你哋哩到買賣股票要申請,又要等 Approval,等得黎個價位都唔同左啦,隨時要蝕錢。老實講,我每個月炒股票仲賺得多過份糧!」(註:當事人任職投資銀行,對於任何股票買賣,好多銀行都會要求員工要事先申報,獲得批准先至可以買賣。而當事人職位唔低,每個月都有超過六位數字月薪。)

最孝順嘅原因:
「我阿媽話我份工唔夠型,叫我轉過份工,等佢同啲朋友講起嘅時候可以威啲!」

最不孝嘅理由:
「我都唔想返哩份工,係屋企人叫我返之嘛!」

最驚嚇嘅理由:
「啲同事好污糟,成日喺附近食野,搞到我個位有曱甴呀!你知我最驚曱甴架啦!」

最宅嘅理由:
「我唔鍾意份工成日都要同其他人講野!每日都有啲同事呀、客呀黎搵我,搞到我好緊張。我之前諗住份工剩係喺自己個位到,唔駛見其他人我先做。」(利申:個同事見工嘅時候,小編已經解釋得好清楚……)

最為「前途」著想嘅理由:
「哩份工好 Dry,全部接觸到嘅人都係同性,識唔到男仔。我要去啲男女人數平均啲嘅工作環境。」

最霸氣嘅理由:
「……」(即係無講低!個同事直接頭也不回地離開咗公司,仲要著走埋套制服!)

留言

這個網誌中的熱門文章